މަސްތުވާތަކެއްޗަށް ދެވިހިފާފައިވާ މީހުންނަށް ދޭ ފަރުވާއަށް ސަރުކާރުން ކުރާ ހޭދަ އިތުރުކުރަނީ

މަސްތުވާތަކެތީގެ ފަރުވާއަށް ސަރުކާރުން ކުރާ ހޭދަ އިތުރުކޮށް، މިހާރު ކުރަމުން އަންނަ ހޭދައިގެ އިތުރަށް 30 މިލިއަން ރުފިޔާ ހިމެނުމަށް ނިންމާފައިވާކަން ނޭޝަނަލް ޑްރަގް އޭޖެންސީން ވިދާޅުވެއްޖެއެވެ.

އެ އެޖެންސީގެ ފަރާތުން މިހެން ވިދާޅުވީ، ޑްރަގް ކޯޓުގެ ރިހެބިލިޓޭޝަން އަމުރުގެ ދަށުން މިއަހަރު ފަރުވާގެ ޕްރޮގުރާމު ފުރިހަމަ ކޮށްފައިވާ ފަރާތްތަކުގެ އަގުވަޒަންކޮށް ހިތްވަރު ދިނުމަށްޓަކައި ޑްރަގް ކޯޓުން ބޭއްވި ހާއްސަ ހަފްލާ ޝަފަރުވެރިކޮށްދެއްވައި ވާހަކަ ދައްކަވަމުން އެންޑީއޭގެ ބޯޑުގެ ޗެއަރމަން އަލްއުސްތާޛާ ލުބްނާ މުޙައްމަދު ޒާހިރު ޙުސައިންއެވެ.

އެންޑީއޭގެ ބޯޑުގެ ޗެއަރމަން އަލްއުސްތާޛާ ލުބްނާ މުޙައްމަދު ވަނީ މަސްތުވާތަކެތީގެ ވަބާއިން ސަލާމަތްވުމަށް ހިންގޭ ފަރުވާގެ ޕްރޮގްރާމުތައް ނިންމައި މުޖުތަމަޢުއަށް ނުކުންނަ މީހުންނަށް ވަޒީފާ ހޯދަން ސަރުކާރު ހިއްސާވާ ކުންފުނިތަކުން އެހީތެރިކަން ފޯރުކޮށްދޭން އެދިވަޑައިގެންފައެވެ.

ފަރުވާގެ ނިޒާމްގެ ހަރުދަނާ ކުރުމަށް ސަރުކާރުން ކުރާ ހޭދަ އިތުރުކުރައްވާފައިވާކަން ފާހަގަކުރައްވާ، ލުބްނާ ވިދާޅުވީ އަންނަ އަހަރަށް ލަފާ ކުރާ ބަޖެޓްގައި މިކަމަށް އިތުރު 30 މިލިއަން ރުފިޔާ ހިމަނަން ސަރުކާރުން ނިންމަވާފައިވާ ކަމަށެވެ. ލުބުނާ ވަނީ ފަރުވާ ހޯދާ ފަރާތްތަކަށް މުޖުތަމަޢުގެ އެހީތެރިކަން ލިބިދިނުމުގެ މުހިންމުކަން ފާހަގަކުރެއްވިއެވެ.

މި ޙަފުލާގައި ވާހަކަދައްކަވަމުން ޑްރަގް ކޯޓުގެ އިސްޤާޟީ އަލްއުސްތާޛު ޢަބްދުއްސައްތާރު ޢަބްދުލްޙަމީދު ވިދާޅުވީ، މަސްތުވާތަކެއްޗަށް ދެވިހިފާފައިވާ ފަރާތްތަކުން އެކަމުން ސަލާމަތްވުމަށް ކުރާ މަސައްކަތަކީ ފަސޭހަކަމެއް ނޫންކަމަށެވެ. ގޮންޖެހުންތައް ހުރަސްކޮށް އަލުން މުޖުތަމަޢުއަށް ޒިންމާދާރު މީހުންގެ ގޮތުގައި ނިކުންނަން މަސައްކަތް ކުރާ ފަރާތްތަކަށް ހުރިހާ އެންމެންވެސް ހިތްވަރު ދޭން ޖެހޭކަމަށް އިސް ޤާޟީ ވިދާޅުވިއެވެ. އަދި ޑްރަގް ކޯޓުން ފަރުވާއަށް އަމުރުކުރި ކަމުގައިވިޔަސް، ވަސީލަތްތަކުގެ ދަތިކަމާއެކު ފަރުވާ ލަސްވާކަން ފާހަގަކުރައްވާ އިސްޤާޟީ ވަނީ މިކަމަށް އަވަސް ހައްލެއް ހޯދުމުގެ މުހިންމުކަމަށް އަލިއަޅުއްވާފައެވެ.

2023 ވަނަ އަހަރުގެ ޑްރަގް ކޯޓުގެ ނަމޫނާ މުވައްޒަފަށާއި ހާޒިރީއަށް އެންމެ ރަނގަޅު ފަރާތްތަކަށްވެސް މި ޙަފުލާގައި އިނާމާއި ހަނދާނީ ލިޔުން ދީފައިވެއެވެ. މީގެ އިތުރުން ޑްރަގް ކޯޓަށް ކޮށްދެއްވާފައިވާ ޚިދުމަތްތަކަށް، މަސްތުވާތަކެއްޗާ ދެކޮޅަށް މަސައްކަތް ކުރައްވާ ޢާންމު ފަރާތެއް ކަމުގައިވާ ޢަލީ އަދީބަށްވެސް މި ޙަފުލާގައި ހަނދާނީ ފިލާ ދީފައިވެއެވެ.

މި ޙަފުލާގައި ވަނީ ޑްރަގް ކޯޓުގެ މަސައްކަތްތައް ޢާންމުންނަށް އަންގައިދީ ހޭލުންތެރިކުރުވުމަށް ކޯޓުގެ ޔޫޓިއުބު ޗެނަލެއް އިފްތިތާޙްކޮށްފައެވެ.

ވޭތުވެ ދިޔަ އަހަރު، ޑްރަގް ކޯޓުން 586 މީހެއްގެ މައްޗަށް ފަރުވާއަށް އަމުރުކޮށްފައިވެއެވެ. އަދި 419 ފަރާތެއް އެ އަހަރުގެ ތެރޭގައި ފަރުވާ ފުރިހަމަކޮށްފައިވެއެވެ. އަދި، ފަރުވާގެ އަމުރާ ޚިލާފުވެގެން، މިދިޔަ އަހަރުގެ ތެރޭގައި 173 ފަރާތެއް ވަނީ ފަރުވާއިން ވަކިކޮށް، ފުރަތަމަ ޙުކުމު ތަންފީޛު ކުރުމަށް އަމުރުކުރެވިފައެވެ.

މި ޙަފުލާގައި، ޝަރަފުވެރިމެހުމާނުގެ އިތުރުން، ޖުޑީޝަލް ސަރވިސް ކޮމިޝަނުގެ ރައީސް އަލްއުސްތާޛު ޙުސައިން ރިޟާ އާދަމާއި، ކޮމިޝަނަރ އޮފް ޕޮލިސް ޢަލީ ޝުޖާޢުއާއި، ޗީފް ޖުޑީޝަލް އެޑްމިނިސްޓްރޭޓަރ އަލްއުސްތާޛާ ޢާއިޝަތު ރިޒުނާއާއި، ސުޕީރިއަރ ކޯޓުތަކުގެ އިސްޤާޟީންނާއި، ނޭޝަނަލް ޑްރަގް އޭޖެންސީގެ އެކްޓިންގ ސީ.އީ.އޯ. މުޙައްމަދު ރާޝިދުއާއި، އޭޖެންސީގެ ބޯޑުގެ މެންބަރުންނާއި، ޑްރަގް ކޯޓުގެ ޤާޟީންނާއި މުވައްޒަފުން ބައިވެރިވެވަޑައިގަތެވެ.