އުއްމީދަކީ ރައްޔިތުންނަށް އެންމެ މަންފާހުރި ކަންކަން ނިންމާ މަޖިލީހަށް 20 ވަނަ މަޖިލިސް ވުން: ރައީސް

އުއްމީދަކީ އަލަށް ހުވާކުރި ވިހިވަނަ ރައްޔިތުންގެ މަޖިލީހަކީ ރައްޔިތުންނަށް އެންމެ މަންފާހުރި ކަންކަން ނިންމާ މަޖިލީހަކަށް މިފަހަރު މަޖިލީސް ވެގެން ދިއުން ކަމަށް ރައީސުލްޖުމުހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އަލަށް ހުވާކުރެއްވި ރައްޔިތުންގެ މަޖިލީހުގެ މެންބަރުންނަށް މަރުހަބާ ދަންނަވާ އެކްސްގައި ކުރެއްވި ޕޯސްޓެއްގައެވެ. ރައީސުލްޖުމުހޫރިއްޔާ ހުވާކުރެއްވި މެންބަރުންނަށް ތަހުނިޔާ ދަންނަވާ ވިދާޅުވީ، އެމަނިކުފާނުގެ އުއްމީދަކީ ރާއްޖޭގެ ބަރުލަމާނީ ހަޔާތުގައި މިހާތަނަށް ދެކޭ އެންމެ ޒިންމާދާރު، އެންމެ އިތުބާރުހުރި، ޤައުމާއި ރައްޔިތުންނަށް އެންމެ މަންފާހުރި ކަންކަން ނިންމާ މަޖިލީހަށް މިފަހަރުގެ މަޖިލީސް ވުން ކަމަށެވެ.

ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފްވެސްވަނީ 20 ވަނަ ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އަށާއި ނައިބު ރައީސް އަޙްމަދު ނާޒިމަށާއި، މަޖިލީހުގެ ހުރިހާ މެމްބަރުންނަށް މަރުހަބާ ވިދާޅުވެފައެވެ. އެކްސްގައި ކުރެއްވި ޕޯސްޓެއްގައި ނައިބު ރައީސް ވިދާޅުވެފައިވަނީ މަޖިލީހުގެ މިދައުރަކީ ޚިދުމަތްތެެރި ނަމޫނާ މަޖިލީހަކަށް ވާނެ ކަމާއިމެދު ޝައްކެއް ނުކުރައްވާ ކަމަށެވެ.

މިއަދު ހުވާކުރެއްވި ރައްޔިތުންގެ މަޖިލީހުގައި 93 މެންބަރުން ތިއްބަވާނެއެވެ. އޭގެތެރެއިން ވެރިކަން ކުރާ ޕީއެންސީ މަޖިލީހުގެ 75 މެންބަރުން ތަމްސީލު ކުރައްވައެވެ. މިފަހަރު މަޖިލީހުގެ ސުޕަމެޖޯރިޓީ ނަގާފައިވާނީ ޕީއެންސީންނެވެ.

20 ވަނަ ރައްޔިތުންގެ މަޖިލީހުގައި މީގެ ކުރިން މެންބަރުކަން ކޮށްފައި ނުވާ 67 މެންބަރުން ތިއްބަވާނެއެވެ.