ޤާބިލު ވެރިން ހޮވޭނީ ވޯޓުލުމުގެ ޙައްޤު އަދާކޮށްގެން: ފުވާދު

ޑިމޮކްރަސީ ނިޒާމުގެ ތެރެއިން ދައުލަތުގެ ކަންކަން ތަރުތީބުކުރަނީ ރައްޔިތުންކަމަށާއި، އެކަން ކުރެވޭނީ ވޯޓުލުމުގެ ޙައްޤު އަދާކޮށްގެންކަމަށް އިލެކްޝަންސް ކޮމިޝަންގެ ރައީސް ފުވާދު ތައުފީޤު ވިދާޅުވެއްޖެއެވެ. އިލެކްޝަންސް ކޮމިޝަނުގެ ރައީސް މިިހެން ވިދާޅުވީ، ވޯޓުލާ މީހުންގެ ދުވަހާއި ގުޅިގެން ދެއްވި ޚިޠާބުގައެވެ.

ވޯޓުލާ މީހުންގެ ދުވަހާ ގުޅިގެން ދެއްވި ޚިޠާބުގައި އިލެކްޝަންސް ކޮމިޝަންގެ ރައީސް ފުވާދު ތައުފީޤު ވިދާޅުވީ ދައުލަތެއް ފެށި ދެމިއޮންނަނީ ރައްޔިތުންގެ ކިބައިން ކަމަށެވެ. އެގޮތުން ދައުލަތުގެ ވެރިންނާއި ޤާނޫނު ހަދާ މަޖިލިސްތަކަށް ރައްޔިތުންގެ މަންދޫބުން ހޮވަނީ ރައްޔިތުންގެ ވޯޓުންކަމަށާއި، ޤައުމުގެ ކަންކަން ރަނގަޅުކުރުމަށް ވޯޓުލުމުގެ ޙައްޤު ފުރިހަމައަށް ކޮންމެ ފަރުދަކުވެސް އަދާކުރުމަކީ މުހިންމުކަމެއްކަމަށް ފުވާދު ވިދާޅުވިއެވެ.

"ޑިމޮކްރެޓިކް ނިޒާމެއްގައި ކޮންމެ ރައްޔިތެއްގެ ވޯޓަކީ މުހިންމު ވޯޓެއް. ޙަޤީޤަތަށް ބަލާއިރު ރައްޔިތުން ބައިވެރިވާ ޝާމިލް ވެރިކަމެއް ކުރެވޭނީ ޤާނޫނުއަސާސީން ލިބިދީފައިވާ ވޯޓުލުމުގެ ޙައްޤު އަދާކޮށްގެން. ވޯޓުލާން ނުކުތުމަކީ ޑިމޮކްރެޓިކް ނިޒާމުގެ އެއް އަސާސް. ދައުލަތް އެކަށައެޅުމަށްޓަކައި ޤާނޫނުތައް ހެދުމަށް ރައްޔިތުންގެ މަންދޫބުން އިންތިޚާބުކުރުމުގެ ބާރު، ރައްޔިތުންނަށް ލިބޭ." އިލެކްޝަންސް ކޮމިޝަނުގެ ރައީސް ފުވާދު ތަޢުފީޤް ވިދާޅުވިއެވެ.

ފުވާދު ވިދާޅުވީ ވޯޓުލުމަކީ ކޮންމެ ރައްޔިތަކަށްވެސް ޤާނޫނުއަސާސީން ލިބިދީފައިވާ ބާރެއްކަމަށާއި މި ބާރުގެ ބޭނުން ފުރިހަމަ ގޮތުގައި ހިފަންޖެހޭ ކަމަށެވެ. އަދި ކުރިއަށް އޮތް ޖީލަށް ވޯޓުލުމުގެ މުހިންމުކަމާއި، ޤައުމުގެ ކަންކަން ރަނގަޅުކުރުމުގައި ޤާބިލް ވެރިން ހޮވޭނީ ވޯޓުލުމުގެ ޙައްޤު އަދާކޮށްގެންކަން ވިސްނައިދޭންޖެހޭކަމަށް ފުވާދު ވިދާޅުވިއެވެ.

ޚިޠާބު ނިންމަވާލައްވަމުން ފުވާދު ތައުފީޤުވަނީ ޤަނޫނުއަސާސީން ދިވެހި ކޮންމެ ރައްޔިތަކަށް ލިބިދޭ މިނިވަންކަމާއެކު ވޯޓުލާން ނުކުންނަންޖެހޭކަމަށް ވިދާޅުވެފައެވެ.

ދިވެހިރާއްޖޭގައި ވޯޓުލާ މީހުންގެ ދުވަސް ފާހަގަކުރަން ފަށާފައި މިވަނީ މިއަހަރުއެވެ. ވޯޓުލާ މީހުންގެ ދުވަހެއްގެ ގޮތުގައި އިލެކްޝަންސް ކޮމިޝަން ކަނޑައަޅުއްވާފައިވަނީ އޮގަސްޓު މަހުގެ 25 ވަނަ ދުހެވެ. މިއަހަރުގެ ޝިޢާރަކީ "ބާރަކީ ފާހަގަ"އެވެ.