ޢީދާ ގުޅިގެން މިމަހުގެ 20ވަނަ ދުވަސް ބަންދުކުރަން ސަރުކާރުން ނިންމައިފި

އަޟްހާ ޢީދާ ގުޅުވައިގެން މި މަހުގެ 20 ވަނަ ދުވަސް ބަންދުކުރުމަށް ސަރުކާރުން މިއަދު ނިންމަވައިފިއެވެ.

ކަލަންޑަރުގައިވާ ގޮތުން 20 ވަނަ ދުވަހަކީ ބަންދު ދުވަހެކެވެ. ނަމަވެސް ކަލަންޑަރުގައި އެގޮތަށް ކަނޑައަޅާފައި އޮތީ މި މަހުގެ 8 ވާ ހޮނިހިރު ދުވަހަކީ ޙައްޖު މަހުގެ ފުރަތަމަ ދުވަސްކަމުގައި ބަލައިގެންނެވެ. ނަމަވެސް ޙައްޖު މަހުގެ ހަނދު ސަޢުދީ އަރަބިއްޔާއަށް ފެނުމާ ގުޅިގެން ޙައްޖު މަހުގެ ފުރަތަމަ ދުވަހަކީ ހުކުރު ދުވަސް ކަމުގައި މިހާރު ވަނީ ކަނޑައަޅުއްވާފައެވެ.

ތާރީޚުތަކަށް އައި ބަދަލާއެކު އަރަފާތު ދުވަސް ނުވަތަ ޙައްޖު ދުވަސް ވާނީ މި މަހުގެ 15 ވަނަ ދުވަހަށެވެ. އަދި އަޟްހާ ޢީދު ދުވަސް ވާނީ މިމަހުގެ 16ވަނަ ދުވަހަށެވެ. އެހެންކަމުން އަޟްހާ ޢީދުގެ މުނާސަބަތުގައި ބަންދުކުރާ ތިން ދުވަހާއެކު މިމަހު ސަރުކާރު ބަންދުވާނީ 16، 17، 18 އަދި 19 އެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ ކުރިން އޮތްގޮތުން 20 ވާ ބުރާސްފަތި ދުވަހަކީވެސް ބަންދު ދުވަހެއް ކަމަށްވާތީ ގިނަ އަދަދެއްގެ މުވައްޒަފުން ޢީދު ބަންދުގައި ރާއްޖޭން ބޭރަށާއި ރާއްޖޭގެ އެކި ރަށްރަށަށް ދަތުރުކުރުމަށް ހަމަޖައްސާނެތީ ޢީދު ބަންދަށްފަހު ސަރުކާރު ހުޅުވާ ދުވަހަކަށް 20 ވަނަ ދުވަސް ހަދައިފިނަމަ އެ ފަރާތްތަކަށް ދަތިވާނެ ކަމަށެވެ. އެހެންވެ، އެ ދުވަހަކީވެސް ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހަމަޖެއްސެވީ ކަމަށް ރައީސް އޮފީހުން ވިދާޅުވެއެވެ.

މި ގެނައި ބަދަލުތަކާއެކު އަޟްހާ ޢީދު ބަންދަށްފަހު ސަރުކާރުގެ އޮފީސްތައް ހުޅުވޭނީ 23 ޖޫންވާ އާދީއްތަ ދުވަހު ކަމަށްވެސް ރައީސް އޮފީހުން ވިދާޅުވެއެވެ.