ކައުންސިލްތަކަށް އިންތިޚާބުކުރާ މެމްބަރުންގެ އަދަދު ގިނަކަން ރައްޔިތުންވެސް ޤަބޫލުކުރޭ: ދިރާސާ

ލޯކަލް ކައުންސިލްތަކަށް އިންތިޚާބުކުރާ މެމްބަރުންގެ އަދަދު އިތުރުކަމަށް ގިނަ ރައްޔިތުން ދެކޭކަމަށް ދިރާސާއަކުން ދައްކައިފިއެވެ.

މި ދިރާސާއަކީ ލާމަރުކަޒީ ނިޒާމު އިސްލާޙުކުރުމަށްޓަކައި ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާބެހޭ ވުޒާރާއިން ހަވާލުކޮށްގެން ދިވެހިރާއްޖޭގެ ޤައުމީ ޔުނިވަރސިޓީން ކުރިއަށްގެންދިޔަ ދިރާސާއެކެވެ.

ދިވެހިރާއްޖޭގެ ޤައުމީ ޔުނިވަރސިޓީން ވިދާޅުވީ މި ދިރާސާއަށް ބޭނުންވާ މަޢުލޫމާތު އެއްކުރުމަށް 1159 އަށްވުރެ ގިނަ މީހުންނާ ސުވާލު ކޮށްފައިވާ ކަމަށެވެ. އަދި 113 ފަރާތަކާއެކު ފޯކަސް ގުރޫޕުތައް ބާއްވާ ދިރާސާއަށް ބޭނުންވާ މަޝްވަރާތަކާއި އިންޓަވިއުތައް ކޮށްފައިވާކަމަށް ޤައުމީ ޔުނިވަރސިޓީން ވިދާޅުވިއެވެ. އެގޮތުން އަތޮޅު، ސިޓީ، ރަށު ކައުންސިލްތަކުގެ ރައީސުންނާއި މެންބަރުންނާއި ޤާނޫނީ ވަކީލުންނާއި ހިލޭސާބަހަށް މަސައްކަތްކުރާ ޖަމިއްޔާތަކުގެ އިތުރުން ދާއިރާގެ ތަޖުރިބާކާރުންނާއި އިންޓަވިއުކޮށް، މަޝްވަރާކޮށްފައިވާކަމަށް ޤައުމީ ޔުނިވަރސިޓީން ވިދާޅުވެއެވެ.

ލާމަރުކަޒީ ނިޒާމާ ގުޅޭގޮތުން ކުރިއަށް ގެންދިޔަ ދިރާސާގައި ބައިވެރިވި ގިނަ މީހުން ޤަބޫލުކުރާ ގޮތުގައި އިދާރީ ދާއިރާތަކަށް މިހާރު މެންބަރުން އިންތިޚާބުކުރާ އަދަދު އިތުރެވެ. އަދި އިދާރީ ދާއިރާތަކަށް ކައުންސިލް މެންބަރުން އިންތިޚާބުކުރަންޖެހޭ އަދަދު ކަނޑައަޅަންވާނީ އެ އިދާރީ ދާއިރާއެއްގެ އާބާދީއަށް ރިޢާޔަތްކުރުމަށްފަހުކަމަށްވެސް ދިރާސާގެ ބައިވެރިވި ގިނަ މީހުން ޤަބާލުކުރެއެވެ.

ދިރާސާއިން ދެއްކި ގޮތުގައި ލާމަރުކަޒީ ނިޒާމުގެ ދަށުން ކައުންސިލްތަކަށް އިންތިޚާބުކުރާ މެންބަރުންނަކީ މިހާރަށްވުރެ ބޮޑަށް ތަޢުލީމީ، ޤާބިލް ބަޔަކަށްވާންޖެހޭކަމަށްވެސް ގިނަ ބަޔަކު ޤަބޫލުކުރެއެވެ.

ދިރާސާއިން ފާހަގަވި އެހެން ކަންކަމުގެ ތެރޭގައި މިހާރަށްވުރެ ބޮޑަށް މާލީ ބާރުވެރިކަން ކައުންސިލްތަކަށް ހޯދުން ހިމެނެއެވެ. އަދި މީގެ ކުރިން އިދާރީ ދާއިރާތައް ހިނގަމުންދިޔަ މަރުކަޒީ ނިޒާމަށްވުރެ، ލާމަރުކަޒީ ނިޒާމު ރަނގަޅުކަމަށް ގިނަ ބަޔަކު ޤަބޫލުކުރާކަން ދިރާސާގައި ފާހަގަކޮށްފައިވެއެވެ. ނަމަވެސް ލާމަރުކަޒީ ނިޒާމުގެ ޤާނޫނާ އެއްގޮތަށް، ނިޒާމު ތަންފީޒްކުރުމަށާއި ކައުންސިލްތައް މޮނިޓަރކުރުމުގެ މަސައްކަތް އިތުރަށް ހަރުދަނާ ކުރަންޖެހޭކަމަށްވެސް ދިރާސާގައި ވަނީ ފާހަގަކޮށްފައެވެ.

ލާމަރުކަޒީ ނިޒާމު އިސްލާޙުކުރުމަށް ކުރިއަށްގެންދިޔަ ދިރާސާގައި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށްވެސް އަލިއަޅުވާލާފައިވެއެވެ. އެގޮތުން މިހާރަށްވުރެ ބޮޑަށް އަންހެނުންގެ ތަރައްޤީއަށް މަސައްކަތްކުރާ ކޮމިޓީތައް ބާރުވެރިކުރަންޖެހޭކަމަށް ގިނަ ބަޔަކު ޤަބޫލުކުރާކަމަށް ދިރާސާގައި ބުނެފައިވެއެވެ. އަދި އަންހެނުންގެ ކޮމިޓީއަކީ ލޯކަލް ކައުންސިލްތަކުގެ ދަށުން އޮންނަންޖެހޭ ކޮމިޓީއެއްކަމަށް ގިނަ ބަޔަކު ޤަބޫލުކުރެއެވެ.

ލާމަރުކަޒީ ނިޒާމު އިސްލާޙުކުރުމަށް ބޭނުންވާ ދިރާސާގެ މަސައްކަތް ޤައުމީ ޔުނިވަރސިޓީން ފެށީ މިއަހަރުގެ ފެބްރުއަރީމަހުގެ ތެރޭގައެވެ. ޤައުމީ ޔުނިވަރސިޓީން ވިދާޅުވީ ޢާންމުންނަށް ފެންނާނެ ގޮތަށް އަންނަ މަހުގެ ތެރޭގައި ދިރާސާ ޢާންމުކުރެވޭނެ ކަމަށެވެ.

އިދާރީ ދާއިރާތަކަށް ކައުންސިލް މެންބަރުން މިހާރު އިންތިޚާބުކުރާ އަދަދު އިތުރުކަމަށް ގިނަ ބަޔަކު ޤަބޫލުކުރާކަން ދިރާސާއިން ދައްކާއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް ވަނީ ކައުންސިލްތަކުގެ ސައިޒު ބޮޑުކަން ފާހަގަކުރައްވައި، އެކަމަށް ހައްލުތަކެއް ގެންނަންޖެހޭކަން ފާހަގަކުރައްވާފައެވެ. އަދި ދައުލަތުގެ ބައެއް މިނިވަން މުއައްސަސާތަކުންވެސް ވަނީ މިކަމަށް ތާޢީދުކޮށްފައެވެ.