ސަރުކާރުން މިވަގުތު ކުރައްވަމުން ގެންދަވާ ތަރައްޤީގެ އިންވެސްޓްމެންޓްތަކުން ރައްޔިތުންނަށް ކުރާނީ ފައިދާ ކަމަށާއި އަދި ރައީސް ޔާމީންގެ އިކޮނޮމިކް ޓްރާންސްފޯމޭޝަންގެ ސަބަބުން ރާއްޖޭގެ އިޤްތިޞާދު އެތައް ތަނަކުން ކުރިއަރައިގެންދާނެ ކަމަށް އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވެއްޖެއެވެ.
ދުނިޔޭގެ މާލީ އިދާރާތަކުން ނެރޭ ފަންނީ ރިޕޯޓްތަކުން ބައެއް ތަރުޖަމާކޮށް، ރައްޔިތުންނަށާއި ބޭރުގެ ފަރާތްތަކަށް އޮޅޭގޮތަށް ވާހަކަ ދެއްކުމަށްވުރެ، އިޤްތިޞާދަށް ގެއްލުންބޮޑު އެއްވެސް ކަމެއް ނޯންނާނެ ކަމަށާއި، ދިވެހި ޤައުމަށާއި ދިވެހިންނަށް ހެޔޮނޭދޭ މަދުބަޔަކު ނަމަވެސް ޙަޤީޤަތް އޮޅުވާލަން މަސައްކަތްކުރާ ކަމަށް މިނިސްޓަރ ސަޢީދު ވިދާޅުވިއެވެ.
ރާއްޖެއަށް ބޭރުގެ އިންވެސްޓަރުން ކުރާ އިތުބާރު ނައްތާލައި، ދިވެހި ޤައުމުގެ އިޤްތިޞާދު ފުނޑާލަން ޙަޤީޤަތެއް ނެތް ވާހަކަ ފެތުރުމަކީ ފަހަކަށް އައިސް ޢާއްމުވެފައިވާ ކަމެއް ކަމަށާއި އެގޮތަށް ޢަމަލުކުރާ ފަރާތްތަކުގެ އަމާޒަކީ ދިވެހިން ނިކަމެތިކުރުން ކަމަށްވެސް މިނިސްޓަރ މިނިސްޓަރ ވިދާޅުވިއެވެ. ސަރުކާރުން މިހާރު ކުރިއަށް ގެންދަވާ ތަރައްޤީގެ ބޮޑެތި މަޝްރޫޢުތަކުގެ ސަބަބުން ޢާމްދަނީ އިތުރުވެ، ވަޒީފާގެ ފުރުޞަތު ތަނަވަސްވެ، ރައްޔިތުންނަށް ލިބޭ މަންފާ އިތުރުވާނެކަން މިނިސްޓަރ ފާހަގަކުރެއްވިއެވެ. އަދި މި މަޝްރޫޢުތަކަކީ ދައުލަތުގެ އާމްދަނީ އެތައް ގުނައަކަށް އިތުރުވެގެންދާނެ މަޝްރޫޢުތަކެއްކަން ފާހަގަކުރައްވައި، މިނިސްޓަރ ވިދާޅުވީ، އިންވެސްޓަރުންގެ އިތުބާރު ރާއްޖެއަށް ލިބެމުން އަންނަ މި ދަނޑިވަޅުގައި، ޙަޤީޤަތާ ޚިލާފު ދޮގުވާހަކަތައް ފެތުރުމަކީ ދެރަކަމެއްކަމަށެވެ.