ފެން ހިންދައި، މާލެ ޢާންމު ޙާލަތަށް ގެނެސްފި

މާލެއަށް އިއްޔެ ކުރި ވިއްސާރައިގައި ފެން ބޮޑުވި ސަރަޙައްދުތަކުން ފެން ހިންދައި، ޢާންމު ޙާލަތަށް ގެނެސްފިއެވެ.

އެކްސްގައި ޙިއްސާކުރެއްވި ޕޯސްޓެއްގައި ޤައުމީ ދިފާޢީ ބާރުން ވިދާޅުވީ ޕަންޕު ބަހައްޓައިގެން ފެން ހިންދުމުގެ މަސައްކަތް ކުރަމުންދިޔަ، ހުރިހާ ސަރަހައްދެއް މިހާރު ޢާންމު ޙާލަތަށް ގެނެސްފައިވާ ކަމަށެވެ. އެގޮތުން އިއްޔެ 10 ސަރަހައްދެއްގައި ފެން ހިންދުމުގެ މަސައްކަތް ކޮށްފައިވެއެވެ.

ޤައުމީ ދިފާޢީ ބާރުން ވިދާޅުވީ ވާރޭވެހި ފެން ބޮޑުވުމާ ގުޅިގެން މާލޭގެ 284 ގޭބީސީއަކުން އެހީތެރިކަމަށް އެދިފައިވާ ކަމަށެވެ. މީގެ ތެރެއިން 208 ގެއަކަށް ރޭ 1 ޖެހުމާހަމައަށް އެހީތެރިކަން ފޯރުކޮށްދީފައިވާކަމަށް ދިފާޢީ ބާރުން ވިދާޅުވެއެވެ.

ޤައުމީ ދިފާޢީ ބާރުން ވިދާޅުވީ ބޯކޮށް ވާރޭވެހުމުގެ ސަބަބުން މާލޭގެ އިތުރުން ހއ. ހޯރަފުށި، ހއ. ކެލާ، ހއ. އިހަވަންދޫ، ހދ. ނޮޅިވަރަންފަރު، ހދ. ހަނިމާދޫ އަދި ކުޅުދުއްފުށި ސިޓީއަށްވެސް އެހީތެރިކަން ފޯރުކޮށްދީފައިވާ ކަމަށެވެ.

މާލޭގައި ފެން ހިންދުމުގެ މަސައްކަތުގައާއި ގޭބިސީތަކަށް އެހީތެރިކަން ފޯރުކޮށްދިނުމުގައި ދިވެހި އަސްކަރިއްޔާގެ އިތުރުން މާލެ ސިޓީ ކައުންސިލާއި ސްޓޭޓް އިލެކްޓްރިކް ކޮންޕެނީންވެސްވަނީ ހަރަކާތްތެރިވެފައެވެ.

ރާއްޖެއަށް މިހާރު ކުރަމުންދާ ވިއްސާރައިގައި ފެން ބޮޑުވެ ދިމާވެދާނެ ގެއްލުމަކުން ރައްކާތެރިވުމަށް ކަމާބެހޭ އިދާރާތަކުންވަނީ އިލްތިމާސްކުރައްވާފައެވެ.