ބައި-އިލެކްޝަންގައި، ރައީސުލްޖުމްހޫރިއްޔާގެ އަނބިކަނބަލުން ވޯޓުލައްވައިފި

މިއަދު ކުރިއަށްދާ ބައި-އިލެކްޝަންގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވޯޓު ލައްވައިފިއެވެ.

އެކަމަނާ ވޯޓުލައްވާފައިވަނީ މައްޗަންގޮޅި މެދު ދާއިރާގެ ވޯޓު ފޮއްޓަށެވެ. އެ ދާއިރާގެ ވޯޓުފޮށިތައް ބަހައްޓާފައިވަނީ ޖަމާލުއްދީން ސްކޫލުގައެވެ.

މިއަދު ކުރިއަށްދާ ބައި-އިލެކްޝަންތަކަކީ މާލެ ސިޓީ ކައުންސިލާއި ކުޅުދުއްފުށި ސިޓީ ކައުންސިލާއި ރަސްމާދޫ އަދި ބިލެތްދޫ ކައުންސިލްގެ ހުސްވެފައިވާ ގޮނޑިތަކަށް މެންބަރުން އިންތިޚާބު ކުރުމަށް ބާއްވާ ބައި-އިލެކްޝަނެކެވެ.

މި ބައި-އިލެކްޝަންގައި މާލެ ސިޓީ ކައުންސިލްގެ 3 ދާއިރާއަށް މެންބަރުން އިންތިޚާބު ކުރާނެއެވެ. އެއީ ހެންވޭރު ހުޅަނގު ދާއިރާ އާއި މައްޗަންގޮޅި މެދު ދާއިރާ އަދި ހުޅުމާލެ ދާއިރާގެއެވެ.

މި އިންތިޚާބުގައި 13،112 މީހުންނަށް ވޯޓުލުމުގެ ޙައްގު ލިބިފައިވާއިރު މެންދުރު 2:00އާ ހަމައަށް ވޯޓުލާފައިވަނީ 2355 މީހުން ކަމަށް އިލެކްޝަންސް ކޮމިޝަނުން ވިދާޅުވެއެވެ. މީގެ ތެރޭގައި ހިމެނެނީ 1027 އަންހެނުންނާއި 1328 ފިރިހެނުންނެވެ.