އެމްއެމްޕީއާރުސީގެ ބަޖެޓު 15 މިލިޔަން ޑޮލަރަށް ބޮޑު ކުރުމަށް މަސައްކަތްކުރާނަން: ފައިޞަލް

އަންނަ އަހަރުގެ އެމްއެމްޕީއާރުސީގެ ބަޖެޓު 15 މިލިޔަން ޑޮލަރަށް ބޮޑު ކުރުމަށް މަސައްކަތްކުރައްވާނެ ކަމަށް ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް ވިދާޅުވެއްޖެވެ.

ވަޒީރު ފައިޞަލް މިހެން ވިދާޅުވީ ޗައިނާގެ ޗޮންޗިންގ އެއާލައިންސްގެ ދަތުރުތައް ފެށުން ފާހަގަކުރުމަށް ބޭއްވި ހަފްލާގައި ނޫސްވެރިންނާއި ވާހަކަދައްކަވަމުންނެވެ. ާ

ރާއްޖޭގެ ފަތުރުވެރިކަން އެހެން ހަރުފަތަކަށް ގެންދިޔުމަށްޓަކައި ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. މި މަސައްކަތްތަކާއި ގުޅޭގޮތުން ވާހަކަދައްކަވަމުން ފަތުރުވެރިކަމާއި ބެހޭ ވަޒީރު ވިދާޅުވީ ރާއްޖޭގެ ފަތުރުވެރިކަން އިޝްތިހާރުކޮށް ރާއްޖެއަށް އަންނަ ފަތުރުވެރިންގެ އަދަަދު އިތުރުކުރުމުގައި މޯލްޑިވްސް މަރކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމް.އެމް.ޕީ.އާރު.ސީގެ ދައުރު ބޮޑުކަމަށެވެ.

ފަތުރުވެރިކަން އިޝްތިހާރު ކުރުމަށް ކުރާ ޚަރަދަކީ ރާއްޖޭގެ އިޤްތިޞާދަށް އޭގެ ސަބަބުން އެތައް ގުނައަކުން ފައިދާ ވާނެ ކަމެއް ކަމަށާއި، އެހެންކަމުން މި މަސައްކަތް ފުޅާ ކުރުމަށްޓަކައި އެމް.އެމް.ޕީ.އާރު.ސީގެ ބަޖެޓު 15 މިލިޔަން ޑޮލަރަށް ބޮޑު ކުރުމަކީ އުއްމީދެއް ކަމަށް ވަޒީރު ވިދާޅުވިއެވެ.

"ފިނޭންސް މިނިސްޓަރވެސް ޔަޤީންކަން ދެއްވާފަ އޮތީ އެމްއެމްޕީއާރުސީގެ ބަޖެޓު އިތުރުކޮށްދޭނެ ކަމަށް. އުއްމީދަކީ ކުރިއަށް އޮތް އަހަރު އެމްއެމްޕީއާރުސީގެ ބަޖެޓު 15 ވަރަކަށް މިލިޔަން ޑޮލަރަށް ޖެއްސޭނެކަމަށް. އެލާރި ބޭނުންކުރާނީ ވަރަށް އެފިޝެންޓުކޮށް" ފަތުރުވެރިކަމާބެހޭ ވަޒީރު ވިދާޅުވިއެވެ.

މިއަހަރަށް އެމް.އެމް.ޕީއާރު.ސީއިން ފާސްކޮށްފައިވަނީ 154 މިލިޔަން ރުފިޔާގެ ބަޖެޓެކެވެ. 15 މިލިޔަން ޑޮލަރަކީ 231 މިލިޔަން ރުފިޔާއެވެ. އެހެންކަމުން އަންނަ އަހަރުގެ އެމް.އެމް.ޕީ.އާރު.ސީގެ ބަޖެޓު 77 މިލިޔަން ރުފިޔާއިން އިތުރުވެގެންދާނެކަމަށް ލަފާކުރެއެެވެ.

ރާއްޖެ ޕްރޮމޯޓުކުރުމަށް ކުރުމުންދާ މަސައްކަތްތަކާއި ގުޅޭގޮތުން އެމް.އެމް.ޕީ.އާރު.ސީގެ މެނޭޖިންގ ޑިރެކްޓަރ އަދި ސީއީއޯ އިބްރާހިމް ޝިއުރީ ވިދާޅުވީ، ރާއްޖޭގެ ފަތުރުވެރިކަން އިޝްތިހާރުކުރުމުގެ ހުރި ފުރުޞަތުތައް ބަލަމުންދާ ކަމަށެވެ. އަދި މިކަމުގެ މިދާއިރާ އާއި ގުޅުން ހުރި ހުރިހާ ފަރާތްތަކާއެކު މަޝްވަރާކުރާނެ ކަމަށެވެ.

ޝިއުރީ ވިދާޅުވީ ރާއްޖޭގެ ފަތުރުވެރިކަން އިޝްތިހާރުކުރުމުގައި މި ސިނާއަތުގައި ވާދަވެރި އެހެން ޤައުމުތަކުގައި މިކަން ކުރާ ގޮތް ބަލަން ޖެހޭ ކަމަށެވެ.

"އަވަށްޓެރި ލަންކާއަށް ބެލި ނަމަވެސް ވަރަށް ބައިވަރު ސްޕެންޑު ކުރޭ، ކުރިން މިކަމުގައި ނޫޅޭ ޤައުމެއް ސައުދި އަރަބިއްޔާއަކީ، އެމީހުންވެސް ވަރަށް ތަފާތު އިނޮވޭޓިވް ގޮތްގޮތަށް އިޝްތިހާރުކުރަމުންދަނީ، ރާއްޖެއަކީ މުޅި ދުނިޔޭގެ ލަގްޒަރީ ޓޫރިޒަމްގެ އެންމެ ކުރީގައި އުޅޭ އެއް ޤައުމު، ރާއްޖެއިން އެބަޖެހޭ އެއަށްވުރެ ކްރިއޭޓިވް ގޮތްތައް ހޯދައިގެން ގުޅިގެން އިޝްތިހާރުކުރަން އެބަޖެހޭ،" ޝިއުރީ ވިދާޅުވިއެވެ.

ފަތުރުވެރިކަމާއި ބެހޭ ވުޒާރާއިން ވިސްނާފައިވަނީ ރާއްޖޭގެ ކޮންމެ އަތޮޅެއްވެސް ވަކިން އިޝްތިހާރުކުރަމެވެ. މިއާއެކު މުޅި ރާއްޖެއަށް ފަތުރުވެރިކަން ފުޅާކުރުމަށް ކުރަމުންދާ މަސައްކަތްތަކަށް އެހީތެރިވެދޭނެ ކަމަށްވެސް ފަތުރުވެރިކަމާއި ބެހޭ ވުޒާރާއިން ވިދާޅުވެއެވެ.