ޓިޝޫކަމަށް ބުނެ ރާއްޖެ އެތެރެކުރަން އުޅުނު 3މިލިއަނަށްވުރެ ގިނަ ސިނގިރޭޓު އަތުލައިގެންފި

ޓިޝޫކަމަށް ބުނެ އޮޅުވާލައިގެން ރާއްޖެ އެތެރެކުރަން އުޅުނު ގިނަ ޢަދަދެއްގެ ސިނގިރޭޓު މޯލްޑިވްސް ކަސްޓަމްސް ސަރވިސްއި އަތުލައިގެންފިއެވެ.

ކަސްޓަމްސްއިން ނެރުނު ބަޔާނެއްގައި ވިދާޅުވީ އެތަކެތި އަތުލައިގެންފައިވަނީ މި މަހުގެ 13 ވަނަ ދުވަހުކަމަށެވެ. އެގޮތުން، މި ޝިޕްމަންޓަކީ މިދިޔަ މެއި މަހުގެ 19ވަނަ ދުވަހު ރާއްޖެ އައި ޝިޕްމަންޓެއް ކަމަށާއި، އެ ޝިޕްމަންޓްގައި ޑިކްލެއަރ ކޮށްފައިވަނީ 343 ކަރޓަން ޓިޝޫ ޕޭޕަރ ކަމަށް ވަނީ ވިދާޅުވެފައެވެ.

ރާއްޖެ އެތެރެކުރާ މުދަލުގެ ލިޔެކިއުން ނިންމުމާއި ބަލައި ފާސްކުރުމުގެ ކަންކަން ކަސްޓަމަސްއިން ކުރަނީ ރިސްކް މެނޭޖްމަންޓް ނިޒާމުގެ ތެރެއިންކަމަށް އެ އިދާރާއިން ވިދާޅުވެއެވެ. އެގޮތުން ކަސްޓަމްސްއަށް ލިބޭ އިންޓެލިޖެންސް މައުލޫމާތާއި ޝިޕްމަންޓުގައި ހިމެނޭ މުދަލުގެ ހިރާސް އެކުލެވޭ މިންވަރަށް ރިއާޔަތްކޮށް ބަލައި ފާސްކުރުމުގެ ކަންކަން ކުރިއަށްގެންދާއިރު މި މަހުގެ 13ވަނަ ދުވަހު ޝިޕްމަންޓް ބަލައި ފާސްކޮށްފައިވަނީ ޝައްކު އުފެދޭ ކަންކަން ހުރިކަމަށް ދުރާލައި ލިބުނު އިންޓެލިޖެންސް މައުލޫމާތުތަކާ ގުޅިގެން ކަމަށް ކަސްޓަމްސްއިން ވިދާޅުވެއެވެ.

ކަސްޓަމްސްއިން ވިދާޅުވީ އެ އިދާރާގެ ކަމާގުޅޭ އެކި ސެކްޝަންތައް ގުޅިގެން ހިންގި ޖޮއިންޓް އޮޕަރޭޝަނުގައި ޝިޕްމަންޓުގައި ހިމެނޭ މުދާ ބަލައި ފާސްކުރިއިރު 143 ކަރޓަންގެ ޓިޝޫއާއެކު 200 މާސްޓަރ ކަރޓަންގެ ސިނގިރޭޓުވެސް ފެނިފައިވާކަމަށެވެ. އަދި ޖުމްލަ އަތުލައިގަތް ސިނގިރޭޓުގެ އަދަދު 3،199،200އަށް އަރާކަމަށްވެސް ވިދާޅުވިއެވެ.

މި ޝިޕްމަންޓުގައި ހިމެނޭ މުދާ ކަސްޓަމަސްއިން ހިފަހައްޓާފައިވާއިރު ރާއްޖެއަށް ސިއްރުން މުދާ އެތެރެކުރަން އުޅުނުކަމަށް ތުހުމަތުކުރެވޭ މައްސަލައެއްގެ ގޮތުގައި މި މައްސަލަ ދަނީ ތަހުގީގުކުރަމުންނެވެ.

ރާއްޖެއަށް އެތެރެކުރެވޭ މުދަލާ ގުޅޭގޮތުން ކަސްޓަމްސްގެ ޤާނޫނު ތަންފީޒުކުރުމުގައި ފަސް ނުޖެހޭނެކަމަށް މޯލްޑިވްސް ކަސްޓަމްސް ސަރވިސްއިން ވަނީ ވިދާޅުވެފައެވެ.