ހައްޖާއި އުމްރާގެ އަޅުކަން ފަސޭހައިން އަދާކުރެވޭނެ އިންތިޒާމު ހަމަޖެއްސުމަށް މޯލްޑިވްސް ޙައްޖު ކޯޕަރޭޝަންގެ ފަރާތުން ފަށާފައިވާ "މުވައްޒަފުންގެ ހައްޖު ސުކީމް" ގައި ގިނަ އިދާރާތަކަކުން ބައިވެރިކުރުވުމަށް ޙައްޖު ކޯޕަރޭޝަނުން ގެންދަވަނީ، ގިނަ ގުނަ މަސައްކަތްތަކެއް ކުރައްވަމުންނެވެ. އެގޮތުން މިހާތަނަށް ހަތް ކުންފުންޏަކާއި، މިނިވަން މުއްސަސާއަކާއި، ތިންވުޒާރާއެއް ހިމެނޭ ގޮތުން ޖުމްލަ ބާރަ އޮފީހަކުން ވަނީ ބައިވެރިވެފައެވެ.
އެންމެ ފަހުން މި ސްކީމްގައި ބައިވެރިވީ ޞިއްހަތާއި ބެހޭ ވުޒާރާއިންނެވެ. ޞިއްހަތާއި ބެހޭ ވުޒާރާއިން މި ސްކީމްގައި ބައިވެރިވުމަށް މިއަދު ބޭއްވި ރަސްމިއްޔާތުގައި މިކަމާއި ބެހޭ އެއްބަސްވުމުގައި ޞިއްހަތާއި ބެހޭ ވަޒީރު އިރްތިޝާމް އާދަމްއާއި ހައްޖު ކޯޕަރޭޝަނުގެ މެނޭޖިންގް ޑިރެކްޓަރ ވަނީ ސޮއި ކުރައްވާފައެވެ. އެއްބަސްވުމުގައި ސޮއިކުރެއްވުމަށްފަހު މީޑިއާއާއި މިކަމާއި ބެހޭ މައުލޫމާތު ހިއްސާކުރައްވަމުން ޞިއްޙަތާއި ބެހޭ ވަޒީރު އިރްތިޝާމް އާދަމް ވިދާޅުވީ، މިއެއްބަސްވުމުގެ ދަށުން އެވުޒާރާއާއި އެވުޒާރާގެ ބެލެނިވެރިކަމުގެ ދަށުން ހިންގަވާ އެހެނިހެން އިދާރާތާކާއި، އަތޮޅުތެރޭގެ ހޮސްޕިޓަލްތަކާއި ޞިއްހީ މަރުކަޒުތަކުގެ އެންމެހައި މުވައްޒަފުންނަށްވެސް މި ސްކީމްގައި ބައިވެރިވުމުގެ ފުރުޞަތު ހުޅުވާލެވޭނޭކަމަށެވެ.
img:http://s1.psmnews.mv/images/660x400/14635937101713.jpg|ހެލްތް މިނިސްޓްރީން ހައްޖު ސްކީމްގައި ބައިވެރިވުމުގެ ރަސްމިއްޔާތުގެ ތެރެއިން / ފޮޓޯ: ޕީއެސްއެމް
މިއަދު ޞިއްޙަތާއި ބެހޭ ވުޒާރާގައި ބޭއްވި ބައްދަލުވުމުގައި ވާހަކަފުޅު ދައްކަވަމުން ޙައްޖު ކޯޕަރޭޝަނުގެ މެނޭޖިންގް ޑިރެކްޓަރ ޔާމީން އިދުރީސް ވިދާޅުވީ، ޞިއްޙަތާ ބެހޭ ވުޒާރާއަކީ މިހާތަނަށް މިސްކީމްގެ ދަށުން އެންމެގިނަ ޢަދަދެއްގެ މުވައްޒަފުންތަކެއް ސްކީމްގައި ބައިވެރިވުމުގެ ފުރުޞަތު ހުޅުވިގެންދިޔަ އެއްބަސްވުން ކަމުގައެވެ. އަދި އެއްބަސްވުމުގެ ދަށުން ޞިއްހަތާއި ބެހޭ ވުޒާރާގެ މުވައްޒަފުން ސްކީމްގެ ދަށުން ލިބިދޭ އެންމެހައި ޚިދްމަތްތައް ފޯރުކޮށްދިނުމުގެ އިންތިޒާމްތަކެއް އެއިދާރާއިން ފަހިކޮށްދެއްވާނޭކަމަށެވެ.
ޙައްޖު ކޯޕަރޭޝަނުން ވިދާޅުވީ، އުއްމީދަކީ އަދިވެސް ގިނަ މުއައްސަސާތަކުން މި ސްކީމްގައި އަވަސް ފުރުޞަތެއްގައި ބައިވެރިވުން ކަމަށެވެ.