ސޫރިޔާގެ ރައީސް ބައްޝާރުލް އަސަދުގެ ވެރިކަން ވައްޓާލަން މަސައްކަތްކުރާ ޖަމާއަތްތަކާއި އެޤައުމުގައި ހަރަކާތްތެރިވާ ހައްދު ފަހަނަޅާފައިވާ އައިއެސް ޖަމާއަތާ ދެމެދު ޙަލަބްގައި ވަރުގަދައަށް ހަނގުރާމަ ހިނގަމުންދާކަމަށް ޚަބަރު ލިބިއްޖެއެވެ.
"ސީރިޔަން އޮބްޒަވޭޓްރީ ފޯ ހިޔުމަން ރައިޓްސް" އިން ބުނީ ދެފަރާތުގެ ދެމެދުގައި ހަނގުރާމަ ހިނގަމުންދަނީ ޙަލަބްގެ އުތުރުގައިވާ ސަރަޙައްދެއްގައި ކަމަށާ މިހަނގުރާމައިގައި ސޫރިޔާގެ އިދިކޮޅު ޖަމާއަތްތަކުގެ ތެރޭން އިސްކޮށް ހަރަކާތްތެރިވަނީ ސަފްވާ ބްރިގޭޑް ނަމަކަށްކިޔާ ހަތިޔާރުއެޅި ޖަމާއަތެއް ކަމަށެވެ.
މިހަނގުރާމައަށްފަހު ސޫރިޔާގެ އިދިކޮޅު ޖަމާޢަތްތަކުން އާއްމުކުރި ވީޑިޔޯއެއްގައި ޙަލަބްގެ އުތުރުގައިވާ ދެ ވިލެޖަކުން އައިއެސް ޖަމާޢަތުގެ ހަނގުރާމަވެރިން ބޭރުކޮށް ސަފްވާ ޖަމާއަތުގެ ހަނގުރާމަވެރިން އެ ވިލެޖަށް ވަންނަ މަންޒަރު ދައްކާފައިވެއެވެ. ޙަލަބްގެ އުތުރުގައި ސޫރިޔާ ސިފައިންނާއި އެޤައުމުގެ އިދިކޮޅު ޖަމާޢަތްތަކާ ދެމެދުވެސް ވަރަށް ވަރުގަދައަށް ހަނގުރާމަ ހިނގަމުންދާކަމަށް ޚަބަރުތައް ބުނެއެވެ.