އިމާމުން ތާޒާކުރުމުގެ ޕްރޮގްރާމްގެ ދަށުން ހުރިހާ އިމާމުން މިއަހަރު ތަމްރީންކުރެވޭނެ: ޑރ. ޝަހީމް
-
ދެ އަތޮޅެއްގައި އިމާމުންނަށް މިއަދު ވަނީ ޕްރޮގްރާމް ފަށާފައި
-
މިހާތަނަށް 100 އަށްވުރެ ގިނަ އިމާމުންނަށް ޕްރޮގްރާމް ހިންގާފައިވޭ
-
700 އެއްހާ ދާއިމީ އިމާމުން ރާއްޖޭގައި މަސައްކަތްކުރޭ
އިމާމުން ތާޒާކުރުމަށް ހިންގާ ޕްރޮގްރާމްގެ ދަށުން މިސްކިތްތަކުގައި މަސައްކަތްކުރާ ހުރިހާ އިމާމުން މިއަހަރު ތަމްރީންކޮށް ނިމޭނެކަމަށް އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މިސްކިތްތަކުގައި މަސައްކަތްކުރާ ހުރިހާ އިމާމުން ތަޒާކުރުމުގެ ޕްރޮގްރާމް ފަށާފައިވަނީ މިދިޔަ ފެބްރުއަރީމަހުއެވެ.
އިމާމުން ތަޒާކުރުމުގެ ޕްރޮގްރާމްގެ ދަށުން ދ އަދި މ އަތޮޅުގެ އިމާމުން ތަމްރީންކުރުމަށް މިހާރު ވަނީ ފަށާފައެވެ. އެ ދެ އަތޮޅުން 49 އިމާމުން މި ޕްރޮގްރާމްގައި ބައިވެރިވެއެވެ.
ސޯޝަލް މީޑިއާގައި އާއްމު ކުރެއްވި ޕޯސްޓެއްގައި އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވީ އިމާމުން ތާޒާކުރުމުގެ ޕްރޮގްރާމްގައި މިހާތަނަށް 100 އަށްވުރެ ގިނަ އިމާމުން ބައިވެރިވެ. ތަމްރީން ހޯދާފައިވާކަމަށެވެ. އަދި ރާއްޖޭގެ މިސްކިތްތަކުގައި 700 އެއްހާ އިމާމުން މަސައްކަތްކުރަމުންދާއިރު، ސަރުކާރުގެ އަމާޒަކީ މިއަަހަރުގެ ނިޔަލަށް ރާއްޖޭގެ މިސްކިތްތަކުގައި މަސައްކަތް ހުރިހާ ދާއިމީ އިމާމުންނަށް މި ޕްރޮގްރާމް ހިންގުންކަމަށް ވަޒީރު ވިދާޅުވިއެވެ.
ވ. އަތޮޅާއި، މ. އަތޮޅުގެ އިމާމުން ތާޒާކުރުމުގެ ޕްރޮގްރާމް މިއަދުވަނީ ފަށާ. މި ޕްރޮގްރާމުގައި އެ 2 އަތޮޅުގެ 49 އިމާމުން ބައިވެރިވޭ. މިއީ ރާއްޖޭގެ ހުރިހައި އިމާމުން ތާޒާކުރުމަށް މިއަހަރު ފަށާފައިވާ ޤަައުމީފެންވަރުގެ މަޝްރޫއެއް. pic.twitter.com/Ncjsa1bfps
— Mohamed Shaheem Ali Saeed (@Mohamedshaheem1) August 14, 2024
އިމާމުން ތާޒާކުރުމުގެ ޤައުމީ މަޝްރޫޢަކީ އިމާމުކަމުގެ ދާއިރާއިން އިތުރު ތަމްރީނު ދިނުމަށްޓަކައި 11 ސަރަހައްދަކަށް ބަހާލައިގެން ދާއިމީ އިމާމުންނަށް އަމާޒުކޮށްގެން ކުރިއަށްގެންދާ ޕްރޮގުރާމެކެވެ.
މި ޕްރޮގްރާމުގައި ޖުމްލަ 9 މާއްދާއެއް ކިޔަވައިދިނުމަށް ހަމަޖެހިފައިވާކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ. އެގޮތުން ޤުރްއާނާއި، ތަޖުވީދުގެ ޢިލްމާއި، ތަފްސީރާއި، ފިޤުހާއި، ޙަދީޘާއި، އަޤީދާގެ ޢިލްމުގެ ދާއިރާއިން އިމާމުންނަށް ބޭނުންވާ މުހިއްމު ޢިލްމީ ކަންކަން އުނގަންނައިދީ، މިސްކިތްތައް ބެލެހެއްޓުމުގެ ގޮތުން އަދާކުރަންޖެހޭ މަސްއޫލިއްޔަތު އަދާކުރެވޭނެ ވަރަށް މި ޕްރޮގުރާމުގެ ތެރެއިން އިމާމުންގެ ޝަޚްޞިއްޔަތު ބިނާކުރެވޭނެކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ.