ރައްޔިތުންގެ ކުރިއެރުމަށް މެންބަރުން މަސައްކަތްކުރުމަށް ރައީސް ޞާލިޙް ގޮވާލައްވައިފި

ވިހިވަނަ ރައްޔިތުންގެ މަޖިލީހުގެ މެންބަރުން ރައްޔިތުންގެ ކުރިއެރުމަށް މަސައްކަތް ކުރައްވާނެ ކަމަށް އުއްމީދު ކުރައްވާ ކަމަށް ކުރީގެ ރައީސް އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

ރައްޔިތުންގެ މަޖިލީހުގެ މެންބަރުން ހުވާކުރެއްވުމާއި ގުޅިގެން މެންބަރުންނަށް ތަހުނިޔާ ދަންނަވާ ރައީސް ޞާލިހު އެކްސްގައި ކުރެއްވި ޕޯސްޓެއްގައި ވިދާޅުވީ އެ މެންބަރުންނާއި ރައްޔިތުން ހަވާލުކުރެއްވި މުހިންމު ވާޖިބު އެންމެ ފުރިހަމައަށް އަދާކުރައްވާނެ ކަމަށް އުއްމީދު ކުރައްވާ ކަމަށެވެ. އަދި ޤާނޫނު އާސާސީއާއި، ޑިމޮކްރަސީގެ ރިވެތި އުސޫލްތަކުގެ މަތީގައި ދެމިތިއްބަވައި ޤައުމަށާއި ރައްޔިތުންގެ ކުރިއެރުމަށް ގިނަ މަސައްކަތްތަކެއް ކޮށްދެއްވާނެ ކަމުގައި އުއްމީދު ކުރައްވާ ކަމަށްވެސް އެމަނިކުފާނު ވިދާޅުވިއެވެ.

ރައީސް ސާލިހުގެ އިތުރުން އެމްޑީޕީގެ ޗެއަރ ޕާސަން ފައްޔާޒް އިސްމާޢިލްވެސް ވަނީ އައު މަޖިލީހުގެ މެންބަރުންނަށް މަރުޙަބާ ދަންނަވާފައެވެ. އަދި ރައްޔިތުންގެ ހައްޤުތައް ނެގެހެއްޓުމަށާއި ނަތީޖާ ނެރޭ މަޖިލީހަކަށް ހެދުމަށް ގޮވާލެއްވިއެވެ.

އަލަށް ހުވާ ކުރެވުނު ރައްޔިތުންގެ މަޖިލީހުގައި 93 މެންބަރުން ތިއްބަވާނެއެވެ. އޭގެ ތެރެއިން އިދިކޮޅު އެމްޑީޕީއަށް ނިސްބަތްވާ މެންބަރުންގެ ޢަދަދަކީ 12 އެވެ. މިއީ 19 ވަނަ މަޖިލީހުގައި އެޕާޓީއަށް ލިބުނު ސުޕަރމެޖޯރިޓީއާ އަޅާ ބަލައި ވަރަށް މަދު އަދަދެކެވެ.