ރެސިޑެންސީ ވިސާއާއެކު 5 އަހަރުތެރޭގައި 6 ބިލިޔަން ޑޮލަރުގެ އިންވެސްޓްމަންޓް ލިބޭނެ

ރާއްޖޭގައި ބޮޑު އިންވެސްޓްމަންޓްތައް ޤާއިމްކުރާ ފަރާތްތަކަށް ރެސިޑެންސީ ވިސާ ދޫކުރަން ފެށުމުން ފުރަތަމަ ފަސް އަހަރު ތެރޭގައި 6 ބިލިޔަން ޑޮލަރާހަމައަށް އިންވެސްޓްމަންޓް ލިބޭނެކަމަށް ލަފާކުރެވޭކަމަށް ސަރުކާރުން ވިދާޅުވެއްޖެއެވެ.

ސަރުކާރުން ވަނީ ބޮޑެތި އިންވެސްޓަރުންނަށް މި ގައުމުން ބޯހިޔާވަހިކަން ހަމަޖައްސައިދިނުމަށް، އިންވެސްޓަރ ރެސިޑެންސް ޕްރޮގްރާމް ކުރިއަށް ގެންދިއުމަށް ނިންމަވާފައެވެ. މިގޮތަށް ނިންމެވީ މިއަދު ބޭއްވި ކެބިނެޓުގެ ބައްދަލުވުމުގައި މަޝްވަރާކުރެއްވުމަށްފަހުއެވެ.

ކެބިނެޓުގެ ނިންމެވުންތަކާ ގުޅޭގޮތުން ނޫސްވެރިންނަށް މަޢުލޫމާތު ދެއްވަމުން ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވީ ރާއްޖޭގައި މިހާރު ދޫކުރަމުން އަންނަ ކޯޕަރޭޓް ރެސިޑެންސް ވިސާއަކީ 2013 ވަނަ އަހަރުން ފެށިގެން ދޫކުރަމުން އަންނަ ވިސާއެއްކަމަށެވެ. މިހާތަނަށް އިންވެސްޓަރ ރެސިޑެންސް ވިސާ ދޫކުރަމުން އައިސްފައި ނުވާކަން ފާހަގަކުރައްވަމުން ވަޒީރު ވިދާޅުވީ އިންވެސްޓަރ ރެސިޑެންސް ޕްރޮގްރާމަކީ ދުނިޔޭގެ ކުރިއަަރާފައިވާ ޤައުމުތަކުގައި ވަރަށް ފުޅާކޮށް ހިންގާ ޕްރޮގްރާމެއްކަމަށެވެ. އަދި އެޤައުމުތައް ކުރިއަރައިގެން ދިއުމުގައި އިންވެސްޓަރ ރެސިޑެންސް މުހިންމު ދައުރެއް އަދާކުރާކަމަށްވެސް ވަޒީރު ވިދާޅުވިއެވެ.

ރާއްޖޭގައިވެސް އިންވެސްޓަރ ރެސިޑެންސް ޕްރޮގްރާމް ހިންގަން ފެށުމުން އެންމެ ފުރަތަމަ މަރުހަލާގައިވެސް ދެހާހާއި ގާތްކުރާ ޢަދަދަކަށް އިންވެސްޓަރ ރެސިޑެންސް ވިސާ ހޯދުމަށް ހުށައަޅާނެކަމަށް ލަފާކުރެވޭކަމަށް ވަޒީރު ވިދާޅުވިއެވެ. އަދި އެ ޢަދަދު ފަސް އަހަރު ދުވަހުގެތެރޭގައި ހަތަރު ހާހަށް އަރާނެކަމަށާއި، މިއާއެކު 6 ބިލިޔަން ޑޮލަރާހަމައަށް އިންވެސްޓްމަންޓް ގެނެވޭނެކަމަށް ލަފާކުރެވޭކަމަށްވެސް އިހްސާން ވިދާޅުވިއެވެ.

"އަޅުގަނޑުމެން ބަލަނީ ދުބާއީ އަދި މެލޭޝިއާ ފަދަ ޤައުމުތަކަށް ލާޖް ސްކޭލެއްގައި އިންވެސްޓަރ ރެޒިޑެންސީ ޕްރޮގްރާމްތައް ހިންގާފައިހުރި ޤައުމުތަކުގެ މޮޑެލް ބޭނުންކޮށްގެން ރާއްޖޭގައި އިންވެސްޓަރ ރެޒިޑެންސީ ޕްރޮގްރާމް ހިންގޭތޯ. އިނީޝިއަލް ސްކޭލްގައި އަޅުގަނޑުމެން ފޯކާސްޓް ކުރަނީ 1500 -2000 އެޕްލިކެންޓް ޕްރައިމަރީއަށް. އަދި ސެކަންޑަރީ އެޕްލިކެންޓްސް 4000 އަށް އަރާވަރަށް އިނީޝިއަލް ވިންޑޯ ފަސް އަހަރު ތެރޭ ހުޅުވާލަން. އެ ފަސް އަހަރު ތެރޭ ޑައިރެކްޓް އިންވެސްޓްމެންޓުގެ ގޮތުގައި 1.1 ބިލިއަން ޑޮލަރު އަދި އިންޑަރެކްޓް އިންވެސްޓްމެންޓާއި އެއްކޮށްލައިގެން 6 ބިލިއަން ޑޮލަރާއި ހަމައަށް އިންވެސްޓްމެންޓް ގެނެވޭނެ ކަމަށް މި ޕްރޮޖެކްޓުގެ ތެރެއިން." ޢަލީ އިޙްސާން ވިދާޅުވިއެވެ.

އިންވެސްޓަރ ރެސިޑެންސް ޕްރޮގްރާމާއި ގުޅޭގޮތުން ވާހަކަފުޅު ދައްކަވަމުން ޚާރިޖީ ވަޒީރު މޫސާ ޒަމީރު ވިދާޅުވީ، މި ޕްރޮގްރާމް ހިންގުމަށް ސަރުކާރުން ނިންމެވީ ދުނިޔޭގެ ކުރިއަރާފައިވާ ޤައުމުތަކުގައިވެސް މިކަން ކުރާގޮތަށްކަމަށެވެ. އަދި އިންވެސްޓަރުންނަށް ދިގުމުއްދަތަކަށް ދިރިއުޅުމަށް ބޯހިޔާވަހިކަން ދިނުމާއި، ޤައުމަށް އެތެރެވެ، އަނބުރާ ދިއުމަށް ފަސޭހަކޮށްދިނުމަކީ ދުނިޔޭގެ ކުރިއަރާފައިވާ ޤައުމުތަކުގައިވެސް ޢަމަލުކުރަމުން އަންނަ އުސޫލުކަމަށާއި، އަދި މިއީ ދުނިޔޭގައި ފުޅާވަމުން އަންނަ މާކެޓެއްކަމަށްވެސް ވަޒީރު ވިދާޅުވިއެވ.

ވަޒީރު ވިދާޅުވީ ރާއްޖޭގައި މިކަން ކުރައްވާނީ ދުނިޔޭގެ ކުރިއަރާފައިވާ ޤައުމުތަކުގައި އެންމެ މޮޅަށް މިކަން ކުރާގޮތަށްކަމަށާއި، އެފަދަ މީހުންގެ މަޝްވަރާ ހޯދައިގެންކަމަށެވެ. މިފަދަ ޕްރޮގްރާމްތައް ހިންގާނީ އެޤައުމެއް މާހައުލަށް ފެތޭގޮތަށްކަމަށާއި، އެގޮތުން ރާއްޖޭގައިވެސް މިކަން ކުރިއަށްގެންދާނީ ރާއްޖޭގެ މާހައުލަށް ގުޅޭގޮތަށްކަމަށް ވަޒީރު ވިދާޅުވިއެވެ.

"ކޮންމެ ޤައުމަކަށް މިއޮންނަނީ ވަކިކަހަލަ ޕްރޮގްރާމެއް. މިސާލަކަށް ޔޫއޭއީގަ ބެނުންކުރާ ޕްރޮގްރާމެއް ނޫން މި ބޭނުންކުރަނީ މެލޭޝިއާގަ. މެލޭޝިއާގެ ސެންސިޓިވިޓީ ތަފާތު. އެހެންވީމަ އެޤައުމުގަ އެހުންނަ ސެންސިޓިވިޓީއަށް ބަލާހަ މި ޕްރޮގްރާމެއް ތައްޔާރުވެގެން މި އަންނަނީ. ރާއްޖޭގަ ނުކުރެވި އޮތްކަމަމީ މިކަން ޕްރޮމޯޓްކުރުން. ރެސިޑެންސީ ކަންކަން ދުނިޔޭގެ އެހެން ޤައުމުތަކުގައި ކޮށްފައި މިހުންނަނީ އެކަމަށް ޚާއްޞަ ކުންފުނިތައް މެދުވެރިވެގެން ވަރަށް ބޮޑަށް ޕްރޮމޯޓްކޮށްގެން."

ވަޒީރު ވިދާޅުވީ، އިންވެސްޓަރ ރެސިޑެންސް ހިންގާނީ ރާއްޖޭގެ ހައުސިން މައްސަލައަށްވެސް އަސަރު ނުކުރާނެގޮތަށްކަމަށެވެ. އެހެންކަމުން ޤާނޫނަށް ގެންނަންޖެހޭ ބަދަލެއް އޮތްނަމަ އެ ބަދަލެއް ގެންނަވާނެކަމަށްވެސް ޚާރިޖީ ވަޒީރު ވިދާޅުވިއެވެ.

ރާއްޖޭގައި ބޭރުގެ ފަރާތްތަކަށް އިންވެސްޓް ކުރެވޭނެ ދާއިރާތައް ކަނޑައެޅުމުގެ އުސޫލުތަކާއި، އެފަދަ ފަރާތްތަކަށް ރާއްޖޭގައި އިންވެސްޓް ކުރުމުގެ ލައިސެންސް ދިނުމާއި، އެފަރާތްތަކަށް ޤާނޫނީ ރައްކާތެރިކަށް ކަށަވަރުކުރުމަށް ފޮރިން އިންވެސްޓްމަންޓްގެ ބިލު މިދިޔަ މަހުގެ 22 ވަނަ ދުވަހު ރައްޔިތުންގެ މަޖިލީހުން ވަނީ ފާސްކޮށްފައެވެ. ރާއްޖޭގައި މިހާރު ޢަމަލުކުރަމުން އަންނަ ފޮރިން އިންވެސްޓްމަންޓުގެ ޤާނޫނަކީ މީގެ 45 އަހަރު ކުރިން ޢަމަލުކުރަން ފެށި ޤާނޫނެކެވެ.