ފްރާންސުން ރާއްޖެއަށް ކަނޑައަޅުއްވާފައި ހުންނެވި ސަފީރު އަވަހާރަވެއްޖެ
-
ޖީން ފްރެންކޯޒް އެންމެ ފަހުން ރާއްޖެ ވަޑައިގަތީ މިމަހު
-
ސަފީރުކަމުގެ މަޤާމަށް އައްޔަންކުރެއްވީ 19 ފެބްރުއަރީ 2023ގައި
ފްރާންސުން ރާއްޖެއިން ކަނޑައަޅުއްވާފައި ހުންނެވި ސަފީރު ޖީން ފްރެންކޯޒް ޕެކްޓެޓް އަވަހާރަވެއްޖެއެވެ. ސަފީރު އަވަހާރަވުމާ ގުޅިގެން، ރާއްޖޭގެ ޚާރިޖީ ވަޒީރު މޫސާ ޒަމީރު ވަނީ ސަފީރުގެ ޢާއިލާއާއި އެޤައުމުގެ ޚާރިޖިއްޔާއަށް ތަޢުޒިޔާ ފޮނުއްވާފައެވެ.
ފްރާންސުން ރާއްޖެއަށް ކަނޑައަޅުއްވާފައި ހުންނަވާ ސަފީރުގެ މަޤާމަށް ޖީން ފްރެންކޯޒް ޕެކްޓެޓް އައްޔަންކުރައްވާފައިވަނީ 19 ފެބުރުއަރީ 2023ގައެވެ. ޖީން ފްރެންކޯޒްއަކީ ރާއްޖޭގެ އިތުރުން ސްރީލަންކާއަށްވެސް ކަނޑައަޅުއްވާފައި ހުންނެވި ސަފީރެވެ. ސަފީރު އަވަހާރަވީ ހާޓް އެޓޭކެއް ޖެހިގެންނެވެ. އަވަހާރަވިއިރު ހުންނެވީ ސްރީލަންކާގައެވެ.
ސަފީރު ޖީން ފްރެންކޯޒް ޕެކްޓެޓް ކުއްލިގޮތަކަށް އަވަހާރަވުމާއި ގުޅިގެން ޚާރިޖީ ވަޒީރު މޫސާ ޒަމީރު އެކްސްގައި ކުރެއްވި ޕޯސްޓެއްގައި ވިދާޅުވީ ސަފީރު އަވަހާރަވުމުގެ ޚަބަރު އެއްސެވީ ކުއްލި ސިހުމާ ހިތާމައާއެކުގައިކަމަށެވެ.
މޫސާ ޒަމީރު ވިދާޅުވީ ސަފީރާއި މިއަހަރުގެ ތެރޭގައިވެސް ބައްދަލުވެ، ދެ ޤައުމުގެ ގުޅުން ބަދަހިކުރުމާ ގުޅޭގޮތުން މަޝްވަރާކުރެއްވި ކަމަށެވެ. އަދި ޖީން ޕެކްޓެޓް ސަފީރުކަމުގައި ހުންނަވާ ދެ ޤައުމުގެ ގުޅުން ބަދަހިކުރައްވާ، ރާއްޖޭގެ ކުރިއެރުމަށް ދެއްވި އެއްބާރުލުން އަބަދުވެސް ފާހަގަކުރައްވާނެކަމަށް ވަޒީރު ވިދާޅުވިއެވެ.
ފްރާންސްއިން ރާއްޖެއަށް ކަނޑައަޅުއްވާފައި ހުންނެވި ސަފީރު އެންމެ ފަހުން ރާއްޖެ ވަޑައިގަތީ މިމަހުގެ ފުރަތަމަ ހަފްތާގައެވެ. އެ ދަތުރުފުޅުގައިވެސް ރާއްޖޭގެ 5 ވުޒާރާއަކާ އަދި ބައެއް ކުޅިވަރު ޖަމުޢިއްޔާތަކާއި ބައްދަލުކުރެއްވިއެވެ.