އޭޑީބީގެ 58ވަނަ އަހަރީ އާއްމު ޖަލްސާގެ ވައިސް ޗެއަރއަކަށް މާލީ ވަޒީރު ޝަފީޤް

އޭޝިއަން ޑިވެލޮޕްމަންޓް ބޭންކް، އޭޑީބީގެ 58 ވަނަ އަހަރީ އާއްމު ޖަލްސާގެ ވައިސް ޗެއަރއަކަށް މާލީ ވަޒީރު ޑރ. މުހައްމަދު ޝަފީގު ހަމަޖައްސަވައިފިއެވެ.

މިކަން ހާމަކޮށްފައިވަނީ މާލީ ވުޒާރާއިން ފާއިތުވެދިޔަ 6 މަސްދުވަހު ކޮށްފައިވާ މަސައްކަތްތަކުގެ މައުލޫމާތު ހިއްސާކުރެއްވުމަށް ބޭއްވެވި ނޫސްވެރިންގެ ބައްދަލުވުމުގައެވެ.

މި ބައްދަލުވުމުގައި ވާހަކަދައްކަވަމުން މާލީ ވަޒީރު ޑރ. މުޙައްމަދު ޝަފީގު ވިދާޅުވީ 58 ވަނަ އެނުއަލް ޖެނެރަލް ބައްދަލުވުމުގެ ވައިސް ޗެއަރއަކަށްވުމުގެ ފުރުސަތު ރާއްޖެއަށް ލިބިފައިވާކަމަށެވެ. އެހެންކަމުން މި ބައްދަލުވުމުގެ ވައިސް ޗެއަރކަން ކުރައްވާނީ އެމަނިކުފާނުކަމަށް މާލީ ވަޒީރު ވިދާޅުވިއެވެ.

"އޭޝިއަން ޑިވެލޮޕްމަންޓް ބޭންކްގެ 58 ވަނަ އަހަރީ ޖަލްސާގައި ވައިސް ޗެއަރއެއްގެ ގޮތުން ރާއްޖެ ތަމްސީލްކުރުމުގެ ފުރުސަތުވެސް މިހާރު މިވަނީ މިނިސްޓްރީ އޮފް ފައިނޭންސަށް ލިބިފައި. މި ބައްދަލުވުމުގައި އަޅުގަނޑާއެކު އަޅުގަނޑުމެންގެ ޑެޕިއުޓީ މިނިސްޓަރ ސާއިދު ބައިވެރިވެވަޑައިގަންނަވާނެ." ވަޒީރު ވިދާޅުވިއެވެ.

އޭޑީބީގެ މި ބައްދަލުވުން އޮންނާނީ އަންނަ އަހަރުގެ މެއި މަހުގެ ފުރަތަމަ ހަފްތާތެރޭގައެވެ. މި ބައްދަލުވުން އޮންނާނީ އިޓަލީވިލާތުގައެވެ.