މަޖިލީހުގައި ގެދޮރުވެރިކަމުގެ ކޮމިޓީއެއް އުފައްދައި މުޤައްރިރަކަށް ފަލާޙް

ރައްޔިތުންގެ މަޖިލީހުގައި މުޅިއަން އަލަށް ގެދޮރުވެރިކަމާބެހޭ ކޮމިޓީއެއް އުފައްދައި މަސައްކަތްތައް ފަށައިފިއެވެ. މިއާއެކު ރައްޔިތުންގެ މަޖިލީހުގައި ދާއިމީ 19 ކޮމިޓީއެއް އޮންނާނެއެވެ.

ގެދޮރުވެރިކަމާބެހޭ ކޮމިޓީއެއް މިއަދު އެކުލަވާލައި ވަނީ އެ ކޮމިޓީއަށް މުގައްރިރާއި ނައިބު މުގައްރިރުން އައްޔަންކުރައްވާ، އެ ކޮމިޓީއަށް މެންބަރުންވެސް ކަނޑައަޅުއްވާފައެވެ. އެގޮތުން ކޮމިޓީގެ މުގައްރިރަކީ ޕީއެންސީގެ ޕާލިމަންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާޙެވެ. ނައިބު މުގައްރިރަކީ ހެންވޭރު ދެކުނު ދާއިރާގެ މެންބަރު ޙުސައިން ޢިމްރާން ލަޠީފެވެ.

ކޮމިޓީގައި ހިމެނިވަޑައިގަންނަވާ މެންބަރުން:

1- އިބްރާހީމް ފަލާޙް އިނގުރައިދޫ ދާއިރާ/ މުޤައްރިރު
2- ޙުސައިން އިމްރާން ލަޠީފް/ ހެންވޭރު ދެކުނު ދާއިރާ/ މުޤައްރިރުގެ ނައިބު
3- ޙުސައިން ޝަރީފު / ހުޅުމާލެ އުތުރު ދާއިރާ
4- މުޙައްމަދު އިބްރާހީމް/ ގަލޮޅު އުތުރު ދާއިރާ
5- އަޙްމަދު ޟަމީރު/ މައްޗަންގޮޅި މެދު ދާއިރާ
6- އަސްމާ ރަޝީދު/ މާފަންނު މެދު ދާއިރާ
7- މުޙައްމަދު އިސްމާޢީލް/ ވިލިމާލެ ދާއިރާ
8- މުޙައްމަދު ދާއޫދު/ ކުޅުދުއްފުށި އުތުރު ދާއިރާ
9- އިބްރާހީމް ނާޒިލް/ ހިތަދޫ ދެކުނު ދާއިރާ
10- މުޙައްމަދު ސިނާން/ ހިތަދޫ އުތުރު ދާއިރާ
11- ޢަލީ ފަޒާދު/ ފުވައްމުލަކު މެދު ދާއިރާ

ރައްޔިތުންގެ މަޖިލީހުގެ ގެދޮރުވެރިކަމުގެ ކޮމިޓީގެ މުގައްރިރާއި ނައިބު މުގައްރިރު ކަނޑައެޅުން pic.twitter.com/DrFpthnpwn

— People's Majlis (@mvpeoplesmajlis) July 31, 2024

ގެދޮރުވެރިކަމާބެހޭ ކޮމިޓީއަކީ ގެދޮރުވެރިކަމާ ގުޅޭ ކަންކަން ދިރާސާކުރުމާއި ބޯހިޔާވަހިކަމާގުޅޭ ޤާނޫނީ ސިޔާސަތުތަކަށް ގެންނަންޖެހޭ ބަދަލުތައް ފާހަގަކޮށް، އެކަން މަޖިލީހަށް ހުށަހެޅުމަށް އުފެއްދި ކޮމިޓީއެކެވެ.

މި ކޮމިޓީގެ މަސްއޫލިއްޔަތުތަކުގެ ތެރޭގައި ސަރުކާރުން ހިންގާ އިޖުތިމާޢީ ބޯހިޔާވަހިކަމުގެ މަޝްރޫއުތައް ކުރިއަށްދާގޮތް ބަލައި ފާހަގަކުރެވޭ މައްސަލަތަކަށް ހައްލު ހޯދުމަށް ސަރުކާރަށް ލަފާ އެރުވުމާއި، ހިޔާވަހިކަމުގެ ޙައްގު ހުރިހާ ރައްޔިތުންނަށް ހަމަހަމަކަމާއެކު ލިބިދޭތޯ ބެލުން އަދި ގެދޮރުވެރިކަމާ ގުޅޭގޮތުން ރައްޔިތުންނަށް ކުރިމަތިވާ މައްސަލަތައް ދިރާސާކުރުން ހިމެނެއެވެ.