ރައްޔިތުންނަށް އެހީވުމަށް ސިފައިން ދަނީ ހަރަކާތްތެރިވަމުން: ވަޒީރު ޣައްސާން

މޫސުން ގޯސްވުމުގެ ސަބަބުން މާލެއާއި އަތޮޅުތެރޭގައި ރައްޔިތުންނަށް ކުރިމަތިވެފައިވާ ދަތިތައް ހައްލުކުރުމަށް އެހީތެރިވުމަށް ސިފައިންގެ އެންމެ މަތީވެރިޔާ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އެންގެވުމަށް ސިފައިން ހަރަކާތްތެރިވާން ފަށައިފިއެވެ.

އެކްސްގައި ކުރެއްވި ޕޯސްޓެއްގައި ދިފާޢީ ވަޒީރު މުހައްމަދު ޣައްޞާން މައުމޫން ވިދާޅުވީ ސިފައިން ދަނީ ރައްޔިތުންނަށް އެހީވުމަށް ހަރަކާތްތެރިވަމުން ކަމަށެވެ. އަދި ފެން ހިންދުމުގެ މަސައްކަތުގައިވެސް ސިފައިން ދަނީ ހަރަކާތްތެރިވަމުންކަމަށް ޣައްސާން ވިދާޅުވިއެވެ.

މިއަދު މެންދުރު ކުރިން ފެށިގެން ހުއްޓާ ނުލާ މާލެއަށް ދަނީ ވާރޭ ވެހެމުންނެވެ. މިއާ އެކު މާލޭގެ ބޮޑު ސަރަޙައްދެއްގައި ވަނީ ފެންބޮޑުވެފައެވެ. އެހެންކަމުން ފެން ހިނދުމުގެ މަސައްކަތް އެމްއެންޑީއެފްއިން ދަނީ ކުރަމުންނެވެ.

Will do our best In Sha Allah. Deploying troops on the streets to help citizens, on orders of Commander-in-Chief of the Armed Forces President @MMuizzu, in addition to dewatering efforts. https://t.co/xMU8W8Pm7h

— Mohamed Ghassan Maumoon (@mgmaumoon) August 13, 2024

މުޅި ރާއްޖެއަށްވެސް މޫސުން ގޯސްވެފައިވާއިރު، މޫސުމާ ބެހޭ ޤައުމީ އިދާރާއިން ވަނީ މި ދުވަސްވަރަކީ މޫސުން ގޯސް ދުވަސްވަރެއްކަމުން އެންމެހައި ފަރާތްތަކުން މޫސުމަށް ސަމާލުވުމަށް އިލްތިމާސްކުރައްވާފައެވެ. އަދި ކަނޑުތައް ވަރަށް ގަދަވާނެކަމަށް ލަފާކުރެވޭތީ ކަނޑުދަތުރުކުރާ ފަރާތްތަކުން އެ ކަމަށް ސަމާލުވެ ސަލާމަތީ ކަންކަމަށް އިސްކަންދިނުމަށް ވަނީ އެދިވަޑައިގެންފައެވެ.

ކުރިއަށްއޮތް 5 ދުވަހުވެސް ރާއްޖޭގެ ބޮޑުބަޔަކަށް ގުގުރުމާއިއެކު ވިއްސާރަކުރާނެކަމަށް މޫސުމާ ބެހޭ ޤައުމީ އިދާރާއިން ވަނީ ލަފާކޮށްފައެވެ. އޭގެ އިތުރުން ވައިޖެހޭނީ އުތުރާއި މެދުރާއްޖެތެރެއަށް ގަޑިއަކު 17 މޭލާއި27 މޭލަށެވެ. އަދި ދެކުނުގައި ގަޑިއަކު 13 މޭލާއި 23 މޭލާއި ދެމެދުގެ ބާރުމިނުގައެވެ. ވިލާގަނޑުގައި ގަޑިއަކު 60 މޭލަށް ވައިގަދަވުމުގެ ފުރުސަތު އެބައޮތްކަމަށް މެޓް އޮފީހުން ވަނީ ބުނެފައެވެ.

އެހެންކަމުން ރާއްޖޭގެ ހުރިހާ ސަރަހައްދެއްގެ ކަނޑުތައް ގަދަވެ ވިލާގަނޑުގައި ވަރަށް ގަދަވާނެކަމަށް އެ އިދާރައިން ވަނީ ލަފާކުރައްވާފައެވެ. އަދި ދިޔަވަރު ބޮޑުވާ ގަޑީގައި އުދައެރުމުގެ ފުރުސަތު އޮތްކަމަށްވެސް ވިދާޅުވެއެވެ.