އެއަރ އޭޝިއާގެ ޓްރެވަލް އެންޑް ސަރވިސް ސެންޓަރެއް ރާއްޖޭގައި ހުޅުވައިފިއެވެ.
މި ސެންޓަރ ރަސްމީގޮތުން ހުޅުއްވައިދެއްވީ މިނިސްޓަރ އޮފް ޓޫރިޒަމް މޫސާ ޒަމީރާއި އެއަރ އޭޝިއާގެ ސީއީއޯ އައިރީން ޢުމަރެވެ.
މިދިޔަ އަހަރު ފަހުކޮޅު ރާއްޖެއަށް ދަތުރުތައް ފަށާފައިވާ އެއަރ އެޝިއާގެ ޓްރެވަލް އެންޑް ސަރވިސް ސެންޓަރ ރާއްޖޭގައި ހުޅުވުން ފާހަގަކުރުމުގެ ގޮތުން މިއަދު ހޮޓެލް ޖެންގައި ބޭއްވި ޙާއްސަ ރަސްމިއްޔާތުގައި ވާހަކަފުޅުދައްކަވަމުން ޓޫރިޒަމް މިނިސްޓަރ މޫސާ ޒަމީރު ވިދާޅުވީ މިފަދަ ސެންޓަރެއްގެ ސަބަބުން ދިވެހިންނަށް ހެޔޮ އަގުގައި ދަތުރުކުރުމުގެ ފުރުޞަތުތައް އިތުރުވެގެންދާނެ ކަމަށް ޤަބޫލްފުޅުކުރައްވާ ކަމަށެވެ.
މި ހަފްލާގައި ވާހަކަދައްކަވަމުން އެއަރ އޭޝިއާގެ ސީއީއޯ އައިރީން އުމަރު ވިދާޅުވީ ރާއްޖެއަށް އެ އެއަރލައިނުން ކުރާ ދަތުރުތައް ވަރަށް ކާމިޔާބުކަމަށާއި، އަދި އެއަރލައިން މެދުވެރިކޮށް ދުނިޔޭގެ އެކި ހިސާބުތަކުން ރާއްޖެއަށް ފަތުރުވެރިން އަންނަ ކަމަށް އައިރީން ވިދާޅުވިއެވެ.
ރާއްޖޭގައި ހުޅުވި އެއަރ އޭޝިއާގެ ޓްރެވަލް އެންޑް ސަރވިސް ސެންޓަރ އަކީ އެ ކުންފުނިން އޭޝިއާ ސަރަޙައްދުގައި ހުޅުވި 94 ވަނަ މިފަދަ ސެންޓަރެވެ. މި ސެންޓަރ ހިންގާނީ އެއަރ އޭޝިއާގެ ރާއްޖޭގެ އެޖެންޓް އޯލް އެޗް މޯލްޑިވްސްއިންނެވެ.
މި ސެންޓަރުން ދޭ ޙިދުމަތްތަކުގެ ތެރޭގައި އެއަރ އޭޝިއާގެ ޓިކެޓްތައް ވިއްކުމުގެ އިތުރުން، ހޮޓެލްތައް ބުކް ކުރުން ފަދަ ޙިދުމަތްތައްވެސް ލިބެން ހުންނާނެ ކަމަށް އެއަރ އޭޝިއާއިން މަޢުލޫމާތުދެއެވެ.