މެޖޯރިޓީގެ ބޭނުން ނަހަމަގޮތުގައި ނުހިފާނަން: އަބްދުއްރަހީމް

މަޖިލީހުގެ މެޖޯރިޓީގެ ބޭނުން ނަހަމަ ގޮތުގައި ނުހިފާނެ ކަމުގެ ޔަޤީންކަން މަޖިލީހުގެ ރައީސް އަބްދުއްރަހީމް ޢަބްދުﷲ ވިދާޅުވެއްޖެއެވެ.

ރައްޔިތުންގެ މަޖިލީހުގެ މެޖޯރިޓީ ޕާޓީ ޕީއެންސީގެ ޕާލަމެންޓަރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި، މަޖިލީހުގެ ރައީސް އަބްދުއްރަހީމް ޢަބްދުﷲ ވިދާޅުވީ، މިފަހަރު މަޖިލީހުގެ އަމާޒަކީ ރައީސުލްޖުމްހޫރިއްޔާ ބޭނުންވާ ސްޕީޑުގައި ކަންކަން ކުރުމަށް ރައްޔިތުންގެ މަޖިލީހުގެ ފަރާތުން ބޭނުންވާ އެއްބާރުލުން އެމަނިކުފާނު ބޭނުންވާ ސްޕީޑުގައި ފޯރުކޮށްދިނުންކަމަށެވެ. އަދި ރައްޔިތުން މިހާ ބޮޑު އަޣުލަބިއްޔަތެއް ދެއްވީ އެސަބަބަށްޓަކައި ކަމަށް ވިދާޅުވިއެވެ.

ނޫސްވެރިންގެ ބައްދަލުވުމުގައި، މިހާ ބޮޑު މެޖޯރިޓީއެއް ސަރުކާރަށް ލިބިފައި އޮތްއިރު، މީގެ ކުރިން މަޖިލިސްތަކުގައި އޭގެ ނަހަމަ ބޭނުން ކުރާތަން ފެނިގެންދާ ކަމަށާއި އެކަން އެގޮތަށް ނުހިނގާނެ ގޮތަށް މަސައްކަތް ކުރައްވާނެތޯ ދެންނެވި ސުވާލަށް ޖަވާބު ދެއްވަމުން އަބްދުއްރަހީމް ވިދާޅުވީ ބާރުގެ ބޭނުން ނަހަމަ ގޮތުގައި ނުހިފާނެ ކަމަށެވެ.

"އަޅުގަނޑުމެން ޤަބޫލުކުރަނީ ރައްޔިތުންގެ މަޖިލީހުގެ މިހާ ތަނަވަސް އަޣުލަބިއްޔަތެއް ރައްޔިތުން އަޅުގަނޑުމެންނަށް ދިނީ އެގޮތަށް މަސައްކަތް ނުކުރާނެ ކަމުގެ ފުރިހަމަ ޔަޤީންކަން އަޅުގަނޑުމެންނަށް އޮތީމައޭ. ރައީސް ވިދާޅުވަމުން ގެންދަވާގޮތަށް ހަމަހަމަކަމާއި އިންސާފުވެރިކަމާއި އެކުގައި އަބަދުވެސް ޕީއެންސީން މަސައްކަތް ކުރާނެ ކަމުގެ ޔަޤީންކަން އޮތީމަ މިހާތަނަވަސް އަޣުލަބިއްޔަތެއް ރައްޔިތުން އެ ދެއްވީ. އަޅުގަނޑު ރައްޔިތުންނަށް ދޭން ބޭނުންވާ ޔަޤީންކަމަކީ އިރާދަކުރެއްވިއްޔާ އަޅުގަނޑުމެންގެ މި އަޣުލަބިއްޔަތު ބޭނުން ކުރާނީ ޤައުމާއި ރައްޔިތުންނަށް އެންމެ ފައިދާ ހުރި ގޮތަށް " އަބްދުއްރަހީމް ވިދާޅުވިއެވެ.

މެޖޯރިޓީގެ ބޭނުން ނުހިފާނެ ކަމަށާއި ރައްޔިތުންނަށް ފައިދާ ހުރި ގޮތަށް މަސައްކަތް ކުރައްވާނެ ކަމަށް ޕީއެންސީން ބުނެފައިވާއިރު، އެ ޕާޓީގެ ޕާލަމެންޓްރީ ގްރޫޕުން ވަނީ މައިނޯރިޓީއަށް ބޭނުންވާ ޖާގަ ފުރިހަމައަށް ދޭނެކަން ހާމަކޮށްފައެވެ.

ވިހިވަނަ މަޖިލީހުގައި ޕީއެންސީއަށް 75 މެންބަރުންނާއެކު ސުޕަމެޖޯރިޓީއެއް ވަނީ
ކަށަވަރުވެފައެވެ. މިއީ މިހާތަނަށް މަޖިލީހުގައި ޕާޓީއަކަށް ލިބުނު އެންމެ ބޮޑު މެޖޯރިޓީއެވެ.