އެމްޑީޕީ ޤައުމީ މަޖިލީހުގެ ބައި-އިލެކްޝަންގެ ވޯޓުލުން ކުރިއަށް

މޯލްޑިވިއަން ޑިމޮކްރެޓިކް ޕާޓީ، އެމް.ޑީ.ޕީގެ ޤައުމީ މަޖިލީހުގެ ބައި-އިލެކްޝަންގެ ވޯޓުލުން ފެށިއްޖެއެވެ.

އެމް.ޑީ.ޕީ ޤައުމީ މަޖިލިސް ބައި-އިލެކްޝަންގެ ވޯޓުލުން ފަށާފައިވަނީ މިއަދު މެންދުރު 14:00 ގައެވެ.

ބައި-އިލެކްޝަންގެ ވޯޓުލުން ކުރިއަށްދަނީ ތާޖުއްދީން ސްކޫލާއި ހިރިޔާ ސްކޫލުގައެވެ. އެމް.ޑީ.ޕީއިން ބުނީ ޤައުމީ މަޖިލީހުގެ ބައި-އިލެކްޝަންގެ ވޯޓުލުން މިރޭ 21:30 ހާ ހަމައަށް ކުރިއަށްދާނެކަމަށެވެ.

މިހާތަނަށްއައިރު އެމްޑީޕީގެ ރައީސް އަދި ކުރީގެ ފޮރިން މިނިސްޓަރ ޢަބްދުﷲ ޝާހިދާއި، އެޕާޓީގެ ޗެއަރޕަރސަން އަދި ކުރީގެ އިކޮނޮމިކް މިނިސްޓަރ ފައްޔާޟް އިސްމާޢީލް ވަނީ މި ބައި-އިލެކްޝަންގައި ވޯޓު ލައްވާފައެވެ.

މި އިންތިޚާބުގައި 25 ދާއިރާއަކަށް 10،683 މީހުންނަށް ވޯޓުލުމުގެ ހައްޤު ލިބިފައިވެއެވެ. ވޯޓުލުމުގެ ހައްޤު ލިބިގެންވާ މީހުންގެ ދާއިމީ ލިސްޓު އެ ޕާޓީގެ ވެބްސައިޓުގައި ވަނީ ޝާޢިއުކޮށްފައެވެ.

މިބައި-އިލެކްޝަންގައި މާލޭ ސަރަޙައްދުގައި 20 ފޮށްޓެއް ބަހައްޓާފައިވާއިރު، ރަށްރަށުގައި 24 ފޮޓެއް ބަހައްޓާފައިވެއެވެ.