މާލެއަށް ބޯކޮށް ވާރޭވެހެމުން ދިޔުމާއި ގުޅިގެން ސްކޫލުތަކުގެ ހަވީރު ދަންފަޅިތަކުގެ ކިޔެވުން ކެންސަލްކޮށްފިއެވެ.
ސްކޫލްތަކުގެ އިތުރުން ޓިއުޝަން އަދި ޤުރުއާން ކްލާސްތަކުގެ ކިޔެވުންވެސް ވަނީ ކެންސަލްކޮށްފައިކަން ފާހަގަކުރެވެއެވެ. ސްކޫލްތަކަށް ބަލާލާއިރު، ކިޔެވުން ކުރިއަށް ނުގެންދާން ނިންމާފައިވަނީ ޕްރީ ސްކޫލްތަކުގައިކަން ފާހަގަކުރެވެއެވެ.
މާލެއަށް ހުއްޓާ ނުލާ މިވަގުތު ވާރޭ ވެހެމުންދާއިރު، މަގުތައްވަނީ ފެން ބޮޑުވެފައެވެ. އަދި މި ހާލަތުގައި ރައްކާތެރިކަމުގެ ފިޔަވަޅުތައް އެޅުމަށް ކަމާއި ބެހޭ ފަރާތްތަކުން ދަނީ އިލްތިމާސްކުރަމުންނެވެ.
މާލޭގެ މަގުތަކުން ފެން ހިންދުމުގެ މަސައްކަތް އެމްއެންޑީއެފުންދަނީ ކުރަމުންނެވެ. އަދި ވެލި ބަސްތާތައް ޖެހުމުގެ މަސައްކަތް ސިފައިންނާއި ފުލުހުންދަނީ ކުރަމުންނެވެ.
ކުރިއަށްއޮތް 5 ދުވަހުވެސް ރާއްޖޭގެ ބޮޑުބަޔަކަށް ގުގުރުމާއިއެކު ވިއްސާރަކުރާނެކަމަށް މޫސުމާ ބެހޭ ޤައުމީ އިދާރާއިން ވަނީ ލަފާކޮށްފައެވެ. މީގެއިތުރުން ވައިޖެހޭނީ އުތުރާއި މެދުރާއްޖެތެރެއަށް ގަޑިއަކު 17 މޭލާއި27 މޭލަށެވެ. އަދި ދެކުނުގައި ގަޑިއަކު 13 މޭލާއި 23 މޭލާއި ދެމެދުގެ ބާރުމިނުގައެވެ. ވިލާގަނޑުގައި ގަޑިއަކު 60 މޭލަށް ވައިގަދަވުމުގެ ފުރުސަތު އެބައޮތްކަމަށް މެޓް އޮފީހުން ވަނީ ބުނެފައެވެ.
އެހެންކަމުން ރާއްޖޭގެ ހުރިހާ ސަރަހައްދެއްގެ ކަނޑުތައް ގަދަވެ ވިލާގަނޑުގައި ވަރަށް ގަދަވާނެކަމަށް އެ އިދާރައިން ވަނީ ލަފާކުރައްވާފައެވެ. އަދި ދިޔަވަރު ބޮޑުވާ ގަޑީގައި އުދައެރުމުގެ ފުރުސަތު އޮތްކަމަށްވެސް ވިދާޅުވެއެވެ.