މިހާރު ކުރަމުންދާ ވިއްސާރައާ ގުޅިގެން ކަނޑު މަތީގެ ޙާދިސާ ހިނގަމުންދަތީ، ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް ސަލާމަތާގުޅޭ ފާރާތްތަކުން އިލްތިމާސް ކުރައްވައިފިއެވެ.
މިވިއްސާރައިގާ ކުރިއަށްއޮތް 24 ގަޑިއިރު ވެސް ރާއްޖޭގެ އެކިހިސާބުތަކަށް ގުގުރުމާއެކު ވިއްސާރަކުރާނެކަމަށް މޫސުމާބެހޭ ޤައުމީ އިދާރާއިން ލަފާކުރައްވައެވެ. އަދި މެދުތެރެއާއި އުތުރުގެ ބައެއް އަތޮޅުތަކަށް ބޯކޮށް ވާރޭވެހޭނެކަމަށް އެއިދާރާއިން ލަފާކުރައްވައެވެ.
މި ވިއްސާރައާ ގުޅިގެން ކަނޑުގަދަވުމުގެ ސަބަބުން މިއަދު މެންދުރެއްހާއިރު، 5 މީހުން ތިބި ލޯނޗެއް ފަޅައިގެންގޮސް ދިޔަވެ ޙާލުގައި ޖެހުނުކަމަށް މޯލްޑިވްސް ޕޮލިސް ސަރވިސުން މައުލޫމާތު ދެއްވައެވެ. މިއީ ށ.ކޮމަންޑޫން ފުރައިގެން ރ.އިފުރަށް ދަތުރުކުރަމުންދިޔަ ލޯންޗެއްކަމަށާ މިލޯނޗުގެ ދެ ތަނަކުން ފަޅައިގެންގޮސް ދިޔަވުމާއި ގުޅިގެން އެ ލޯންޗުން ދަތުރު ކުރިމީހުން ސަލާމަތް ކުރީ ފުލުހުންގެ އެހީތެރިކަމާއެކު ކަމަށް މޯލްޑިވްްސް ޕޮލިސް ސަރވިސުން މައުލޫމާތު ދެއްވައެވެ. ފުލުހުން ވިދާޅުވީ މިހާދިސާގައި ލޯނޗުން ދަތުރު ކުރި އެއްވެސް މީހަކަށް ހާނީއްކައެއް ނުވާކަމަށެވެ. އަދި މި ލޯންޗު ކަފު ޖަހައިގެން ރަސްގެތީމު ފަޅަށް ވައްދާފައިވާކަމަށް ފުލުހުން މަޢުލޫމާތުދެއްވައެވެ.
މިވިއްސާރައިގާ އެންމެ ދެކުނުގެ އަތޮޅުތަކަށް ހުޅަނގާއި ހުޅަނގުއުތުރުން ގަޑިއަކު 13 މޭލާއި 23 މޭލާއި ދެމެދުގެ ބާރުމިނުގައި، ވައި ޖެހޭނަކަމަށާ އެހެންހިސާބުތަކަށް، ގަޑިއަކު 10 މޭލާއި 20 މޭލާއި ދެމެދުގެ ބާރުމިނުގައި ވައިޖެހޭނެކަމަށް މުސުމާބެހޭ ޤައުމީ އިދާރާއިން ލަފާކުރައްވައެވެ. ވިލާގަނޑުގައި ގަޑިއަކު ގާތްގަޑަކަށް 45 މޭލު ބާރުމިނަށް ވައިގަދަވުން އެކަށީގެންވާކަމަށްވެސް އެއިދާރާއިން ވިދާޅުވެއެވެ.
އެންމެ ދެކުނު ސަރަޙައްދުގެ ކަނޑުތައް ގަދަވާނެކަމަށާއި، އެހެންހިސާބުތަކުގައި ކަނޑުތައް އާދައިގެވަރަކަށް ގަދަވެފައި ވިލާގަނޑުގައި ގަދަވާނެކަމަށް މޫސުމާބެހޭ އިދާރާއިން ލަފާކުރައްވައެވެ.