ޢީދު އަލިން މާލެ ދިއްލާލާފައި، ހަވާއެރުވުމާއެކު ކުޅިވަރުގެ ގިނަ ޙަރަކާތްތަކެއް

މިއަހަރުގެ އަޟްހާ ޢީދު ކުލަގަދަކޮށް ފާހަގަކުރުމަށް ޢީދުގެ ފުރަތަމަ ދުވަހުވެސްރާއްޖޭގެ އެކި ކަންކޮޅުތަކުގައި ވަނީ ގިނަ ހަރަކާތްތަކެއް ކުރިއަށްގެންގޮސްފައެވެ. ޢީދުގެ މުނާސަބަތުގައި 3 ދުވަހަށް މި ކުޅިވަރުތަކާއި ހަރަކާތްތައް ކުރިއަށްދާނެއެވެ.

މާލެ ސަރަޙައްދުގައިވެސް ޢީދުގެ ފުރަތަމަ ދުވަހު ވަނީ ތަފާތު އެކި ހަރަކާތްތައް ބާއްވާފައެވެ. މާލެ ސަރަހައްދުގައި ޢީދުގެ ހަރަކާތްތައް ރާވާފައިވަނީ މާލެ ސިޓީ ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީ އާއި އެޗްޑީސީއާއި ނޭޝަނަލް ސެންޓަރ ފޯ ދި އަރޓސް އަދި ވިލިމާލޭގެ ރައްޔިތުން ގުޅިގެންނެވެ.

ޢީދުގެ ފުރަތަމަ ދުވަހު ކުރިއަށްގެންދިޔަ ހަރަކާތްތަކުގެ ތެރޭގައި ޒަމާނުއްސުރެ ދިވެހިން ޢީދު ފާހަގަކުރުމަށް ކުޅެމުން އައި ސަގާފީ އެކި ކުޅިވަރުތަކާއި ފައިހަމަކުރުންތައް ހިމެނެއެވެ. އެގޮތުން، ބޮޑުމަސް ނެރުމާއި ބޮޑުބެރުގެ ހަރަކާތްތަކާއި ދަފިނެގުމުގެ ހަރަކާތްތައް ވަނީ ކުރިއަށްގެންގޮސްފައެވެ.

މީގެ އިތުރުން އާދީއްތަ ދުވަހުގެ ރޭ މާލޭގައި ޢީދު ޝޯވ ބާއްވާފައިވެއެވެ. އަދި ހުޅުމާލޭގައިވެސް ޢީދުގެ ގިނަ ހަރަކާތްތަކާއެކު ހަވާ އެރުވުން ކުރިއަށްގެންދިޔައެވެ.

މިއަހަރުގެ ފިތުރު ޢީދުގައި ސަރުކާރުން ފެށި "ޢީދު އަލި" ހަރަކާތް، މި އަޟްހާ ޢީދުގައިވެސް ކުރިއަށްގެންގޮސް، މުޅިރާއްޖެ މިވަނީ ދިއްލާލާފައެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމުގެ މަތިން ޢީދުފަދަ މުނާސަބާ ކުލަގަދަކޮށް ފާހަގަކުރުމުގެ ގޮތުން ފެށި ހަރަކާތެކެވެ.

Illuminating the skies with joy and happiness. Eid Mubarak!#MyHulhumaléEidUfaa2024#MyHulhumalé#WithHDC@MyHulhumalemv @Dhiraagu @sheeshamv pic.twitter.com/9xGtwtkp7O

— Housing Development Corporation (@hdcmaldives) June 16, 2024

ތަފާތު އެކި ކުލަބޮކިތަކުން ރާއްޖޭގެ ސިޓީތަކާއި އަތޮޅުވެރިކަން ކުރާ ރަށްތައް ދިއްލާފައިވާއިރު މިއީ އިސްލާމީ ޤައުމުތަކުގައި ޢީދު ފާހަގަކުރުމަށް ގެންގުޅޭ ސަގާފަތެކެވެ. މާބަގީޗާތަކާއި ޢީދުގެ އެކި ޝިއާރުތައް ފެންނަގޮތަށް ފަރުމާކޮށްފައިވާ ލައިޓުތަކާއި ގިޑިގެތަކަށް ސިޓީތަކާއި ރަށްރަށުގެ ބޮޑެތި މަގުތަކާއި ގިނައިން އާންމުން އެއްވާ ސަރަހައްދުތަކުގައި ވަނީ ހަރުކޮށްފައެވެ.

މިފަހަރުވެސް ޢީދުގެ ދިއްލުންތަކަށް ގިނަ ބައެއްގެ ތަރުހީބު ދަނީ ލިބެމުންނެވެ.

ޢީދުގެ ޢަލީގެ އިތުރުން މުޅި މާލެތެރެވަނީ ތަކުބީރުގެ އަޑުން ގުގުމާރާލަފައެވެ. ސްމާޓް ސްޓްރީޓް ލައިޓްތަކުގެ ސްޕީކަރުތަކުން އަޑުހަރުކޮށް ތަކުބީރު އިއްވަން ފެށުން ވެގެންދިޔައީ ގިނަ ބައެއްގެ ހިތަށް ހަމަޖެހުމާއި އުފާވެރިކަން ގެނުވި ކަމަކަށެވެ. މިކަންވެސް އެންމެ ފުރަތަމަ ފެށްޓެވީ މާލޭ މޭޔަރުކަމުގައި މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުންނަވައިގެންނެވެ.

ރާއްޖެ ދިއްލުމުގެ ހަރަކާތް ކުރިއަށްގެންދަނީ ސިޓީތަކާއި އިދާރީ ދާއިރާތައް ހިންގުމާބެހޭ ވުޒާރާއާއި ކައުންސިލްތަކާއި ސްޓެލްކޯ އަދި ފެނަކަ ކޯޕަރޭޝަން ގުޅިގެންނެވެ. މިދިޔަ ފިތުރު ޢީދުގައި މި ހަރަކާތް ފެށުމުން ގިނަ ބައެއްގެ ޝައުގުވެރިކަން މިކަމަށް ލިބި ހުރިހާ ޢީދެއްގައި މި ހަރަކާތް ކުރިއަށްގެންދިއުމަށް ވަނީ އެދިފައެވެ.

އަޟްހާ ޢީދާ ގުޅުވައިގެން ރާއްޖޭގެ ރަށްތައް ދިއްލާފައިވާއިރު މި ލައިޓުތައް ޢީދުގެ ހަރަކާތްތައް ނިމެންދެން ބަހައްޓާނެއެވެ.