މާލެ ސިޓީ ކައުންސިލަށް އިންތިޚާބުވި ކައުންސިލަރުން ހުވާކޮށްފި

މިދިޔަ މަހުގެ 20 ވަނަ ދުވަހު ބޭއްވި ބައި-އިލެކްޝަން ކާމިޔާބުކޮށް، މާލެ ސިޓީ ކައުންސިލަށް އިންތިޚާބުވި 3 ކައުންސިލަރުން މަޤާމުގެ ހުވާކޮށްފިއެވެ.

ކައުންސިލަރުން ހުވާކުރުމުގެ ރަސްމިއްޔާތު ބާއްވާފައިވަނީ މީރުމާގައި ބޭއްވި ޚާއްސަ ރަސްމިއްޔާތެއްގައެވެ.

މާލެ ސިޓީ ކައުންސިލުގެ 3 ދާއިރާއެއްގެ ގޮނޑި ހުސްވެގެން ބައި-އިލެކްޝަން ބޭއްވީ އެ ދާއިރާތައް ތަމްސީލްކުރައްވަމުން ގެންދެވި ކައުންސިލަރުން ރައްޔިތުންގެ މަޖިލީހަށް އިންތިޚާބުވެވަޑައިގަތުމާއި ގުޅިގެނެވެ. އެގޮތުން ބޭއްވި ބައި-އިލެކްޝަން ކާމިޔާބުކޮށް، މިއަދު ބޭއްވި ރަސްމިއްޔާތުގައި މާލެ ސިޓީ ކައުންސިލަރުންގެ ގޮތުގައި ހުވާކޮށްފައިވަނީ ހެންވޭރު ހުޅަނގު ދާއިރާއަށް އިންތިޚާބުވެވަޑައިގެންނެވި ފާތިމަތު ޝައުފާ ސަލީމާއި މައްޗަންގޮޅި މެދު ދާއިރާއަށް އިންތިޚާބުވެވަޑައިގެންނެވި ފާޠިމަތު އިޝާން ޢަލީއާއި ހުޅުމާލެ ދާއިރާއަށް އިންތިޚާބުވެވަޑައިގެންނެވި ޢަލީ އައިމަނެވެ. މި ބޭފުޅުންނަށް ހުވާލައިދެއްވީ ޑްރަގް ކޯޓުގެ ގާޒީ އަހުމަދު ސަމީރެވެ.

މި 3 ކައުންސިލަރުންވެސް ނިސްބަތް ވަނީ ވެރިކަންކުރާ މައި ޕާޓީ ޕީޕަލްސް ނެޝަނަލް ކޮންގްރެސް، ޕީއެންސީއަށެވެ. އަލަށް ގުޅިވަޑައިގެންނެވި 3 ކައުންސިލަރުންނާއެކު 19 މެމްބަރުން ހިމެނޭ ސިޓީ ކައުންސިލްގައި ސަރުކާރު ތަމްސީލްކުރާ ޕްރޮގްރެސިވް ކޮންގްރެސް ކޯލިޝަންގެ 14 މެންބަރުން ތިއްބަވައެވެ. ބާކީ ތިއްބެވި 5 މެންބަރުންގެ ތެރެއިން 3 މެންބަރުންނަކީ އެއްވެސް ޕާޓީއެއް ތަމްސީލްނުކުރައްވާ މެންބަރުންނެވެ. އަދި 2 މެންބަރުން ނިސްބަތް ވަނީ އިދިކޮޅު އެމްޑީޕީއަށެވެ.

ކައުންސިލަރުން ހުވާކުރެއްވުމުގެ ރަސްމިއްޔާތުގައި ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާބެހޭ ވަޒީރު އާދަމް ޝަރީފް ޢުމަރާއި، މާލެ ސިޓީގެ މޭޔަރ އާދަމް އާޒިމްއާއި ސިޓީ ކައުންސިލްގެ މެމްބަރުންނާއި ރައްޔިތުންގެ މަޖިލީހުގެ މެމްބަރުން ބައިވެރިވެވަޑައިގެންނެވިއެވެ.