ފުނަދޫ ކައުންސިލްގެ ގޮނޑި އިންތިޚާބަކާނުލައި ޕީއެންސީ ކެންޑިޑޭޓަށް

ށ. ފުނަދޫ ކައުންސިލްގެ އަންހެނުންނަށް ޚާއްސަ ގޮނޑި އިންތިޚާބަކާ ނުލައި ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް، ޕީއެންސިގެ ކެންޑިޑޭޓް ހޮވިއްޖެއެވެ.

އިލެކްޝަންސް ކޮމިޝަނުން އިއުލާންކުރައްވާފައިވާ ގޮތުން އަންނަ ޖޫން މަހުގެ 8 ވަނަ ދުވަހު ބާއްވަން ތާވަލު ކުރި ބައި އިލެކްޝަނަށް ކުރިމަތިލާން ހުޅުވާލި ފުރުޞަތުގައި ކުރިމަތިލާފާއިވަނީ އެންމެ ކެންޑިޑޭޓެއް ކަމަށެވެ. އެއީ ކޮންގްރެސް ޕާޓީން ކުރިމަތިލެއްވި ށ. ފުނަދޫ މާބަގީޗާގެ އާމިނަތު ޔުމްނާއެވެ.

މުއްދަތު ހަމަވިއިރު އިންތިޚާބު ކުރަން ޖެހޭ އަދަދަށް ކުރިމަތިލާފައިވާތީ އިންތިޚާބަކާ ނުލައި ފުނަދޫ ކައުންސިލްގެ އަންހެން މެންބަރަކަށް ޔުމްނާ އިންތިޚާބުވެފައިވާ ކަމަށް އިލެކްޝަންސް ކޮމިޝަނުން ވިދާޅުވެއެވެ.

ރަށު ކައުންސިލްތަކުގެ ބައި އިލެކްޝަންތައް އިލެކްޝަންސް ކޮމިޝަނުން ކުރިއަށްގެންދާއިރު ގިނަ ގޮނޑިތައް ކާމިޔާބު ކުރަމުންދަނީ ކޮންގްރެސް ޕާޓީންނެވެ. އެގޮތުން، މި މަހުގެ 4 ވަނަ ދުވަހު ބޭއްވި ހަ ރަށެއްގެ ކައުންސިލް ބައި އިލެކްޝަންތަކުގެ ތެރެއިން ހަތަރު ކައުންސިލެއްގެ ގޮނޑި އެ ޕާޓީން ކާމިޔާބު ކުރިއެވެ.