އަޠުހަރުގެ މަރު: ކަން ހިނގާދިޔަގޮތުގެ ވީޑިއޯ ޢާއިލާއަށާއި ނޫސްވެރިންނަށް ދައްކާލައިފި

މާލޭގައި އަންހެނަކު ރަހީނުކުރި މައްސަލައާ ގުޅިގެން ފުލުހުންގެ ބެލުމުގެ ދަށަށްގެންދިޔަ އާދަމް އަޠުހަރުގެ މަރާއި ގުޅިގެން، އެކަން ހިންގާފައިވާ ގޮތް އޭނާގެ އާއިލާއާއި ނޫސްވެރިންނަށް ދައްކާލައިފިއެވެ.

ދާޚިލީ ސަލާމާތާއި ފަންނިއްޔާތާއިބެހޭ ވުޒާރާއިން ހަމައެކަނި ނޫސްވެރިންނަށް ޚާއްސަކޮށްގެން އިސްކަންދަރު ކޮށީގައި ބޭއްވި ބައްދަލުކުރެއްވުމެއްގައި ވަނީ އަޠުހަރު މަރުވުމުގެ ކުރިން ދޫނިދޫ ޖަލުގައި އޭނާ ހުރިއިރު ކަން ހިންގާފައިވާ ގޮތް ފެންނަ ފުޓޭޖްތައް ދައްކާލާފައެވެ. މީގެ އިތުރުން އަންހެނަކު ރަހީނުކޮށްގެން އުޅުނު ވަގުތު އޭނާއާއި ފުލުހުން މުޢާމަލާތު ކުރަން މަސައްކަތް ކުރާ ވީޑިއޯއެއްވެސް ވަނީ ދައްކާފައެވެ. ނޫސްވެރިންނަށް ވީޑިއޯތައް ދެއްކުމުގެ ކުރިން އޭނާގެ އާއިލާއަށްވެސް އެވީޑިއޯތައްވަނީ ދައްކާލާފައެވެ.

މި ވީޑިއޯތައް އާއިލާއާއި ނޫސްވެރިންނަށް ދައްކާލާފައިމިވަނީ އަޠުހަރުގެ މަރާއި ގުޅިގެން މީސް މީޑިއާގައި ބައެއް ފަރާތްތަކުން ތަފާތު ތުހުމަތުތަކެއް ކުރަމުންދާ ދަނޑިވަޅެއްގައެވެ. ފުލުހުންގެ ބެލުމުގެ ދަށުގައި ހުރެ އޭނާ މަރުވީ އަނިޔާކޮށްގެންކަމަށް ދޭހަވާގޮތަށް ބައެއް ފަރާތްތަކުން ތުހުމަތުކޮށްފައިވާއިރު، ފުލުހުން ނޫސްވެރިންނަށް ދެއްކި ތިރީހަކަށް މިނެޓުގެ ވީޑިއޯތަކުން އެފަދަ އެއްވެސް މަންޒަރެއް ފެނިފައިނުއެވެ. އަދި އޭނާ ހައްޔަރުކުރެވިފައިހރުި ތަނުގެތެރޭ ހިނގައިދިޔަ ހުރިހާ ކަމެއް އެވީޑިއޯތަކުން ސާފުކޮށް ފެނެއެވެ. އެމަންޒަރުތައް ފުލުހުން މީގެކުރިން މި ހާދިސާގައި ކަން ހިންގިކަމަށް ބަޔާންކޮށް އާންމުކޮށްފައި ޓައިމްލާއިނާވެސް ދިމާވެއެވެ.

މިބައްދަލުވުމުގައި ބައިވެވެވަޑައިގެން ދާޚިލީ ވަޒީރު ވަނީ މިކަމާއިގުޅޭ ވަކި 3 ތަހުޤީޤެއް ކުރިއަށްދާކަން ފާހަގަކުރައްވާފައެވެ. އެގޮތުން ކަންހިންގައިދިޔަ ގޮތް ފުލުހުންނާ، ހިއުމަން ރައިޓްސް ކޮމިޝަން އަދި ނޭޝަނަލް އިންޓަގްރިޓީ ކޮމިޝަނުން ބަލާނެ ކަމަށް ވިދާޅުވިއެވެ. އަދި މި މަންޒަރުތައް ބައިނަލްއަޤްވާމީ ފަރާތަކުން އެދިލައްވައިފިނަމަ ފޯރުކޮށްދޭން ތައްޔާރަށްތިބިކަން ވަޒީރުވަނީ ފާހަގަކުރައްވާފައެވެ.

ވަޒީރު އިޙްސާން އިތުރަށް ވިދާޅުވީ، ފަހަކަށްއައިސް ބަނދުގައި ހުއްޓާ މީހަކު މަރުވެއްޖެނަމަ ޢާއިލާއާއި ހަށިގަނޑު ހަވާލުކުރުމުގެ ކުރިން އޮޓޮޕްސީ ހެދުން އުސޫލެއްގެ ގޮތުންކުރަމުންގެންދާކަމަށެވެ. އެގޮތަށް ޢަމަލުކުރަނީ ޖަވާބުދާރީވުމުގެ ގޮތުންކަމަށް މީގެކުރިންވެސް ވަޒީރުވަނީ ވިދާޅުވެފައެވެ.

މިހަދިސާއާ ގުޅިގެން ނެރުނު ބަޔާނެއްގައި ފުލުހުން ވިދާޅުވީ އާދަމް އަޠުހަރަށް އައިޖިއެމްއެޗްގައި ފަރުވާދޭން ފެށީ އާދީއްތަދުވަހުގެ ރޭގެ ވަގުތެއްގައިކަމަށާއި އޭނާ ނިޔާވީ ހޯމަ ދުވަހު ހަވާިރު 16:08 އެހާއިރުކަމަށެވެ. އަދި މަރުވި ސަބަބު ދެނެގަތުމަށްޓަކައި ހަށިގަނޑުގެ އޮޓޮޕްސީއެއް ހެދުމަށް ނިންމާފައިވާކަމަށްވެސް ފުލުހުން ވިދާޅުވިއެވެ.