ވިޔަފާރި ފުޅާކުރުމަށް އެމްޓީސީސީން ބޯޓު ބަނުމުގެ ޚިދުމަތް ދޭން ފަށަނީ

އެމްޓީސީސީގެ ވިޔަފާރި ފުޅާކުރުމަށްޓަކައި ބޯޓު ބަނުމުގެ ޚިދުމަތްދޭން ފެށުމަކީ އަމާޒެއްކަމަށް އެކުންފުންފުނީގެ ސީއީއޯ ޢަބްދުﷲ ޒިޔާދު ވިދާޅުވެއްޖެއެވެ.

ޒިޔާދު މިހެން ވިދާޅުވީ އެކުންފުނީގެ އަހަރީ އާއްމު ޖަލްސާގައި ހިއްސާދާރުންގެ ސުވާލުތަކަށް ޖަވާބުދެއްވަމުންނެވެ.

އެމްޓީސީސީގެ މިދިޔަ އަހަރުގެ އަހަރީ އާއްމު ޖަލްސާ ބާއްވާފައިވަނީ އުމަރު ޒާހިރު ބިލްޑިންގައެވެ. މި ޖަލްސާގައި ހިއްސާދާރަކުވަނީ ކުންފުނިން ވިޔަފާރި ފުޅާކުރުމަށް ކުރަމުންދާ މަސައްކަތްތަކާއި ގުޅޭގޮތުން ސުވާލުކޮށްފައެވެ. އަދި ކުރީގެ މެނޭޖުމަންޓުގެ ޕްލޭންތައް މިމެނޭޖުމަންޓުން ކުރިއަށްގެންދާނެތޯވަނީ ސުވާލުކޮށްފައެވެ.

މިސުވާލަށް ޖަވާބުދެއްވަމުން ސީއީއޯ ޢަބްދުﷲ ޒިޔާދު ވިދާޅުވީ އެމްޓީސީސީގެ ތަރައްޤީއަށްޓަކައި ޕްލޭންކޮށްފައިހުރި ކަންތައްތައް އިތުރު ހަރުފަތަކަށް ގެންދިޔުމަށް މަސައްކަތްކުރަމުންދާ ކަމަށެވެ.

އަދި މިމަސައްކަތުގެ ދަށުން ބޯޓު ފަހަރު ބަނުމުގެ ޚިދުމަތްދޭން މަސައްކަތް ކުރަމުންދާކަމަށް ޒިޔާދު ވިދާޅުވިއެވެ.

"ކުރީގެ މެނޭޖްމަންޓުން ވިސްނާފަ ހުރި ޑްރެޖިންގ ޕްރޮޖެކްޓްސްތަކާއި އެކި ބާވަތުގެ މަސައްކަތް ފުޅާކުރުމަށް، އެމިސްރާބުގައި އަޅުގަނޑުމެން މިހާރުވެސް ކުރިއަށްގެންދަން، އަދި ޝިފިންގ ރިޕެއަރ ޔާޑުގެ މަސައްކަތް ވަރަށް ބޮޑަށް ކުރިއަށްގެންދެވިފައިވަނީ، އުއްމީދުކުރަނީ ދެން އަންނަ އޭޖީއެމްއެއް އަންނަންވާއިރަށް ބޯޓު ފަހަރު ބަންނަ ކުންފުންޏަކަށްވާނެކަމަށް،" ޒިޔާދު ވިދާޅުވިއެވެ.

އެމްޓީސީސީގެ ބޯޓްޔާޑެއް ތިލަފުށީގައި ހުންނައިރު، މިއީ ރާއްޖޭގައި ޑޮކިންގް ޚިދުމަތް ފޯރުކޮށްދޭ އެންމެ ބޮޑު އެއް ބޯޓްޔާޑެވެ. މާލެ އަތޮޅު ތިލަފުށީގައި ޤާއިމްކޮށް ހިންގަމުންދާ ބޯޓްޔާޑަކީ އެއްފަހަރާ ތަފާތު ސައިޒްގެ 20 އުޅަނދު ޑޮކްކުރުމުގެ ޖާގަ އޮތް ބޯޓްޔާޑެކެވެ.

ހިއްސާދާރުގެ ސުވާލަށް ޖަވާބުދެމުން އެމްޓީސީސީގެ ޗެއަރޕަރސަން މުހައްމަދު އަފީފް ހުސެއިން ވިދާޅުވީ ކުންފުނީގެ އާމްދަނީ އިތުރުކުރުމަށްވެސް ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން ބޭރުގެ ޕްރޮޖެކްޓުތަކަށާއި އަމިއްލަ ވިޔަފާރިތަކުގެ ޕްރޮޖެކްޓްތަކަށް އިސްކަންދީގެން މަސައްކަތްކުރަމުންދާކަމަށެވެ.

"ވިސްނުމުގައި ހުރީ ކުންފުނީގެ ކަންކަން އިތުރަށް ހަރުދަނާކޮށް، ސަރުކާރު ޕްރޮޖެކްޓްސްތަކަށް ބަރޯސާވާ ބަރޯސާވުން ކުޑަކޮށް ބޭރުގެ ޕްރޮޖެކްޓްސްތަކަށް ނުވަތަ ޕްރައިވެޓް ސެކްޓަރ ޕްރޮޖެކްޓްސްތަކަށް އިސްކަންދިނުން، އެ އަމާޒުގައި މިހާރުވެސް ވަރަށް ގިނަ ކަންތައްތައް ކުރެވޭ، ބައެއް ޕްރޮޖެކްޓްސްތަކުގެ މަސައްކަތްކުރެވެމުންދަނީ، ބޭރު ފައިސާއިން ކުންފުންޏަށް އާމްދަނީ ލިބޭގޮތަށް،" އަފީފް ވިދާޅުވިއެވެ.

އަފީފް ވިދާޅުވީ އެކުންފުނިން އަބަދުވެސް މަސައްކަތްކުރަމުންދާނީ ހިއްސާދާރުންނާއި ގުޅިގެންކަމަށެވެ. އަދި ހިއްސާދާރުން ދޭ ޚިޔާލާއި ލަފާތައް ބަލައިގަންނާނެ ކަމަށްވެސް އޭނާ ވިދާޅުވިއެވެ.