ރާއްޖެއިން ލަންކާއަށް ކަނޑައެޅުއްވި ސަފީރު ފަތްކޮޅު އަރުވައިފި

ދިވެހިރާއްޖެއިން ސްރީލަންކާއަށް ކަނޑައެޅުއްވި ސަފީރު މަސްއޫދު އިމާދު، އެމަނިކުފާނުގެ މަޤާމުގެ ފަތްކޮޅު އެ ޤައުމުގެ ރައީސް ރަނިލް ވިކްރަމްސިންހައަށް އަރުވައިފިއެވެ.

ސަފީރުގެ ފަތްކޮޅު އަރުވާފައިވަނީ އެކަމަށްޓަކައި އިއްޔެ ލަންކާގެ ރައީސްގެ ގެކޮޅުގައި ބޭއްވި ހާއްސަ ރަސްމިއްޔާތެއްގައެވެ.

ފަތްކޮޅު އެރުވުމުގެ ރަސްމިއްޔާތަށްފަހު ބޭއްވި ބައްދަލުކުރެއްވުމުގައި ރާއްޖޭގެ ސަފީރާއި ލަންކާ ރައީސް ވަނީ މުހިއްމު މަޝްވަރާތަކެއް ކުރައްވާފައެވެ. އެގޮތުން ދެ ޤައުމުގެ ގުޅުން އިތުރަށް ބަދަހިކުރުމާއި ގުޅޭގޮތުން ދެ ބޭފުޅުން މަޝްވަރާކުރެއްވިއެވެ.

މި ބައްދަލުކުރެއްވުމުގައި ސަފީރު ވަނީ ލަންކާއަކީ ހަމައެކަނި އިޤްތިޞާދީ އަދި އިޖްތިމާޢީ ތަރައްޤީގެ ބައިވެރިއެއް ނޫންކަމަށާއި، ލަންކާއަކީ ދިވެހިންގެ ގިނަ ބަޔަކު އުޅޭ ޤައުމެއްކަމާއި، އަދި ގިނަ ބަޔަކަށް ލަންކާއަކީ އެމީހުންގެ ދެ ވަނަ ވަޒަންކަން ފާހަަގަކުރައްވާފައެވެ. އަދި އެމަނިކުފާނުގެ ސަފީރުކަމުގެ ދައުރުގައި ދެ ޤައުމުގެ ގުޅުން އިތުރަށް ބަދަހިކުރުމަށް މަސައްކަތްކުރައްވާނެކަމުގެ ޔަގީންކަންވެސް ސަފީރު ވަނީ ލަންކާގެ ރައީސަށް ދެއްވާފައެވެ.

މި ބައްދަލުކުރެއްވުމުގައި ލަންކާގެ ރައީސް ރަނިލް ވިކްރަމަސިންހަ ވަނީ ރާއްޖޭގެ ސަފީރަށް މަރުހަބާ ދަންނަވާފައެވެ. އަދި ދެ ޤައުމުގެ ގުޅުން އިތުރަށް ބަދަހިކުރުމަށް މަސައްކަތްކުރައްވާނެކަމުގެ ޔަގީންކަންވެސް ލަންކާގެ ރައީސް ދެއްވިއެވެ.

ލަންކާއަށް ރާއްޖޭން ކަނޑައަޅުއްވައި ސަފީރުކަމުގެ މަޤާމަށް މަސްއޫދު އައްޔަން ކުރެއްވުމަށް މަޖިލީހުން ރުހުން ދީފައިވަނީ މިދިޔަ އޭޕްރިލް މަހުގައެވެ.