ބޫޓާންގެ ތިންޕޫގައި ބޭއްވި"ސާރކް އަރޓިސްޓު ކޭމްޕް"ގައި ރާއްޖޭގެ 5 ކުރެހުންތެރިޔަކު ބައިވެރިވުމަށްފަހު އެނބުރި ރާއްޖެއަތުވެއްޖެއެވެ.
ސާރކް އަރޓިސްޓު ކޭމްޕުގައި ކުރެވުނު ތަޖުރިބާ ޕީއެސްއެމްއާއި ޙިއްޞާކުރަމުން ކުރެހުންތެރިން ބުނީ މި ކޭމްޕުގައި ބައިވެރިވުމުން ކުރެހުމުގެ ދާއިރާއިން މިހާރު ވަރަށް ގިނަ ކަންތައްތަކެއް ދަސްވެއްޖެކަމަށެވެ.
"ސާރކް އަރޓިސްޓު ކޭމްޕް"ގައި ރާއްޖެއިން ބައިވެރިވެފައިވަނީ، ނޭޝަނަލް ސެންޓަރ ފޮރ ދި އާރޓްސް، އެންސީއޭގެ ފަރާތުންނެވެ. ޔޫތު މިނިސްޓްރީގެ ފަރާތުން ވާހަކަދައްކަވަމުން އެމިނިސްޓްރީގެ އެޑިޝަނަލް ކޯރޑިނޭޓަރ އަލީ އާމިރު ވިދާޅުވީ އެކި ޤައުމުތަކުގައި ބާއްވާ މިފަދަ ކޭމްޕް އަދި ފެސްޓިވަލްތަކުން ރާއްޖޭގެ އާރޓިސްޓުންނަށް ފުރުޞަތު ހޯދައިދިނުމަށް އެމިނިސްޓްރީން މަސައްކަތް ކުރައްވަމުންދާކަމަށެވެ. ސާރކްގެ ޤައުމުތަކުގައި އޮންނަ ގުޅުން ބަދަހިކޮށް މި ސަރަޙައްދުގެ ޤައުމުތަކުގެ އާރޓިސްޓުންނަށް އެކި އެކި ޤައުމުތަކުގެ ސަޤާފަތް ދައްކުވައިދީ އާރޓިސްޓުންގެ ހުނަރު އިތުރުކުރުމުގެ މަޤްސަދުގައި ސަރކުން އިންތިޒާމްކޮށްގެން އަހަރަކު އެއްފަހަރު ބާއްވާ މި ކޭމްޕްގައި ރާއްޖެއިން ބައިވެރިވި މި 8 ވަނަ ފަހަރުއެވެ. އަދި 2013 ވަނަ އަހަރު މި ކޭމްޕް ވަނީ ރާއްޖޭގައި ބާއްވާފައެވެ.
ސާރކްގެ ޤައުމުތަކުން 37 ބައިވެރިވެރިން މިއަހަރުގެ ކޭމްޕްގައި ބައިވެރިވެފައިވެއެވެ.