ފަތުރުވެރިކަން ކުރިއެރުވުމަށް ބޭނުންވާ ސިފަތައް އައްޑޫގައި އެބަހުރި: ވަޒީރު އާދަމް ޝަރީފް

އައްޑޫ ސިޓީއަކީ ފަތުރުވެރިކަން ކުރިއެރުވުމަށް ބޭނުންވާ ސިފަތައް ހުރި ސިޓީއެއްކަމަށް ސިޓީތަކާއި، އިދާރީތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.

ވަޒީރު މިހެން ވިދާޅުވީ އައްޑޫ ސިޓީގައި ފަތުރުވެރިކަން ފުޅާކުރުމަށް، ބާއްވާ "ޑެސްޓިނޭޝަން އައްޑޫ ސަމިޓް: ވަން ބްރޭންޑް ވަން ސްޓޯރީ" ގައި ހާއްސަ މެހްމާނެއްގެ ގޮތުގައި ބައިވެރިވަޑައިގެން ދެއްކެވި ވާހަކަފުޅުގައެވެ.

އައްޑޫ އީކުއޭޓަރ ވިލެޖްގެ ބްލޫ ލެގޫންގައި ބޭއްވި ޑެސްޓިނޭޝަން އައްޑޫ ސަމިޓުގައި ވާހަަކަފުޅު ދައްކަވަމުން ސިޓީތަކާއި، އިދާރީތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވީ ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންގެ އެންމެ ބޮޑު އިންސައްތައެއް ހިއްސާކުރަނީ އައްޑޫ ސިޓީގެ ރައްޔިތުންކަމަށެވެ. އަދި އައްޑޫއަށް ބޭނުންވާ އިންވެސްޓުމަންޓުތައް ހޯދުމަށްވެސް ދަތި ނުވާނެކަން ފާހަގަކުރައްވާ ވަޒީރު އާދަމް ޝަރީފް ވިދާޅުވީ އައްޑޫއަށް ނިސްބަތްވާ ގިނަ އަދަދެއްގެ ވިޔަފާރިވެރިން ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވަމުންދާކަމަށެވެ.

"ރާއްޖޭގެ އެކި ކަންކޮޅުތަކުގައި ހިނގާ ރިސޯޓުތަކުގައިވެސް އެންމެ ގިނަވާނީ އައްޑޫ ސިޓީގެ ބޭފުޅުން، މިކަމަށް ބޭނުންވާ ސްކިލްސެޓް ވަރަށް ރަނގަޅަށް އައްޑޫ ސިޓީގައި އެބައޮތް، އިންވެސްޓުމަންޓަށް ބަލާއިރު، އައްޑޫގެ އެންމެ ރަށެއްގައި އެބަތިބި ރާއްޖޭގެ 14 ރިސޯޓުގެ އޯނަރުން،" ވަޒީރު ވިދާޅުވިއެވެ.

ވަޒީރު ވިދާޅުވީ އައްޑޫ ސިޓީއަކީ ފަތުރުވެރިކަން ކާމިޔާބު ކުރުމަށް ބޭނުންވާ ހުރިހާ ސިފަތަކެއް ލިބިފައިވާ ސަރަހައްދެއްކަމަށެވެ. އެގޮތުން ގުދުރަތީ ގޮތުންނާއި ތާރީޙީގޮތުންވެސް އައްޑޫ ސިޓީއަށް ހާއްސަ ސިފަތަކެއް ލިބިފައިވާކަން ވަޒީރު ފާހަގަކުރެއްވިއެވެ.

"އެހެންތަންތަނުގައި ނެތް ހާއްސަ ސިފަތަކެއް އައްޑޫ ސިޓީގައި އެބަހުރި، ހާއްސަ ބަހުރުވައެއް އެބައޮތް، ބޭރުގެ އެކި ޤައުމުތަކާއި ގުޅުވާލައިގެން ކިޔާދެވޭނެ ވާހަކަތަކެއް އެބައޮތް، ދެމެހެއްޓެނިވި ގޮތެއްގައި މަސައްކަތްކުރުމުގެ ފުރުސަތު އެބައޮތްކަމަށް ޤަބޫލުކުރެވޭ،" ވަޒީރު އާދަމް ޝަރީފް ވިދާޅުވިއެވެ.

ވަޒީރު ވިދާޅުވީ އައްޑޫ ސިޓީގައި ފަތުރުވެރިކަން ކުރިއެރުވުމަށް ބޭނުންވާ ހުރިހާ އެހީތެރިކަމާއި އެއްބާރުލުމެއް ސަރުކާރުން ދެއްވާނެކަމަށެވެ. އަދި އައްޑޫ ސިޓީއަކީ ރާއްޖޭގެ އެންމެ ބޮޑު ސިޓީއަށްވާއިރު، މި ސިޓީ ތަރައްޤީކުރުމަށް އެންމެން ގުޅިގެން މަސައްކަތްކުރަން ޖެހޭކަމަށް ވިދާޅުވެ، އެ މަސައްކަތުގައި ސިޓީ ކައުންސިލުން ކުރަމުންދާ މަސައްކަތް ވަޒީރު ފާހަގަކުރެއްވިއެވެ.