މޯލްޑިވިއަނުން މަތިންދާބޯޓެއް ކުއްޔަށް ހޯދަނީ

ޤައުމީ އެއަރލައިން މޯލްޑިވިއަނުން މަތިންދާބޯޓެއް ކުއްޔަށް ހޯދަން އިއުލާންކޮށްފިއެވެ. މޯލްޑިވިއަނުން އިއުލާންކޮށްފައިވަނީ 3 އަހަރުގެ މުއްދަތަކަށް މަތިންދާބޯޓެއް ކުއްޔަށް ނެގުމަށެވެ.

މޯލްޑިވިއަނުން ކުރި އިއުލާނެއްގައި ބުނެފައިވަނީ އެ ކުންފުނިން ހޯދަނީ އޭ319 ސީއީއޯ ނުވަތަ އޭ320 ސީއީއޯގެ ބޯޓެއްކަމަށެވެ. މި ބޯޓު ހޯދަނީ މިއަހަރުގެ ސެޕްޓެމްބަރ މަހުގެ ތެރޭގައި ޚިދުމަތް ނެރެވޭވަރަށްކަމަށް އެ ކުންފުނިން ވަނީ ބުނެފައެވެ.

މީގެކުރިންވެސް މޯލްޑިވިއަނުން ވަނީ މިގޮތައް ދިގު މުއްދަތައް ކުއްޔަށް ނަގައިގެން މަތިންދާ ބޯޓުތައް ޚިދުމަތުގައި ބޭނުންކޮށްފައެވެ.

މޯލްޑިވިއަންގެ ފްލީޓަށް އިތުރު ބޯޓުތައް ހޯދައި ޚިދުމަތް ފުޅާކުރުމަށް މި ސަރުކާރުން ދަނީ މަސައްކަތް ކުރައްވަމުންނެވެ. މި މަސައްކަތުގެ ދަށުން މިމަހުގެ 8 ވަނަ ދުވަހު ވަނީ އޭޓީއާރު މަރުކާގެ އިތުރު ބޯޓެއް ގެނެސްފައެވެ. މިއީ މޯލްޑިވިއަންގެ ފްލީޓަށް އިތުރުވި 4 ވަނަ އޭޓީއާރު މަރުކާގެ ބޯޓެވެ.

މޯލްޑިވިއަންގެ ފްލީޓްގައި މިހާރު 25 އެއަރކްރާފްޓް އެބައޮތެވެ. އިތުރު ބޯޓުތައް ހޯދުމުގެ މަސައްކަތްވެސް އެ ކުންފުނިން ދަނީ ކުރަމުންނެވެ.