ދުވަހުން ދުވަހަށް ކުށުގެ ރެކޯޑު ސާފުކޮށްދޭން ޕީޖީ އޮފީހުން ފަށައިފި

ދުވަހުން ދުވަހަށް ކުށުގެ ރެކޯޑު ސާފުކޮށްދިނުމަށް ޕްރޮސިކިއުޓަރ ޖެނެރަލްގެ އޮފީހުން ފަށައިފިއެވެ.

ޕީޖީ އޮފީހުން މި ބަދަލު ގެނައުމަށް ނިންމާފައިވަނީ މިއަދުން ފެށިގެންނެވެ.

މީގެ ކުރިން ޕީޖީ އޮފީހުގެ ކައުންޓަރަށް ހުށަހަޅާ ފޯމުތަކުގެ ރެކޯޑު ސާފުކޮށްދެމުން އައީ ހުށަހަޅާ ދުވަހާ ޖެހިގެން އަންނަ ދުވަހުއެވެ. ނަމަވެސް، ކައުންޓަރަށް ހުށަހަޅާ ފޯމްތައް ދުވަހުން ދުވަހަށް ސާފްކޮށްދިނުމަށް ނިންމީ އެ އޮފީހުން ރައްޔިތުންނަށް ފޯރުކޮށްދޭ ޚިދުމަތްތައް ވީހާވެސް ލުއިފަސޭހަކޮށް، ހަރުދަނާކޮށް، އަވަހަށް ލިބޭނެ އިންތިޒާމުތައް ހަމަޖެއްސުމަށް ކަމަށް ޕީޖީ އޮފީހުން ވިދާޅުވެއެވެ.

މިގެނައި ބަދަލާއެކު ކޮންމެ ދުވަހަކު ހެނދުނު ހުށަހަޅާ ފޯމުތައް، ކުށުގެ ރެކޯޑު ސާފުކުރުމަށްފަހު އެދުވަހުގެ މެންދުރު 1:30 ގައި ލިބޭނެ ކަމަށް ޕީޖީ އޮފީހުން ވިދާޅުވެއެވެ. އަދި، މެންދުރު 12:00 ގެ ފަހުން ހުށަހަޅާ ފޯމުތައް، ޖެހިގެން އަންނަ ދުވަހުގެ ހެނދުނު 9 ޖަހާއިރު ލިބޭނެ ކަމަށްވެސް އެ އޮފީހުން ވިދާޅުވިއެވެ.

މީގެ އިތުރުން ފޯމު ހުށަހަޅާ ފަރާތުގެ ކުށުގެ ރެކޯޑެއް ނެތްނަމަ އެ ލިޔުން ވަގުތުން ލިބޭނެ ކަމަށްވެސް ޕީޖީ އޮފީހުން ވިދާޅުވެއެވެ.

އޮންލައިންކޮށް ކުށުގެ ރެކޯޑު ސާފުކުރުމަށް ހުށަހަޅާ މީހުންގެ ރެކޯޑު، 10 މިނިޓު ތެރޭގައި ސާފުކޮށްދިނުމުގެ ޚިދުމަތް މިހާރުވެސް ޕީޖީ އޮފީހުން އަންނަނީ ދެމުންނެވެ.