ފަތުރުވެރިކަމުގެ ދާއިރާގެ އޮސްކާގެ ގޮތުގައި ބެލެވޭ ވޯލްޑް ޓުރެވަލް އެވޯޑްސް ޝޯގެ ގްރޭންޑް ފިނާލޭ ރާއްޖޭގައި ބޭއްވުމަށް ނިންމައިފިއެވެ.
އެގޮތުން ވޯލްޑް ޓްރެވަލް އެވޯޑް ޝޯގެ ވެބްސައިޓުގައިވެސް ގްރޭންޑް ފިނާލޭ ބާއްވާ ޤައުމަކީ ރާއްޖޭގައި ކަމަށް ބުނެފައިވެއެވެ. އެހެންނަމަވެސް ޝޯ ބާއްވާނެ ތާރީޚެއް އަދި ކަނޑައަޅާފައެއް ނުވެއެވެ.
މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަނުން ބުނާގޮތުގައި ވޯލްޑް ޓްރެވަލް އެވޯޑްގެ ގްރޭންޑްފިނާލޭ ބޭއްވުމަށް ހަމަޖެހިފައިވަނީ މިއަހަރުގެ ޑިސެމްބަރ މަހުގެ ތެރޭގައި އޮޅުވެލި ބީޗް އެންޑް ސްޕަރ ރިސޯޓްގައެވެ.
ކޮންމެ އަހަރަކުވެސް ރާއްޖެއަށް ވޯލްޑް ޓްރެވަލް އެވޯޑްގައި ރަން އެވޯޑްތަކެއް ލިބެއެވެ. އިންޑިއަން އޯޝަންގެ ބައިން މި އެވޯޑްގައި މިފަހަރުވެސް އެކި ކެޓަގަރީތަކަށް އެންމެ ގިނައިން ނޮމިނޭޓްވެފައިވަނީ ރާއްޖޭގެ ކުންފުނިތަކާއި ރިސޯޓްތަކެވެ. މައިގަނޑު 7 ދާއިރާއަކުން 33 އެވޯޑް ދިނުމަށް ހަމަޖެހިފައިވާ މި އެވޯޑްގައި އިންޑިޔާ ކަނޑުގެ ސަރަޙައްދުން ރާއްޖެއާއި ވާދަކުރަނީ މޮރިޝަސް އާއި، ސޭޝެލްސް އާއި، މަޑަގަސްކަރަ އާއި ރިޔޫނިއަން އައިލެންޑްސްއެވެ.
މި އެވޯޑްގައި ރާއްޖެ ނޮމިނޭޓްވެފައިވާ އެވޯޑްތަކަށް ބަލާއިރު، އެންމެ މަޤްބޫލް މަންޒިލް އަދި އެންމެ މަޤްބޫލު ޑައިވް، ހަނީމޫން، އަދި ކްރޫޒް ޑެސްޓިނޭޝަންވެސް ހިމެނެއެވެ.