ޙައްޤުގޮތުގައި ރިޒްޤު ހޯދަން މަސައްކަތްކުރާ މީހާއަށް ރިޒްޤު ތަނަވަސްކޮށްދެއްވާނެ: ޚުޠުބާ

ޙައްޤުގޮތުގައި ރިޒްޤު ހޯދަން މަސައްކަތްކުރާ މީހާއަކީ، މާތް ﷲގެ މަގުގައި ޖިހާދުކުރާ މީހެއް ފަދަ ކަމަށާއި އޭނާއަށް މާތް ﷲ ރިޒުޤު ތަނަވަސްކޮށް ދެއްވާނެކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.

މިއަދުގެ ޚުޠުބާގެ މައުޟޫއަކީ، "ރިޒްޤުގެ ބަރަކާތް ހޯދުން" މިއެވެ.

ހުކުރު ޚުޠުބާގައި ވިދާޅުވީ ރިޒްޤު ހޯދުމަށްޓަކައި މަސައްކަތްކުރުމަކީ، މާތްﷲ އެކަލާނގެ މަޚްލޫޤާތުންގެ ކިބައިގައި ލައްވައިފައިވާ ފިޠުރީ ކަމެއްކަމަށެވެ. އަދި ރިޒްޤު ހޯދުމުގައި ކާމިޔާބު މީހަކީ، މާތް ﷲއާ ވަކީލުކޮށް، އެކަލާނގެ ޙަޟްރަތުން ތައުފީޤު ލިބުން އެދި، މަސައްކަތް ކޮށްގެން އޭނާގެ ޙަޔާތް އާރާސްތުކުރާ މީހާކަމަށްވެސް ޚުޠުބާގައި ވިދާޅުވިއެވެ.

ޚުޠުބާގައި ވިދާޅުވީ މާތް ﷲ ކޮންމެ އެއްޗެއްވެސް ހައްދަވާއިރު، އެ އެއްޗެއްގެ ރިޒްޤު ކަނޑައަޅުއްވާފައި ވީނަމަވެސް ލިބޭ މިންވަރަށް ބޭނުންތައް ބަހައިލައިގެން ހޭދަކުރުމުގައި އިޤްތިޞާދުކުރުމަކީ އިންސާނާގެ މަސްއޫލިއްޔަތެއް ކަމަށެވެ.

މާތް ﷲގެ ފޮތަށާއި، ކީރިތި ރަސޫލާގެ ސުންނަތަށް ބަލައިފި ނަމަ، ރިޒްޤު ހޯދުމުގައި އޮތް ރަނގަޅު ގޮތް ފެންނާނެ ކަމަށާއި އެއީ މާތް ﷲއަށް ބިރުވެތިވެ ތަޤްވާވެރިވުމާއި ވަކީލުކުރުން ކަމަށް ޚުޠުބާގައި ވިދާޅުވިއެވެ.

ރިޒްޤު ތަނަވަސްކޮށްދެއްވައި، ރިޒްޤުގައި ބަރަކާތްލައްވައި ކަންތައްތަކުގެ ތެރޭގައި ރަޙިމުގެ ގުޅުން ދެމެހެއްޓުމާއި ގާތްތިމާގެ މީހުންނަށް ހެޔޮ ފޯރުވުން ހިމެނެއެވެ.

"ކީީރިތި ރަސޫލާ ޙަދީޘްކުރައްވައިފައިވާ ބަސްފުޅެއްގެ މާނާގައިވެއެވެ. އޭނާގެ ރިޒްޤު ތަނަވަސްވުމަށާއި އޭނާގެ ޢުމުރު ދިގުވުމަށް ލޯބިކުރާ މީހާ ފަހެ، އޭނާގެ ރަޙިމުގެ ގުޅުން ދަމަހައްޓާހުށިކަމެވެ." ޙުޠުބާގައި ވިދާޅުވިއެވެ.

ޚުޠުބާގައި ވިދާޅުވީ ރިޒްޤު ހޯދާން އެދޭ މީހާ، ހީވާގިކަމާ އެކު، މަސައްކަތް ކުރާން ޖެހޭނެކަމަށެވެ. އަދި ޙައްޤުގޮތުގައި ރިޒްޤު ހޯދާން މަސައްކަތްކުރާ މީހާ، މާތް ﷲގެ މަގުގައި ޖިހާދުކުރާ މީހެއް ފަދަ ކަމަށާއި އޭނާއަށް މާތް ﷲ ރިޒުޤު ތަނަވަސްކޮށް ދެއްވާނެކަމަށް ވިދާޅުވިއެވެ.

އިސްލާމް ދީނުގައި މަސައްކަތަކީ، އަޅުކަމެއްކަމަށާއި ﷲގެ ޙަޟްރަތުގައި ވެސް އަދި ދުނިޔޭގެ ނަޒަރުގައި ވެސް މަސައްކަތްކުރާ މީހާއާއި މަސައްކަތްނުކުރާ މީހާ ހަމަހަމަވެގެން ނުވާނެ ކަމަށާއި މަސައްކަތްކުރާ މީހާއަށް މާތް ﷲގެ ރުހިވޮޑިގަތުން ލިބޭނެކަމަށް ޚުޠުބާގައި ވިދާޅުވިއެވެ.

ޚުޠުބާގައި ވިދާޅުވީ މާތް ﷲ ދެއްވާ ރިޒްޤުގައި ބަރަކާތްލައްވާ ކަންކަމުގެ ތެރޭގައި، ފަތިހާ ތެދުވެ ރިޒްޤު ހޯދާން މަސައްކަތް ފެށުން ހިމެނޭ ކަމަށެވެ. އަދި ރޭގަނޑު ހޭލައި ހުރެފައި، ފަތިހު ނިދާ މީހުންނަށް ދެ ޣަނީމާއެއް ގެއްލޭނެކަމަށްވެސް ހުތުބާގައި ވިދާޅުވިއެވެ.

"އެއީ ފަތިސް ނަމާދާއި ދުވާލު ފެށޭ ވަގުތުގެ ބަރަކާތެވެ. އެ ކަމުގެ ސަބަބުން އޭނާ އިލާހީ ރިޒްޤުން މަޙްރޫމުވޭ، ﷲ އޭނާގެ މައްޗަށް ވާޖިބުކުރައްވައިފައިވާ ޙައްޤު އަދާނުކުރާ ދުވަހަކީ އަބާއްޖަވެރި ދުވަހެއް، އޮފީހަށް ގަޑި ޖެހިގެންދާ މީހާގެ މުސާރައިން އުނިވާ ގޮތަށް، ސަވާބާއި ދަރުމަވެސް އުނިވާނެ، ފަތިސްނަމާދު ނުކުރުމުން ﷲގެ ރުއްސެވުމުން އޭނާ މަޙުރޫމުވާނެ، މި ވަގުތުގެ ބަރަކާތުން އިންސާނާ މަޙްރޫމު ކުރެވޭތޯ ޝައިޠާނާ މަސައްކަތް ކުރާނެ" ޚުޠުބާގައި ވިދާޅުވިއެވެ.

ރިޒްޤަކީ މާތް ﷲ ބައްސަވާ އެއްޗެއްކަން ދަނެ އެކަލާނގެ މަޚްލޫޤާތުންގެ މެދުގައި ރިޒުޤު ބައްސަވަނީ އެކަލާނގެ ދެނެވޮޑިގެންވާ ޙިކްމަތެއްގެ މަތީންކަން މިއަދުގެ ޚުޠުބާގައި ވަނީ ހަނދާންކޮށްދީފައެވެ.