ސަލާމަތާއި ރައްކާތެރިކަން ކަށަވަރުކުރުމަށް އެތެރެކުރާ ތަކެތި، ޑިއުޓީ މަޢާފް ލިސްޓަށް

ސަލާމަތާއި ރައްކާތެރިކަން ކަށަވަރުކުރުމުގެ ކަންކަން ބެލެހެއްޓުމަށްޓަކައި، ސަލާމަތީ ޚިދުމަތަކުން ބޭނުންކުރުމަށް ރާއްޖެ އެތެރެކުރާ ތަކެތިން ޑިއުޓީ މަޢާފްކުރުން ހިމަނާ އިމްޕޯޓް ޑިއުޓީ މަޢާފުކުރުމުގައި ޢަމަލުކުރާ އުސޫލަށް އިސްލާޙްގެނެސްފިއެވެ.

މި އިސްލާޙް މިހާރުވަނީ ގެޒެޓުގައި ޝާއިޢުކޮށްފައެވެ.

ދިވެހިރާއްޖޭގެ އެކްސްޕޯޓް އިމްޕޯޓު ޤާނޫނުގެ ދަށުން އިމްޕޯޓް ޑިއުޓީ މަޢާފުކުރާ ތަކެތީގެތެރޭގައި ދިވެހިންގެ ސަލާމަތާއި ރައްކާތެރިކަން ކަށަވަރުކުރުމުގެ ކަންކަން ބެލެހެއްޓުމަށްޓަކައި، ސަލާމަތީ ޚިދުމަތްތަކުން ބޭނުންކުރުމަށް ރާއްޖެ އެތެރެކުރާ ތަކެތި ހިމަނާފައިވަނީ ޚާއްސަ ހާލަތްތަކުގައި ގެނެވޭ ތަކެތީގެ ޑިއުޓީ މަޢާފްކުރުމުގެ އުސޫލުގެ ދަށުންނެވެ.

ރައީސުލްޖުމްހުރިއްޔާގެ އޮފީހުން ވިދާޅުވީ މިއުސޫލަށް އަމަލުކުރަން ފަށާނީ ގެޒެޓުގައި މިއުސޫލު ޝާއިޢުކުރާ ތާރީޚުން ފެށިގެން ކަމަށެވެ.

މޯލްޑިވްސް ކަސްޓަމްސް ސަރވިސްއިން ވިދާޅުވީ ސަލާމަތާއި ރައްކާތެރިކަން ކަށަވަރުކުރުމުގެ ކަންކަން ބެލެހެއްޓުމަށްޓަކައި، ސަލާމަތީ ޚިދުމަތަކުން ބޭނުންކުރުމަށް ރާއްޖެ އެތެރެކުރާ ތަކެތިން މީގެކުރިންވެސް ޑިއުޓީ މަޢާފްކޮށްދެމުންދާ ކަމަށެވެ. އެހެން ނަމަވެސް ޑިއުޓީ މާފްކޮށްދެމުން އައިސްފައިވަނީ ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިންނާއި ދިފާޢީ ވުޒާރާއިން އެކަމަށް އެދި ސިޓީއެއް ފޮނުވުމުންނެވެ.

އަދި މިހާރު ޤާނޫނަށް ގެނައި އިސްލާހާއެކު މިފަދަ ތަކެތިން ޑިިއުޓީ މަޢާފްކުރުމުގެ މަސައްކަތް ފަސޭހަވާނެ ކަމަށް ކަސްޓަމްސްއިން ވިދާޅުވެއެވެ.