ނެޝަނަލް ސިންގަލް ވިންޑޯ، "ޓްރޭޑިއަން" އިފްތިތާހުކޮށްފި

ރާއްޖެއަށް މުދާ އިމްޕޯޓްކޮށް އެކްސްޕޯޓް ކުރާ ފަރާތްތަކަށް ފަސޭހަކަމާއެކު، އެއް ޕްލެޓްފޯމަކުން މުހިންމު ޚިދުމަތްތައް ހޯދޭގޮތަށް ފަރުމާކޮށްފައިވާ ނެޝަނަލް ސިންގަލް ވިންޑޯ "ޓްރޭޑިއަން" ރަސްމީކޮށް އިފްތިތާހުކޮށްފިއެވެ.

ނެޝަނަލް ސިންގަލް ވިންޑޯ "ޓްރޭޑިއަން" އިފްތިތާހުކޮށްދެއްވީ ހޮޓެލް ޖެންގައި ބޭއްވި ޚާއްސަ ރަސްމިއްޔާތެއްގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފެވެ.
ނެޝަނަލް ސިންގަލް ވިންޑޯގެ މަސައްކަތަކީ އިޤްތިޞާދީ ތަރައްޤީއާ ވިޔަފާރިއާ ބެހޭ ވުޒާރާއާއި ޓްރޭޑް ނެޓް މޯލްޑިވްސް ގުޅިގެން ކުރިއަށްގެންދާ މަސައްކަތެކެވެ.

ނެޝަނަލް ސިންގަލް ވިންޑޯ ޕްރޮޖެކްޓަކީ ދިވެހި ވިޔަފާރިވެރިންނަށް ލުއި ގޮތްތަކެއް މަގުފަހިކޮށްދެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ގެންގުޅުއްވާ ތަޞައްވުރުގެ ދަށުން، ކުރިއަށްގެންދިޔަ ވަރަށް މުހިންމު މަސައްކަތެކެވެ. މިއީ ވިޔަފާރީގެ ބޭނުންތަކަށް އެކި އިދާރާތަކުން ހޯދަމުން އައި ޚިދުމަތްތައް، އޮންލައިންކޮށް އެއް ޕްލެޓްފޯމެއްގެ ތެރެއިން ހޯދޭނެގޮތަށް ބަދަލުކޮށް، ވިޔަފާރިވެރިންނަށް ދިމާވަމުންދާ ދަތިތަކަށް ބޮޑު ލުޔެއް ގެންނާނެ ޚިދުމަތަކަށް ވާނެކަމަށް އިޤްތިޞާދީ ތަރައްޤީއާ ވިޔަފާރިއާ ބެހޭ ވުޒާރާއިން ވިދާޅުވެއެވެ.

މިރަސްމިއްޔާތުގައި ޓްރޭޑު ނެޓުގެ މެނޭޖިންގ ޑިރެކްޓަރ ސައީދާ އުމަރު ވިދާޅުވީ މިއީ ވިޔަފާރިވެރިންނަށް ފަހި މާހައުލެއް ގާއިމްކޮށްދިނުމަށް ސަރުކާރުން ކުރައްވާ މަސައްކަތުގެ މުހިއްމު ބައެއް ކަމަށެވެ. އަދި މިހާރު އިފްތިތާހުކޮށްފައިމިވަނީ ސިންގަލް ވިންޑޯގެ ފުރަތަމަ ފިޔަވަހީގެ ޚިދުމަތްތައްކަމަށާއި މުޅި ސިސްޓަމް އަންނަ އަހަރުގެ ފުރަތަމަ ކުއާޓަރގައި ބޭނުންކުރަން ފެށޭނެ ކަމަށް އޭނާ ވިދާޅުވިއެވެ.

ސައީދާ ވިދާޅުވީ މިސިސްޓަމް ރަސްމީކޮށް ބޭނުންކުރަން ފަށާނީ ނޮވެމްބަރުމަހުގެ 1ވަނަ ދުވަހުން ފެށިގެން ކަމަށެވެ.

"ވަރަށް ބޮޑު ބަދަލެއް ވިޔަފާރީގެ މާހައުލަށް އަންނަ އިރު، އެ ބޭނުންވާ ތަމްރީންތަކާއި ބޭނުންވާ ވަގުތު ވިޔަފާރިތަކަށް ދިނުން މިކަމުގެ ބޭނުމަކީ،" ސައީދާ ވިދާޅުވިއެވެ.

ޓްރޭޑިއަންގެ މަސައްކަތްކޮށްފައިވަނީ އޭޝިއަން ޑިވެލޮޕްމަންޓު ބޭންކުގެ އެހީތެރިކަމާއެކު ކްރިމްސަން ލޮޖިކާއި ހަވާލުކޮށްގެންނެވެ.

މިރަސްމިއްޔާތުގައި ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާ ވިދާޅުވީ މިޕްލެޓްފޯމްގެ ސަބަބުން ވިޔަފާރި ކުރުމުގައި ހުށަޅަންޖެހޭ ލިޔެކިޔުންތައް ފަސޭހައިން ހުށައެޅުމުގެ ފުރުސަތުގެ ލިބުމުގެ އިތުރުން ދެފުށްފެންނަ އުސޫލަކުން މަސައްކަތްތައް ކުރިއަށްގެންދެވޭނެ މަގުފަހިވެގެންދާނެ ކަމަށެވެ. އަދި މިއީ ވިޔަފާރީގެ މުޢާމަލާތްކުރާ ފަރާތްތައް ގުޅުވާލަދޭނެ ޕްލެޓްފޯމަކަށްވެސް ވެގެންދާނެކަމަށް ދިޔާނާ ވިދާޅުވިއެވެ.

"ކަސްޓަމްސްގެ މިހާރު ބޭނުންކުރާ ހިރާސް ނިޒާމް އިތުރަށް ތަރައްޤީވެ، ޕްރޮފައިލް ކުރުމާއި ޓާގެޓު ކުރުމުގެތެރެއިން މުދާ ކްލިއާ ކުރުމުގެ ޕްރޮސެސް އަވަސްވެ ޚަރަދު ކުޑަކުރެވިގެންދާނެ،" ދިޔާނާ ވިދާޅުވިއެވެ.

ދިޔާނާ ވިދާޅުވީ މިއީ ދުނިޔޭގެ އެންމެ ކުރިއަރާފައިވާ ޤައުމުތަކުގައި ބޭނުންކުރާ ނިޒާމެއް ކަމަށެވެ. އެގޮތުން ވޯލްޑު ޓްރޭޑު އޯގަނައިޒޭޝަންގެ މެމްބަރު ޤައުމުތަކުގެތެެރެއިން %56 ޤައުމުން މި ނިޒާމް ޤާއިމްކޮށްފައިވާކަން ދިޔާނާ ފާހަގަކުރެއްވިއެވެ.

ޓްރޭޑިއަން ފަރުމާކޮށްފައިވަނީ އިޤްތިޞާދީ ދާއިރާގެ ފަރާތްތަކާއި ރާއްޖޭގެ ވިޔަފާރިވެރިންގެ ޚިޔާލާއި މަޝްވަރާ ހޯދައިގެންނެވެ. މިކަމާއި ގުޅޭ ގިނަ ބައްދަލުވުންތަކެއް ޓްރޭޑް ނެޓްގެ ފަރާތުން ވަނީ ބާއްވާފައެވެ.