މަސްތުވާތަކެއްޗާއި ގުރޫޕު ކުށްތައް ހުއްޓުވަން ޚާއްސަ މަސައްކަތްތަކެއް ކުރެވޭ: އޭސީޕީ ޝިފާން

މަސްތުވާތަކެތީގެ މައްސަލަތަކާއި ގުރޫޕު ކުށްތައް ހުއްޓުވުމަށް ޚާއްސަ އިސްކަމެއް ދިވެހި ފުލުހުންގެ ޚިދުމަތުން ދޭނެ ކަމަށް އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޝިފާން ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގުރާމުގައި ވާހަކަދައްކަވަމުން އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޝިފާން ވިދާޅުވީ ފުލުހުންގެ ނިޒާމު އިތުރަށް ހަރުދަނާކުރުމަށް މި 5 އަހަރުގެ ތެރޭގައި ފުލުހުން ހާސިލްކުރަން ބޭނުންވާ ކަންކަން ހިމެނޭ ސްޓްރެޓީޖިކް ޕްލޭނެއް އެކުލަވާލާފައިވާ ކަމަށެވެ.

ޝިފާން ވިދާޅުވީ ސްޓްރެޓީޖިކް ޕްލޭން އެކުލަވާލުމަށް ގިނަ އަދަދެއްގެ އާންމުންނާ ސުވާލުކޮށްފައިވާ ކަމަށެވެ. އެގޮތުން ގިނަ މީހުން ޤަބޫލުކުރާ ގޮތުގައި ރާއްޖޭގައި ގިނައީ މަސްތުވާތަކެތީގެ މައްސަލަތައްކަމަށް ޝިފާން ވިދާޅުވިއެވެ. އެހެންކަމުން މަސްތުވާތަކެތީގެ މައްސަލަތައް ހުއްޓުވަން ފުލުހުން ޚާއްސަ އިސްކަމެއްދޭނެކަމަށް ޝިފާން ވިދާޅުވިއެވެ.

ޝިފާން ވިދާޅުވީ މަސްތުވާތަކެތީގެ މައްސަލަތަކުގެ އިތުރުން ނުރައްކާތެރި ކުށްތަކަށް އަރައިގަންނަ ގުރޫޕުތައް ހުއްޓުވުމަކީވެސް ފުލުހުންގެ ބޮޑު އަމާޒެއްކަމަށެވެ. އަދި މި ބާވަތުގެ ކުށްތައް ހުއްޓުވުމަށް ފުލުހުންގެ ނިޒާމު ތަރުތީބުކޮށް ވަޞީލަތްތައް އިތުރުކުރުމަށް ގިނަ މަސައްކަތްތަކެއް މިހާރު ކުރަމުންދާކަމަށެވެ.

އެސިސްޓެންޓް ކޮމިޝަނަރ އޮފް ޕޮލިސް ވިދާޅުވީ މަސްތުވާތަކެތީގެ އިތުރުންވެސް ތަފާތު ބާވަތްތަކުގެ ކުށްތައް ރާއްޖޭގެ ބައެއް ސަރަހައްދުތަކުގައި ގިނަކަން ފާހަގަކުރެވޭ ކަމަށެވެ. އަދި މިވަގުތު ފުލުހުންގެ ވިސްނުމަކީ ކުށަކަށް އަރައިގަތުން ގިނަ ސަރަހައްދުތަކުގައި އެކުށެއް ހުއްޓުވަން އިސްކަންދީ ފުލުހުންގެ ނިޒާމު ތަރުތީބުކުރުންކަމަށް ޝިފާން ވިދާޅުވިއެވެ.

"އަޅުގަނޑުމެން މިހާރު މިދަނީ ލޯކަލް ޕޮލިސިން ސްޓްރެޓިޖީގެ ދަށުން ވީހާވެސް ރައްޔިތުންނާ ގާތުން ފުލުހުން މަސައްކަތްކުރާ ނިޒާމެއް ޤާއިމްކުރުމަށް މަސައްކަތް ކުރަމުން. އަދި ޑޭޓާ ސެންޓްރަލްތައް ކުރިއަރުވައި ޑޭޓާ ލައިން ޕޮލިސިން ނިޒާމެެއް ޤާއިމްކުރުމުގެ މަސައްކަތްވެސް މިދަނީ ކުރަމުން." ޝިފާން ވިދާޅުވިއެވެ.

ރާއްޖެ މިއަދު ޕްރޮގުރާމްގައި ވާހަކަދައްކަވަމުން އެސިސްޓެންޓް ކޮމިޝަނަރ އޮފް ޕޮލިސް ޝިފާންވަނީ ނެޝަނަލް ސެކިޔުރިޓީ ސާވިސަސްގެ ދަށުން ދިވެހި ފުލުހުންގެ ޚިދުމަތް ވަކިވި ހިސާބުން، އެ ޚިދުމަތުން ހޯދާފައިވާ ކުރިއެރުންތަކަށްވެސް އަލިއަޅުވާލައްވާފައެވެ. އެގޮތުން މުވައްޒަފުންނާއި ވަޞީލަތްތަކުގެ އަދަދު އިތުރުކޮށް، ފުލުހުންގެ އިންޓެލިޖެންސެއް އުފައްދައި ޓެކްނޮލޮޖީގެ ވަޞީލަތްތައް ބޭނުންކޮށްގެން ޚިދުމަތްތައް ފުރިހަމަކުރުމަކީ މަދަނީ މުއައްސަސާއަކަށް ބަދަލުވިފަހުން ފުލުހުންގެ ޚިދުމަތުން ހޯދާފައިވާ ކުރިއެރުންތައްކަން އޭނާ ފާހަގަކުރެއްވިއެވެ.

ދިވެހި ފުލުހުންގެ ޚިދުމަތުގެ އޮފީސްތައް 147 ރަށެއްގައި ޤާއިމްކޮށްފައިވާ ކަމަށާއި، ފުލުހުންގެ ޚިދުމަތުގައި 5500 އަށްވުރެ ގިނަ ފުލުހުން މަސައްކަތްކުރަމުންދާ ކަމަށް ޝިފާން ވިދާޅުވިއެވެ. އަދި ފުލުހުންގެ ތަޙުޤީޤުތައް ހަރުދަނާވެ ޒަމާނީ ޑިޖިޓަލް އުކުޅުތައް މިހާރު ބޭނުންކުރަން ފަށާފައިވާކަމަށާއި، ޤާނޫނުތަކާއި ސިޔާސަތުތަކާއި ފުލުހުންގެ ޚިދުމަތުގެ ނިޒާމުތައް މިހާރު ވަރަށް ބޮޑަށް ހަރުދަނާވެފައިވާކަމަށްވެސް ފާހަގަކުރެއްވިއެވެ.

ދިވެހި ފުލުހުންގެ ޚިދުމަތް ނެޝަނަލް ސެކިޔުރިޓީ ސާވިސްގެ ކުޑަ ދޮށުން ވަކިވެ، މަދަނީ ގޮތެއްގައި ޚިދުމަތްދޭން ފަށާފައިވަނީ 1 ސެޕްޓެމްބަރު 2004 ގައެވެ.