ހއ.ވަނގާރު ބޭރުން ފަޅުވެރިއަކު ނެތް ލަންކާގެ މަސްބޯޓެއް އޮޔާދާތީ އެ ސަރަހައްދުން ދަތުރު ކުރާ ފަރާތްތަކުން ސަމާލުވުމަށް އެމްއެންޑީއެފްއިން އިލްތިމާސްކޮށްފިއެވެ.
އެމްއެންޑީއެފުން ވިދާޅުވީ ހއ. ވަނގާރުގެ ހުޅަނގުން 39 ނޯޓިކަލް މޭލު ބޭރުން ސްރީލަންކާގެ މަސްބޯޓެއް އޮޔާދާކަމުގެ މަޢުލޫމާތު ކޯސްޓްގާޑަށް ލިބިފައިވާ ކަމަށެވެ.
އެ ބޯޓަކީ އިންޖީން މައްސަލައެއް ޖެހުމުގެ ސަބަބުން އޭގެ ފަޅުވެރިން ދޫކޮށްލާފައިވާ މަސްބޯޓެއްކަމަށާއި މިއީ ހުޅަނގު މޫސުމުގެ ވައި ބާރު ދުވަސްވަރަކަށްވުމުން ވައި ޖެހެނީ ހުޅަނގާއި ހުޅަނގުއުތުރުން ކަމަށްވާތީ އެ ބޯޓް، އޮޔާއެކު ރާއްޖޭގެ ބައެއް ރަށްތަކާ ކައިރިވާނެކަމަށް ލަފާކުރެވޭކަމަށެވެ.
އެހެން ކަމުން އެ ސަރަހައްދުން ދަތުރުކުރާ ފަރާތްތަކުންނާއި، ހާއްސަކޮށް ރޭގަނޑު ދަތުރުކުރާ ފަރާތްތަކުން އެކަމަށް ސަމާލުކަން ދެއްވުމަށް އެމްއެންޑީއެފްއިން އިލްތިމާސްކުރެއެވެ.