2020 ވަނަ އަހަރު ފެނަކައާ ހަވާލުކުރި މަޝްރޫޢުތަކުގެ މަސައްކަތްވަނީ އެއްކޮށް ހުއްޓިފައި: ވަޒީރު

ފެނަކަ ކޯޕަރޭޝަނާ ހަވާލުކުރި ފެނާއި ނަރުދަމާގެ މަޝްރޫއުތަކުގެ މަސައްކަތް އެއްކޮށް ހުއްޓިފައިވާ ކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.

ވަޒީރު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުންގެ ސުވާލުތަކަށް ޖަވާބުދެއްވަމުންނެވެ.

އިމާރާތްކުރުމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވީ ފެނާއި ނަރުދަމާގެ 80 އަށްވުރެ ގިނަ މަޝްރޫޢުގެ މަސައްކަތްތައް އެކި މަރުހަލާތަކުގައި އެކި ރަށްރަށުގައި ކުރިއަށްދާ ކަމަށެވެ. މީގެ ތެރެއިން ބައެއް މަޝްރޫޢުތަކުގެ މަސައްކަތް ހުއްޓިފައިވާއިރު ހުއްޓިފައިވަނީ ފެނަކަ ކޯޕަރޭޝަނާ ހަވާލުކޮށްފައި ހުރި މަޝްރޫޢުތައް ކަމަށް ވިދާޅުވިއެވެ.

ވަޒީރު ވިދާޅުވީ ފެނަކައަކީ މީގެ ކުރިން ފެނާއި ނަރުދަމާގެ އެއްވެސް މަޝްރޫޢެއްގެ މަސައްކަތެއް ކޮށްފައިވާ ކުންފުންޏެއް ނޫން ކަމަށެވެ. ނަމަވެސް 2020 ވަނަ އަހަރު އެކުންފުންޏަށް 16 ރަށެއްގެ ފެނާއި ނަރުދަމާގެ މަސައްކަތް ހަވާލުކޮށްފައިވާއިރު އިތުރު 3 ރަށެއްގެ އަޕްގްރޭޑިންގެ މަސައްކަތް ހަވާލުކުރި ކަމަށެވެ.

މިމަޝްރޫޢުގެ މަސައްކަތްތައް ކުރިއަށްނުދާތީ ކޮންޓްރެކްޓުތައް ބާތިލުކޮށް އެމްޑަބްލިއުއެސްސީއާ ހަވާލުކުރުމުގެ މަސައްކަތް ކުރަމުންދާ ކަމަށްވެސް ވަޒީރު މުއްޠަލިބު ވިދާޅުވިއެވެ.

"ޓަރމިނޭޓްކޮށްފައި އަޅުގަނޑުމެންވާނެ އެމްޑަބްލިއުއެސްސީ ލައްވައި ސަރވޭ ހަދާފައި އޭގެ އަގު ހޯދާފައި މިހާރު އެ މަޝްރޫއުތައް ޓެންޑަރ ބޯޑަށް ހުށަހަޅާފައިވާނީ އެމްޑަބްލިއުއެސްސީއާ ހަވާލުކުރުމަށްޓަކައި،" ވަޒީރު ޢަބްދުﷲ މުއްޠަލިބު ވިދާޅުވިއެވެ.

ވަޒީރު ވިދާޅުވީ ފެނަކައާ ހަވާލުކުރި މަޝްރޫޢުތައް ކުރިއަށްގެންދަނީ ސަބްކޮންޓްރެކްޓަރުންނާ ހަވާލުކޮށްގެން ކަމަށެވެ. މިމަޝްރޫޢުތައް އެމްޑަބްލިއުއެސްސީއާ ހަވާލުކުރުމަށް މިމަހުގެ ތެރޭގައި މަސައްކަތް ކުރައްވާނެ ކަމަށްވެސް ވަޒީރު ވިދާޅުވިއެވެ.

ކުރީ ސަރުކާރުން ކުންފުނިތަކުގެ ކެޕޭސިޓީއަށްވުރެ އިތުރަށް މަޝްރޫޢުތައް ހަވާލުކޮށްފައިވާކަމަށާއި މީގެ ސަބަބުންވެސް ބައެއް މަޝްރޫޢުތަކުގެ މަސައްކަތްތައް ކުރިއަށްނުގޮސް ހުރިކަން އިމާރާތްކުރުމާއި ބިނާރާބެހޭ ވަޒީރު ޢަބްދުﷲ މުއްޠަލިބު ފާހަގަކުރެއްވިއެވެ.