އެމްޑީޕީގެ ޤައުމީ މަޖިލީހުގެ ބައި-އިލެކްޝަންގައި އެޕާޓީގެ މާލެ ދާއިރާގެ ރައީސްކަށް މާލޭ މޭޔަރު އާދަމް އާޒިމް އިންތިޚާބުކޮށްފިއެވެ.
މިއަދު ބޭއްވި އެމް.ޑީ.ޕީ ޤައުމީ މަޖިލިސް ބައި-އިލެކްޝަންގައި އެންމެ ވާދަވެރިކަމަށް ޤަބޫލުކުރެވުނު މާލެ ދާއިރާގެ ރައީސަކަށް އާދަމް އާޒިމް ކާމިޔާބުކުރެއްވީ މާފަންނު ހުޅަނގު ދާއިރާގެ ކުރީގެ މެންބަރު މުޙައްމަދު ފަލާހުއާ ވާދަކޮށް ތަފާތު ބޮޑު ނަތީޖާއަކުންނެވެ.
އެގޮތުން އާދަމް އާޒިމް 1079 ވޯޓު ހޯއްދަވާފައިވާއިރު، ފަލާހަށް ލިބިވަޑައިގަތީ 470 ވޯޓެވެ.
އާދަމް އާޒިމްވަނީ ނިމިދިޔަ ސަރުކާރުގެ ދައުރުގައި ޖުމްހޫރީ ޕާޓީގެ ސްލޮޓެއްގައި އެމްޑަބްލިޔުއެސްސީ އާއި އެމްޓީސީސީގެ އިސްވެރިއެއްގެ ގޮތުން ޚިދުމަތްކުރައްވާފައެވެ. އަދި ރިޔާސީ އިންތިޚާބުގެ ދުވަސްވަރު އެމްޑީޕީއާ ގުޅިވަޑައިގެން އެޕާޓީގެ ފަރާތުން މާލޭގެ މޭޔަރުގެ ކަމުގެ އިންތިޚާބުގައި ވާދަކޮށް ވަނީ މޭޔަރުކަމުގެ އިންތިޚާބުވެސް ކާމިޔާބުކުރައްވާފައެވެ.
އެމްޑީޕީގެ މާލެ ދާއިރާ ރައީސްގެ މަގާމް ހުސްވެފައިވަނީ ކުރިން އެ މަގާމުގައި ހުންނެވި މާލޭގެ ކުރީގެ މޭޔަރު ޞިފާ މުޙައްމަދު އިސްތިއުފާ ދެއްވާފައިވާތީއެވެ.
އާދަމް އާޒިމްގެ އިތުރުން އެމްޑީޕީގެ ޤައުމީ މަޖިލީހުގެ ބައި-އިލެކްޝަންގައި ކުރީގެ ޑިފެންސް މިނިސްޓަރ މާރިޔާ އަޙްމަދު ދީދީވެސް ވަނީ ގަލޮޅު އުތުރު ދާއިރާ ރައީސްގެ މަޤާމަށް ހޮވެވަޑައިގެންފައެވެ.
އެމްޑީޕީގެ ގައުމީ މަޖިލީހުގެ ބައި-އިލެކްޝަންގައި މާލޭ ސަރަޙައްދުގައި 20 ފޮށްޓެއް ބަހެއްޓިއިރު ރަށްރަށުގައި 24 ފޮޓެއް ބެހެއްޓިއެވެ.