ތިލަދުންމަތީ އުތުރުބުރީ މާރަންދޫ ކައުންސިލުގެ ނައިބު ރައީސް އަހުމަދު ރަމީޒު ނިޔާވެއްޖެއެވެ.
މާރަންދޫ ކައުންސިލު ނައިބް ރައީސް އަހުމަދު ރަމީޒު ނިޔާވެފައިވަނީ، މިރޭގެ ވަގުތެއްގައެވެ. ރަމީޒު ނިޔާވެފައިވަނީ އޭނާގެ ހާލު ދެރަވެގެން ހއ. ދިއްދޫގައި ހުންނަ އެ އަތޮޅު ހޮސްޕިޓަލުގައި ފަރުވާ ދެމުންދަނިކޮށެވެ.
ޕީއެސްއެމްނިއުސްއަށް މައުލޫމާތު ލިބިފައިވާ ގޮތުގައި ރަމީޒުގެ ހާލު ދެރެވީ މިއަދު ހަވީރު މާރަންދޫ އާއި ނެއްލައިދޫ ދެމެދު ކުޅުނު އެކުވެރިކަމުގެ ފުޓުބޯޅަ މެޗަކަށް ފަހުއެވެ. އެގޮތުން މި މެޗުގައި ރަމީޒު ކުޅެފައިވަނީ ފަހު ހާފުގައި ނަމަވެސް ވަރުބަލިވުމުން މެޗު އެއްކޮށް ނުނިމެނީސް ވަނީ ދަނޑުން ފައިބާ ބެންޗަށް ގޮސްފައެވެ. އޭގެ ފަހުން މެޗަށް ފަހު ބެންޗުގައި އިންދާ ހޮޑުލަވަން ފެށުމުން، މާރަންދޫ ސިއްޙީ މަރުކަޒަށް ގެންގޮސް ފަރުވާ ދޭން ފެށިއެވެ. ނަމަވެސް އިތުރަށް ހާލު ދެރަވަމުން ދިއުމާއެކު ދިއްދޫ ހޮސްޕިޓަލަށް ގެންދެވުނު ކަމަށް އެރަށުން ވާހަކަދެއްކި މީހަކު ބުންޏެވެ.
ރަމީޒު ނިޔާވުމާއި ގުޅިގެން މާރަންދޫ ކައުންސިލުން ވަނީ ތަޢުޒިޔާ ފޮނުވާފައެވެ. ރަމީޒަކީ އިދިކޮޅު އެމްޑީޕީގެ ޓިކެޓުގައި މާރަންދޫ ކައުންސިލަށް އިންތިޚާބުވެވަޑައިގެންނެވި މެންބަރެކެވެ. މިއީ އޭނާގެ ކައުންސިލް ފުރަތަމަ ދައުރެވެ.