ކުރިއަށް އޮތް ދުވަސްތަކުގައިވެސް ރާއްޖޭގެ ހުރިހާ ހިސާބަކަށް ގުގުރުމާއިއެކު ބޯކޮށް ވާރޭ ވެހޭނެކަމަށް ލަފާކުރެވޭކަމަށް މޫސުމާބެހޭ ޤައުމީ އިދާރާއިން ވިދާޅުވެއްޖެއެވެ.
އެ އިދާރާއިން ވިދާޅުވީ، ކުރިން އިންޑިއާގެ ދެކުނުގައި އުފެދިފައިވާ ކޮޅިގަނޑު އިންޑިއާގެ އިރުމައްޗަށް ޖެހެމުންދާ ކަމަށާއި، އެކަމުގެ ސަބަބަން އިންޑިއާގެ އިރުމަތީ ސަރަޙައްދުތަކަށް ތޫފާން އެރުން ވަރަށް ގާތްކަމަށެވެ. އެ ތޫފާންގެ އަސަރު ރާއްޖެއަށް ކުރާނެކަމަށް ލަފާނުކުރެވޭ ކަމަށާއި، ނަމަވެސް ރާއްޖޭގެ ހުރިހާ ހިސާބަކަށްވެސް ވިއްސާރަކުރާނެ ކަމަށް މޫސުމާބެހޭ ޤައުމީ އިދާރާއިން ވިދާޅުވެއެވެ.
އުތުރުގެ އަތޮޅުތަކަށް ހުޅަނގާއި ހުޅަނގުއުތުރުން އަދި އެހެންހިސާބުތަކަށް ހުޅަނގުދެކުނާއި ހުޅަނގުން ގަޑިއަކު 15 މޭލާއި 25 މޭލާއި ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަޑަކަށް 45 މޭލާއި 55 މޭލާއި ދެމެދުގެ ބާރުމިނަށް ވައިގަދަވުން އެކަށީގެންވާ ކަމަށް މޯލްޑިވްސް މީޓިއަލޮޖިކަލް ސާރވިސް އިން ވިދާޅުވެއެވެ. އަދި ރާއްޖޭގެ ކަނޑުތައް އާއްމުގޮތެއްގައި ގަދަވާނެ ކަމަށާއި، ވީމާ ހުރިހާ ފަރާތްތަކުން އަދި ޙާއްސަގޮތެއްގައި ކަނޑުދަތުރު ކުރައްވާ ފަރާތްތަކުން މޫސުމަށް ސަމާލުވުމަށް އެ އިދާރާއިން އިލްތިމާސްކުރައްވައެވެ.
މޫސުން ގޯސްވެ ވިއްސާރަވުމުގެ ސަބަބުން ކަނޑުމަތީގެ ތަފާތު ގިނަ ހާދިސާތައް ދަނީ ހިނގަމުންނެވެ. އަދި ވޭތުވެދިޔަ ދެތިން ދުވަހުގެ ތެރޭގައި މިފަދަ ގިނަ ހާދިސާތަކެއްގެ ރިޕޯޓް، ކޯސްޓްގާޑަށް ލިބިފައިވާ ކަމަށާއި، އެހެންކަމުން، ކަނޑުދަތުރުފަތުރު ކުރައްވާ ފަރާތްތަކުން މޫސުމަށް ޚާއްޞަ ސަމާލުކަމެއް ދެއްވުމަށް އެމްއެންޑީއެފުން އިލްތިމާސްކުރައްވައެވެ.