އިންޓަނޭޝަނަލް ސްކައުޓް އެންޑް ގައިޑް ފެލޯޝިޕް ގެ އަހަރީ ބައްދަލުވުން މިއަދު ރާއްޖޭގައި ފަށައިފިއެވެ.
މޫކައި ހޮޓެލްގައި ކުރިޔަށްގެންދާ 2 ދުވަހުގެ މިބައްދަލުވުމުގައި އެޖަމާޢަތުގެ ދާއިމީ 9 މެމްބަރުންނާއެކު 3 ޤައުމަކުން ޖުމްލަ 22 މަންދޫބުން ބައިވެރިވެއެވެ. މި ބައްދަލުވުމާބެހޭ ގޮތުން ޕީ.އެސް.އެމްއަށް މަޢުލޫމާތު ދެއްވަމުން، އިންޓަނޭޝަނަލް ސްކައުޓް އެންޑް ގައިޑް ފެލޯޝިޕްގެ ވައިސް ޗެއަރ ޕަރސަން، މަރިޔަމް ވަހީދާ ވިދާޅުވީ، މިއަދު ގެ ބައްދަލުވުމުގައި މައިގަނޑުގޮތެއްގައި މަޝްވަރާ ކުރަމުންދަނީ، އެ ޖަމާޢަތުގެ ފަންޑެއް ޤާއިމްކޮށް، އެފަންޑު ހިންގާނޭ ޤަވާއިދެއް ކަނޑައެޅުމާއި ލޯގޯ ފާސްކުރުމުގެ މަސައްކަތް ކަމަށެވެ.
ހަމަ އެއާއެކު އިންޓަނޭޝަނަލް ސްކައުޓް އެންޑް ގައިޑް ފެލޯޝިޕަށް މެމްބަރުން އިތުރު ކުރުމުގެ މަސައްކަތް ކުރަމުންދާކަމަށްވެސް މަރިޔަމް ވަހީދާ ވިދާޅުވިއެވެ. މަރިޔަމް ވަހީދާ ވިދާޅުވީ މި ޖަމާޢަތުގެ މައިގަނޑު މަޤްސަދަކީ ސްކައުޓާއި، ގައިޑުގައި ކުރިން ޙަރަކާތްތެރިވެފައިވާ ފަރާތްތަކަށް އަމަލީ މައިދާނުގައި ޙަރަކާތްތެރިވުމަށް ހިތްވަރުދީ، މުޖުތަމަޢުގައި ބޭނުން ހިފޭ ބަޔަކަށް ވުމަށް ހިތްވަރު ދިނުންކަމުގައެވެ.