ޢަބްދުއްލަޠީފަކީ ދިވެހި އިޤްތިޞާދަށް ހެޔޮ ބަދަލުތައް ގެނެސްދެއްވި މުހިންމު ޙިއްސާދާރެއް: ރައީސް

މަރުޙޫމް ޢަބްދުއްލަޠީފް ޙުސައިންމަނިކް (އަތަމާ ޢަބްދުއްލަޠީފް)އަކީ ޒަމާނާގުޅޭ އެތައް ހެޔޮ ބަދަލެއް ދިވެހި އިޤްތިޞާދަށް ގެނަސްދެއްވުމުގެ މުހިންމު ޙިއްސާދާރެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، މއ.އަތަމާގެ، އަބްދުއްލަތީފު ހުސައިން މަނިކު (އަތަމާ ޢަބްދުއްލަޠީފް) އަވަހާރަވުމާއި ގުޅިގެން އެކްސްގައި ކުރެއްވި ތަޢުޒިޔާގެ ޕޯސްޓެއްގައެވެ.

ރައީސް ވިދާޅުވީ، ރާއްޖޭގައި ވިޔަފާރި ކުރިއެރުވުމަށް ދިގު މުއްދަތެއްގައި ގިނަ މަސައްކަތްތަކެއް ކޮށްދެއްވާފައިވާ، އަދި ޖަމާޢަތަށް ފައިދާހުރި އެތައް ޚިދުމަތަކާ، މިސްކިތް ބިނާކުރެއްވުމާ، ގިނަ ޢަދަދެއްގެ ދިވެހީން ޙައްޖަށް ގެންގޮސްދެއްވުން ފަދަ ދަރުމަވެތި އެތައް ކަމެއް ޤައުމަށްކޮށްދެއްވައި، މުޖްތަމަޢުގެ އިޙްތިރާމް ހޯއްދަވާފައިވާ، ޢަބްދުއްލަޠީފް އަވަހާރަވީ ޚަބަރު އެއްސެވީ ފުން ހިތާމައާއެކުކަމަށެވެ.

މަރުޙޫމް ޢަބްދުއްލަޠީފަކީ، ދިވެހި ވިޔަފާރިވެރީންގެ އިސް ސަފުގައި ޙަރަކާތްތެރިވެ ވަޑައިގެންނެވި އަދި ދިވެހީންނަށް އަމިއްލައަށް އެތައް ކަމެއް ކުރެވޭނެކަން ހިތްވަރާ ޢަޒުމާއެކު ސާބިތުކޮށްދެއްވި، ޒަމާނާގުޅޭ އެތައް ހެޔޮ ބަދަލެއް ދިވެހި އިޤްތިޞާދަށް ގެނަސްދެއްވުމުގެ މުހިންމު ޙިއްސާދާރެއްކަމަށް ރައީސް ވިދާޅުވިއެވެ. ރައްޔިތުންގެ ލާބަޔާ މަންފާއަށް ހޭދަކުރެއްވުމުގައި އަދި ދީނީ ކަންކަން ކުރިއެރުވުމުގައި އިސްނެންގެވި މަދަދުގާރެއްކަމަށްވެސް ވިދާޅުވިއެވެ. މީގެ އިތުރުން ޖަމާޢަތަށް ފައިދާހުރި ޚާއްޞަ މަސައްކަތްތައް ކޮށްދެއްވުމުގެ ރޮނގުން ޤައުމީ އިނާމް 1991 ވަނަ އަހަރު ޢަބްދުއްލަޠީފް ޙާޞިލްކުރައްވާފައިވާކަން ރައީސް ފާހަގަކުރެއްވިއެވެ. އަދި ގެއްލިގެން އެދިޔައީ ޤައުމަށް ބޮޑެތި މަސައްކަތްތަކެއްކޮށްދެއްވި އަގުހުރި، ތަޖްރިބާކާރު، ނަމޫނާ ޝަޚްޞިއްޔަތެއްގެ ގޮތުގައި ރައީސް ސިފަކުރެއްވިއެވެ.

ރައީސް ވަނީ ޢަބްދުއްލަޠީފް އަވަހާރަވުމަކީ މުޅި ޤައުމަށް ކުރިމަތިވި ހިތާމައެއްގެ ގޮތުގައި ސިފަކުރައްވާ މަރުޙޫމްގެ ޢާއިލާއަށް ކެތްތެެރިކަން ދެއްވުން އެދި ދުޢާކުރައްވާފައެވެ.

"ސުވަރުގޭގެ ދާއިމީ ނިޢުމަތުގައި، މާތްﷲގެ ރުހިވޮޑިގަތުމާ، މަޣްފިރަތާ، ރަޙްމަތުގައި މަރުޙޫމް ޢަބްދުއްލަޠީފް ޙުސައިންމަނިކު ލަހައްޓަވާށިއެވެ. އާމީން." ރައީސުލްޖުމްހޫރިއްޔާ ވިދާޅުވިއެވެ.

إِنَّا لِلَّٰهِ وَإِنَّا إِلَيْهِ رَاجِعُونَ

ރާއްޖޭގައި ވިޔަފާރި ކުރިއެރުވުމަށް ދިގު މުއްދަތެއްގައި ގިނަ މަސައްކަތްތަކެއް ކޮށްދެއްވާފައިވާ، އަދި ޖަމާޢަތަށް ފައިދާހުރި އެތައް ޚިދުމަތަކާ، މިސްކިތް ބިނާކުރެއްވުމާ، ގިނަ ޢަދަދެއްގެ ދިވެހީން ޙައްޖަށް ގެންގޮސްދެއްވުން ފަދަ ދަރުމަވެތި… pic.twitter.com/8Z4Fv5oz2K

— Dr Mohamed Muizzu (@MMuizzu) July 29, 2024

ޢަބްދުއްލަޠީފް އަވަހާރަވީއިރު ޢުމުރުފުލަކީ 94 އަހަރެވެ. އަވަހާރަވީ އޭޑީކޭ ހޮސްޕިޓަލުގައި ފަރުވާދެއްވަމުން ގެންދަވިނިކޮށެވެ.
ރާއްޖޭގައި ފުޅާ ދާއިރާއެއްގައި ވިޔަފާރިކުރައްވާ ޢަބްދުއްލަޠީފަކީ ޙައްޖަށް މީހުންގެންދިއުމުގެ މަސައްކަތް ގިނަ އަހަރުތަކެއްވަންދެން ކުރެއްވި ޚިދުމަތްތެރިއެކެވެ.
ޢަބްދުއްލަތީފްވަނީ މީހުން ޙައްޖަށް ގެންދިޔުމުގެ އިތުރުން ތަޢުލީމީ ދައިރާއާއި އެނޫންވެސް ދާއިރާތަކުން ވިޔަފާރިފުޅާކުރައްވާ އެކިޚިދުމަތް ޤައުމަށްކޮށްދެއްވާފައެވެ.

ޢަބްދުއްލަޠީފްވަނީ މާލެއާއި އަތޮޅުތަކުގައި މިސްކިތްވެސް ބިނާކޮށްދެއްވާފައެވެ. ޢަބްދުއްލަޠީފްގެ ފަސް ކައިވެންޏަށް 9 ބޭފުޅުން ލިބިވަޑައިގެންފައިވެއެވެ.