ތައިލެންޑުގެ އައު ބޮޑުވަޒީރަށް ރައީސުލްޖުމްހޫރިއްޔާ މަރުޙަބާ ވިދާޅުވެއްޖެ

ތައިލެންޑުގެ ބޮޑުވަޒީރުކަމަށް އަލަށް އިންތިޚާބުވެވަޑައިގެންނެވި ޕޭޓޮންގޓާން ޗިނަވާތުއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުޙަބާ ވިދާޅުވެއްޖެއެވެ.

ތައިލެންޑުގައި މިހާތަނަށް އިންތިޙާބު ކުރެވުނު އެންމެ ޒުވާން ބޮޑުވަޒީރަށް މަރުޙަބާ ދަންނަވާ، ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އެކަމަނާގެ ދައުރުގައި ތައިލެންޑަށް އުޖާލާ މުސްތަޤުބަލެއް އޮތް ކަމަށެވެ. އަދި ކުރިއަށް އޮތްތަނުގައި ދެ ޤައުމުގެ ގުޅުން ވަރުގަދަކޮށް ގުޅިގެން މަސައްކަތްކުރެއްވުމަށް އުއްމީދު ކުރައްވާކަމަށް ރައީސުލްޖުމްހޫރިއްޔާ ވިދާޅުވިއެވެ.

Warm congratulations to @ingshin on being appointed as the youngest Prime Minister of Thailand. The Kingdom of Thailand is poised to enter a new era of prosperity under your able leadership. I look forward to working together to further strengthen the close ties of friendship and…

— Dr Mohamed Muizzu (@MMuizzu) August 18, 2024

ތައިލެންޑުގެ އައު ބޮޑުވަޒީރު ޕޭޓޮންގޓާން ޗިނަވާތު އިންތިޙާބުކޮށްފައިވަނީ އެ މަޤާމުގައި ހުންނެވި ފިޔު ތައި ޕާޓީގެ ސެއްތާ ތަވީސިން ޤާނޫނުއަސާސީއާ ޚިލާފުވެފައިވާ ކަމަށް ކަނޑައަޅައި މަޤާމުން ދުރު ކުރުމުންނެވެ.

ޕޭޓޮންގޓާނަކީ ތައިލެންޑުގެ ބޮޑުވަޒީރުކަމުގެ މަޤާމަށް އިންތިޚާބު ކޮށްފައިވާ ދެވަނަ އަންހެން ބޭފުޅާއެވެ. އަދި, ބޮޑުވަޒީރު ކަމުގެ މަސްއޫލިއްޔަތުތަކާ ހަވާލުވެ ވަޑައިގެންނެވި އެންމެ ޒުވާން ބޭފުޅާއެވެ. އޭނާއަކީ, އެ މަޤާމު އަދާ ކުރައްވާ ޗިނަވާތު ޢާއިލާގެ ތިންވަނަ ބޭފުޅާއެވެ. އޭނާގެ ކުރިން އެ މަޤާމު ފުރުއްވާފައިވާ ބޭފުޅުންގެ ތެރޭގައި ބައްޕާފުޅު ތަކްސިނާއި ބޮޑުދައިތާފުޅު ޔިންގލަކް ޗިނަވާތު ހިމެނިވަޑައިގަންނަވައެވެ.

އައު ބޮޑުވަޒީރެއް އިންތިޚާބު ކުރުމަށް ޤާނޫނު ހަދާ މަޖިލީހުގައި ނެގި ވޯޓުގައި ޕޭޓޮންގޓާނަށް 319 މެންބަރުންގެ ތާޢީދު ލިބުނެވެ. އެއީ, މަޖިލީހުގެ ތިންބައިކުޅަ ދެބައި އަޣުލަބިއްޔަތެވެ. ޕޭޓޮންގޓާނަކީ މީގެ ކުރިން ސަރުކާރުގެ އެއްވެސް މަޤާމެއް އަދާ ކުރައްވާފައިވާ ބޭފުޅެއް ނޫނެވެ. ނަމަވެސް, ބޮޑުވަޒީރުކަމުގެ މަޤާމަށް އޭނާގެ ނަން ހުށަހަޅުއްވާފައި ވަނީ އޭނާގެ ބައްޕާފުޅު ތަކްސިން ކަމަށް ބެލެވެއެވެ.