އައު މަޖިލީހަށް އެމްޑީޕީން ހުށަހެޅި ފުރަތަމަ މައްސަލަ ބަލައިގަނެ ބަހުސް ފަށައިފި

ވިހިވަނަ މަޖިލީހަށް އިދިކޮޅު އަދި މައިނޯރިޓީ ޕާޓީ، އެމްޑީޕީން ހުށަހެޅި ފުރަތަމަ މައްސަލަ ބަލައިގަނެ ބަހުސް ފަށައިފިއެވެ.

މިއަދު ކުރިއަށްދާ ޖަލްސާއަށް އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވަނީ ކުއްލި މައްސަލައެއް ހުށަހަޅުއްވާފައެވެ. އެމައްސަލައަކީ އައްޑޫ ސިޓީއަށް ފެނަކަ ކޯޕަރޭޝަނުން ފޯރުކޮށްދޭ ސާފު ބޯފެން ލިބުމުގައި ދިމާވެފައިވާ ދަތިތަކާ ގުޅިގެން ހުށަހެޅުއްވި ކުއްލި މައްސަލައެކެވެ.

މި މައްސަލަ މަޖިލީހުން ބަލައިގަތުމަށް ވޯޓަށް އެހުމުން ސަރުކާރު ހިއްސާވާ މައި ޕާޓީ، ޕީއެންސީގެ ފުލް މެޖޯރިޓީ އޮތް މަޖިލީހުން ވަނީ މައްސަލަ ބަލައިގެންފައެވެ. މިއީ ވިހިވަނަ މަޖިލީހަށް ހުށަހެޅި ފުރަތަމަ މައްސަލައެވެ. މައްސަލަ ބަލައިގަތުމަށް 83 މެންބަރުންގެ ވޯޓުން ފާސްވުމުން ބަހުސް ވަނީ މިހާރު ފަށާފައެވެ.

ވިހިވަނަ މަޖިލީހުގައި ޕީއެންސީގެ މެޖޯރިޓީ އޮތް ނަމަވެސް މައިނޯރިޓީއަށް ފުރިހަމައަށް އިހުތިރާމް ކުރާނެ ކަމަށް އެ ޕާޓީގެ މެންބަރުން ވަނީ ވިދާޅުވެފައެވެ. މިގޮތަށް އެ ޕާޓީގެ މެންބަރުން ވިދާޅުވެފައިވަނީ 19 ވަނަ މަޖިލީހުގައި އެމްޑީޕީގެ މެޖޯރިޓީ އޮވެ، އޭރު މައިނޯރިޓީ ޕާޓީތަކަށް މަޖިލީހުގައި އެކަށީގެންވާ ފުރުސަތުތަކެއް ދީފައި ނުވާތީއެވެ. އެގޮތުން، ހުށަހަޅާ ގިނަ މައްސަލަތައް މެޖޯރިޓީގެ ބޭނުންކޮށްގެން ވަނީ މަޖިލީހުން ބޭރުކޮށްފައެވެ.