މެރިޓައިމް ސަރވިސްއާއެކު އުތުރަށް އަންނަ ބޯޓުތަކަށް ފުރިހަމަ ޚިދުމަތްތަކެއް ލިބޭނެ: އެމްޕީއެލް

އުތުރު މެރިޓައިމް ސަރވިސްއާއެކު ޤާއިމްކުރާ ޚިދުމަތްތަކާއެކު އެ ސަރަހައްދުން ޚިދުމަތް ހޯދަން ކަނޑުބޯޓުތައް އަންނާނެކަން ޔަގީންކުރެވޭކަމަށް މޯލްޑިވްސް ޕޯޓްސް ލިމިޓެޑުގެ ސީއީއޯ މުހައްމަދު ވަޖީޙް އިބްރާހީމް ވިދާޅުވެއްޖެއެވެ.

އެމްޕީއެލް ސީއީއޯ މިހެން ވިދާޅުވީ، އުތުރުގައި އެމްޕީއެލް ޚިދުމަތްތައް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

އެމްޕީއެލްއާއި އެސްޓީއޯ ގުޅިގެން އުތުރުގައި އޮފް ޝޯ ބަންކަރިން ޚިދުމަތް މިމަހުގެ 12 ވަނަ ދުވަހު ފެށުމަށް ދަނީ ތައްޔާރުވަމުންނެވެ. އެގޮތުން އެސްޓީއޯއިން ބަންކަރިން ޚިދުމަތް ދޭއިރު، ބޯޓުތަކަށް ބޭނުންވާ އެހެނިހެން ހުރިހާ ޚިދުމަތެއް ދޭނީ އެމްޕީއެލްއިންނެވެ.

އެމްޕީއެލްއިން މި ޚިދުމަތް ދިނުމަށްޓަކައި މިހާރު އެކަމަށް ހާއްސަ ވެބްސައިޓެއްވެސް ވަނީ ލޯންޗުކޮށްފައެވެ. އެ ވެބްސައިޓު މެދުވެރިކޮށް ބޯޓުތަކަށް ބޭނުންވާ ޚިދުމަތް ހޯދުމަށް އެމްޕީއެލްއާ ގުޅާލެވޭނެއެވެ.

މި ޚިދުމަތް ދޭނީ އުލިގަމުގައި ޤާއިމްކުރާ ޕޯޓް ފެސިލިޓީ މެދުވެރިކޮށެވެ. އެގޮތުން އޭޖެންޓު ކޯލްސް ސެންޓަރަށް ގުޅުމުން ޕޯޓް ފެސިލިޓީއާ ގުޅާލެވި ބޯޓަށް ބޭނުންވާ ޚިދުމަތް ފޯރުކޮށްދިނުމުގެ މަސައްކަތް ފެށިގެންދާނެ ކަމަށް އެމްޕީއެލްއިން ވިދާޅުވެއެވެ.

އެމްޕީއެލްއިން ބޯޓުތަކަށް ޚިދުމަތް ފޯރުކޮށްދޭނީ ވަށާޖެހޭ ގޮތަށް ސަރުކާރު އެހެން ކުންފުނިތަކާއި ގުޅިގެންކަމަށް އެކުންފުނިން ވިދާޅުވެއެވެ.

އެމްޕީއެލްއިން ދޭނެ ޚިދުމަތްތައް

• ޕައިލޮޓޭޖް ޚިދުމަތް
• ޔޮޓް ޑޮކިންގް ސާވިސް
• ބޯޓު ކްރިއު ބަދަލު ކުރުމުގެ ޚިދުމަތް
• ފެނަކަ ކުންފުންޏާއި ގުޅިގެން ބޯޓުތަކަށް ފެން ފޯރުކޮށްދިނުމުގެ ޚިދުމަތް
• ބޯޓުތަކަށް ބޭނުންވާ އެހެނިހެން ސަޕްލައިތައް ފޯރުކޮށްދިނުމުގެ ޚިދުމަތް
• ކުޅުދުއްފުށި ޕޯޓު މެދުވެރިކޮށް މެއިންޓެނަންސް ޚިދުމަތް
• އެމްޓީސީސީ މެދުވެރިކޮށް އަޑީތެޔޮ ފަދަ ތަކެތި
• ވެމްކޯ މެދުވެރިވެ ބޯޓުތަކުން ކުނި އުކާލުމުގެ ޚިދުމަތް

އުތުރުގެ މެރިޓައިމް ޚިދުމަތް އިފްތިތާހްކޮށް، އެކަމަށް ހާއްސަ ވެބްސައިޓު ލޯންޗުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އެމްޕީއެލްގެ ސީއީއޯ އިސްމާޢީލް ވަޖީހު ވިދާޅުވީ، އެމްޕީއެލްއިން މި ޚިދުމަތް 24 ގަޑިއިރު ފޯރުކޮށްދޭނެއެވެ.

"މި އޭރިއާއިން ދަތުރުކުރާ އުޅަނދުތައް ރާއްޖެ އަންނަން ޖެހޭ ސަބަބު އެބަޖެހޭ މެދުވެރިކުރުވަން. މި ސަރަހައްދުގައި ހިމެނޭ އެހެން ޤައުމުތަކަށް ވުރެ ޚިދުމަތްތަށް ފުރިހަމަވާންޖެހޭނެ. އެކަން ނުކުރެވޭ ކަމަށްވަނީނަމަ އެމީހުން ޚިދުމަތް ހޯދުމަށް އައުމުގެ ބޭނުމެއް ނޯންނާނެ. އެމްޕީއެލްގެ ވިސްނުމަކީ ޚިދުމަތްތައް ފުރިހަމަކޮށްދީ ޚިދުމަތް ހޯދަން އަންނާނެ ސަބަބު މެދުވެރިކޮށްގެން މިކަންކޮށްދިނުން" ވަޖީހު ވިދާޅުވިއެވެ

މި ރަސްމިއްޔާތުގައި ވާހަކަ ދައްކަވަމުން އެސްޓީއޯ މެނޭޖިން ޑިރެކްޓަރ ޝިމާދު އިބްރާހިމް ވިދާޅުވީ ދުރުރާސްތާގައި އެ ކުންފުނީގެ އަމާޒަކީ މުޅި ސަރަހައްދު އެއްކޮށް ތަރައްޤީކޮށް ފުރިހަމަ ޕޯޓް ފެސިލިޓީއަކާއެކު މަސައްކަތް ފެށުން ކަމަށެވެ. އަދި އެ މަސައްކަތް މޯލްޑިވްސް އިކޮނޮމިކް ގޭޓްވޭ މަޝްރޫޢުގެ ތެރެއިން ކުރިއަށްދާނެކަމަށްވެސް އެސްޓީއޯ މެނޭޖިން ޑިރެކްޓަރ ވިދާޅުވިއެވެ.