ރާއްޖެއާއި ބަޙްރައިންގެ ގުޅުން އިތުރަށް ހަރުދަނާވެގެންދާނެކަމުގެ ޔަގީންކަން އެބައޮތް: ޚާރިޖީ ވަޒީރު

ރާއްޖެއާއި ބަޙްރައިންގެ ގުޅުން އިތުރަށް ހަރުދަނާވެގެންދާނެކަމުގެ ޔަގީންކަން އެބައޮތްކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ.

ޚާރިޖީ ވަޒީރު މިހެން ވިދާޅުވީ ބަޙްރައިނަށް ކުރެއްވި ރަސްމީ ދަތުރުފުޅާއި ގުޅޭގޮތުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.

ޚާރިޖީ ވަޒީރު މޫސާ ޒަމީރު ރަސްމީ ދަތުރުފުޅެއްގައި ބަޙްރައިނަށް ވަޑައިގަތީ މިމަހުގެ 11 އިން 15 އަށެވެ.

ދަތުރުފުޅު ނިންމަވާލެއްވުމަށްފަހު ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ޚާރިޖީ ވަޒީރު ވިދާޅުވީ ބަޙްރައިނަށް ކުރެއްވި ދަތުރުފުޅުގައި އެ ޤައުމުގެ ވަލީއަހްދު އަދި ބޮޑުވަޒީރު ސަލްމާން ބިން ހަމަދު އަލް ޚަލީފާއާ ބައްދަލުކުރައްވާ ބިނާކުރަނިވި މަޝްވަރާތަކެއް ކުރެވުނުކަމަށެވެ. އަދި މި ދަތުރުފުޅުގެ ސަބަބުން ރާއްޖެއާއި ބަޙްރައިނާ ދެމެދު އޮތް ގުޅުން އިތުރަށް ހަރުދަނާވެގެންދާނެކަމަށް ޔަގީންކުރައްވާކަމަށްވެސް ވަޒީރު މޫސާ ޒަމީރު ވިދާޅުވިއެވެ.

Successfully concluded my Official Visit to the Kingdom of Bahrain.

It was an honour to have an audience with HRH Prince Salman bin Hamad Al Khalifa. Had productive discussions with the Foreign Minister and other senior dignitaries of the Government of Bahrain.

I am confident…

— Moosa Zameer (@MoosaZameer) August 14, 2024

ޚާރިޖީ ވަޒީރު ބަޙްރައިނަށް ކުރެއްވި ދަތުރުފުޅުގައި ދިވެހިރާއްޖެއާއި ބަޚްރައިންއާ ދެމެދު އޮތް ގުޅުން، އިތުރަށް ބަދަހިކުރުމާއި އެއްބާރުލުން ދެވޭނެ ދާއިރާތަކާއި ގުޅޭގޮތުން މަޝްވަރާކުރައްވާފައިވެއެވެ. އަދި ބަޚްރައިންއާއެކު އޮތް ގާތް ގުޅުން އަބަދުވެސް ދަމަހައްޓާނެކަމުގެ ޔަގީންކަން މި ދަތުރުފުޅުގައި ޚާރިޖީ ވަޒީރު ވަނީ ދެއްވާފައެވެ.

މި ދަތުރުފުޅުގައި ޚާރިޖީ ވަޒީރު ވަނީ ބަހުރައިންގެ ރަސްގެފާނު ހަމަދު ބިން އިސާ އަލް ޚަލީފާއަށް، ރާއްޖޭގެ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފޮނުއްވެވި ޚާއްސަ ސިޓީފުޅެއް ރައްދުކޮށްދެއްވުމަށް ބޮޑުވަޒީރު ސަލްމާން ބިން ހަމަދު އަލް ޚަލީފާއަށް އަރުވާފައެވެ. މީގެ އިތުރުން ޚާރިޖީ ވަޒީރު މޫސާ ޒަމީރު ވަނީ ބަޙްރައިންގެ ފިނޭންސް އެންޑް ނޭޝަނަލް އިކޮނޮމީ މިނިސްޓަރާއި އޮއިލް އެންޑް އެންވަޔަރަމަންޓް މިނިސްޓަރާއި ޓޫރިޒަމް މިނިސްޓަރާ ވަނީ ބައްދަލުކުރައްވާފައެވެ.

ޚާރިޖީ ވަޒީރު މޫސާ ޒަމީރު ބަޙްރައިނަށް ކުރެއްވި ދަތުރުފުޅުގައި އެ ޤައުމުގެ އިކޮނޮމިކް ޑިވެލޮޕްމަންޓު ބޯޑުގެ ބޭފުޅުންނާވެސް ބައްދަލުކުރެއްވިއެވެ. އަދި މުވާސަލާތީ ޚިދުމަތް ފޯރުކޮށްދޭ ބަޓެލްކޯ ކުންފުނީގެ ސީއީއޯ މައިތަމް ޢަބްދުﷲއާވެސް ވަނީ ބައްދަލުކުރައްވާފައެވެ.

މި ބައްދަލުކުރެއްވުމުގައި މުވާސަލާތީ ޚިދުމަތުގެ ދާއިރާއިން ގުޅުން ބަދަހިކޮށް، ސައިބަރ ސެކިއުރިޓީ ވަރުގަދަކުރުމަށް ކުރެވިދާނެ މަސައްކަތްތަކާއި ގުޅޭގޮތުން މަޝްވަރާކުރައްވާފައިވާކަމަށް ޚާރިޖީ ވަޒީރު މޫސާ ޒަމީރު ވިދާޅުވިއެވެ.

ޚާރިޖީ ވަޒީރު ބަޙްރައިނަށް ކުރެއްވި ދަތުރުފުޅުގައި އެމްބެސެޑަރ އެޓް ލަރޖް އަހުމަދު ނަސީރާއި ބައިލެޓަރަލް ސެކްރެޓަރީ ޑރ. ހާލާ ހަމީދު ހިމެނޭހެން ޚާރިޖީ ވުޒާރާގެ އިސް ވަފުދެއް ބައިވެރިވެވަޑައިގެންނެވިއެވެ. މިއީ ބަޙްރައިންގެ ޚާރިޖީ ވަޒީރު ޑރ. އަބްދުއްލަތީފް ބިން ރާޝިދު އަލް ޒަޔާނީގެ ދައުވަތަކަށް ކުރެއްވި ދަތުރުފުޅެކެވެ.

ރާއްޖެއާއި ބަޙްރައިނާއި ދެމެދު ސިޔާސީ ގުޅުން ބަދަހިކުރިތާ މިއަހަރަށް 44 އަހަރު ފުރޭނެއެވެ.